АКШ санкцияләренә "Салават химия заводы" һәм Уфа моторлар төзү җитештерү беләшмәсе эләккән
Исемлектәге физик һәм юридик затларның АКШтагы теләсә нинди акчалары, милекләре, күчемсез милекләре, банк хисалары, ширкәтләрдәге өлешләре яки биржаларда сатылучы кыйммәтле кәгазьләре томалана дигән сүз.
Русия сәламәтлек саклау министрлыгы кайбер дарулар белән тәэмин итү тоткарлану билгеләре булуын белдерә.
Бу Русиягә дару сатмаулары белән түгел, ә логистиканың тоткарлануы белән бәйле диелә.
Казанда 2023 елгы Махсус Олимпиаданың кышкы уеннары уздырылмаячак
Украинадагы хәзерге вазгыять, Русиягә каршы кертелгән киң санкцияләр һәм оештыручыларның делегацияләр иминлегенә гарантия бирә алмавы сәбәпле, Казанда Махсус Олимпиаданың кышкы уеннары уздырылмаячак. Бу хакта ярышлар сайтының рәсми белдерүендә әйтелә.
"Сагыш, үкенеч һәм тирәнтен күңел кайту белән, Special Olympics International Казанда Махсус Олимпиаданың кышкы уеннары уздырмаячагы турында игълан итә. Алар 2023 елның 21 гыйнварында башланырга тиеш иде", диелә белдерүдә.
Anonymous халыкара аноним хакерлар төркеме Украина сугышы башланганнан бирле Русия һәм Беларусның 2,5 меңләп сайтын җимергән.
Anonymous бу турыда Twitter-да белдерде.
Дәүләт медиасы, банклар, хастаханәләр, һава аланнары, ширкәтләр һәм шулай ук Русия яклы хакерлар төркемнәренә киберһөҗүмнәр булуы әйтелә.
Хакерлар шулай ук аннексияләнгән Кырымда Мәскәүдән куелган хакимиятнең рәсми сайтын да “егып салуларын” белдерә.
Русия президенты Владимир Путин 24 февральдә Украинага каршы сугыш ачкач, 25 февральдә Anonymous Русия хөкүмәтенә каршы интернетта һөҗүмнәр оештырачагын игълан итте.
5 марттан S7 һава ширкәте барлык халыкара очышларны туктата, дип хәбәр ителә ширкәт матбугат хезмәтенең Telegram-каналында. S7 Airlines вәкиллекләрендә туристларга партнер һава ширкәтләре рейслары белән өйләренә кайтырга булышалар диелә. Монда тулырак.
Украина саклану министрлыгы Донецки өлкәсенең Волноваха шәһәре янында Русиянең Су-25 һөҗүм очкычын бәреп төшерүен белдерә. Җиргә төшкән очкыч фотосын интернетка украин блогеры Юрий Бутусов чыгарды.
Соңрак ул урыннан Русия очучысын алып китәргә килгән боралакның да бәреп төшерелүе хәбәр ителде. Боралак турындагы хәбәр әлегә расланмаган.
Украинада сугышның сигез көнендә Русия хәрбиләре һөҗүмнәре нәтиҗәсендә 28 бала һәлак булган, 64е яраланган. Бу турыда Украина президентының балалар хокуклары вәкиле Дарья Герасимчук белдерде.
“Бала табу йортлары, балалар бакчалары, мәктәпләр юк ителде. Русия һөҗүмнәре барган урыннарда бер ярым миллион бала бар. Аларның кайберләре ятим, кайберләре инвалид, ашыгыч рәвештә ярдәмгә мохтаҗлар” диде Герасимчук.
Татарстанның Баулы районы башлыгы Ильяс Гузаиров Украинада республикадан тагын бер хәрби – кече сержант Станислав Герасимовның үлүен хәбәр итте.
Бүген Башкортстан башлыгы Радий Хәбиров та, Украинага каршы сугышта республикадан ике кешенең һәлак булуын хәбәр итте. Зианчурадан Алексей Кондратьев һәм Кырмыскалыдан Кузьма Николаев. Алар килешү белән хезмәт иткән.
2 мартта Түбән Камада Татарстаннан бу сугышның беренче корбаны Илнур Сибгатуллин җирләнгән иде.
Монда тулырак.