АКШ Русиянең Украинага һөҗүме белән бәйле яңа чикләүләрен игълан итте
АКШның финанс министрлыгы "Сбер" башлыгы Герман Грефны, Русия думасын һәм 328 депутатын, шул исәптән Татарстан һәм Башкортстаннан сайланган депутатларны, Русиянең саклану комплексы белән бәйле оешмаларын һәм ширкәтләрен чикләүләр исемлегенә кертте. Соңгылары арасында Казан боралак заводы, Күмертау боралак заводы да бар.
Чикләүләр исемлегенә Татарстаннан депутатлар – Татьяна Ларионова, Марат Нуриев, Максим Топилин, Елена Ямпольская кермәгән.
Алар "ДНР" һәм "ЛНР"ның бәйсезлеген тануга тавыш бирүдә катнашмаган иде. Башкортстаннан Ризван Корбанов, Рифат Шәйхетдиновка чикләүләр кагылмаган.
Шулай ук, АКШның финанс министрлыгы Русиянең алтын белән бәйле операцияләренә чикләүләр кертүен белдерде.
Украина мөфтие Сәид Исмәгыйлов үз Facebook битендә сугышны яклаучы Русия мөфтиләренә язган.
“Вакытлыча басып алынган Киев өлкәсеннән 87 яшьлек татар хатыны шалтыратты, һәм ул үлем хәлендә, приюттан чыга алмый һәм хәрәкәт итә алмый. Ул анда яшерелгән тагын бер кешедән үзе үлгәннән соң аны, юрганга төреп, шунда күмүне сораган. Ул миңа бу җир азат ителгәннән соң мөселман зиратында җирләп дога кылырга вәгъдә бирүне сорады. Мин вәгъдә бирдем. Безнең илгә бу һөҗүмне хуплаган Русия мөфтиләре, мин сезгә бу хатын-кызның фотосын җибәрермен”, ди ул.
Бүген НАТО лидерлары очрашты. Саммитта яңгыраган төп фикерләр:
- Төньяк Атлантика берлеге, аерым алганда корал белән, Украинага ярдәмен дәвам иттерәчәк.
- Русия химик корал яки күпләп юк итү коралы куллана калса, моңа җавап булачак.
- НАТО низагның алга таба да кискенләшүенә каршы, беректәшләр Украинага гаскәрләр җибәрмәячәк яки очмый торган һава киңлеге кертмәячәк.
- НАТО лидерлары белдерүендә Русиянең Украинага агрессиясе хөкем ителә, кичекмәстән хәрби хәрәкәтләрне туктатырга һәм Украина җирләреннән гаскәрләрне чыгарырга чакырыла.
Краснодар ОМОНыннан 12 Росгвардия хезмәткәре Украинага барудан баш тарткан.
"25 февральдә Росгвардиянең Краснодар краендагы "Пластун" оператив ротасы взводы командиры, полиция капитаны Фәрит Читав һәм аның ротасының 11 хезмәткәре отряд командирының Русия чиген узу һәм алга таба Украинага бару турында боерыгын үтәүдән баш тарткан. [...] Росгвардия бу хезмәткәрләрне Краснодарга кайтарып, аларга карата хезмәт тикшерүе үткәргәннәр эш урыннарыннан куганнар", дип яза хокук яклаучы Павел Чиков үзенең Телеграм-каналында.
Чиков хезмәткәрләрне эштән алуны канунсыз дип санауларын һәм хезмәт урынына кайтаруны таләп итеп мәхкәмәгә шикаять бирүләрен хәбәр итә.
БМО Генераль ассамблеясе кабат Русиянең Украинага бәреп керүенә каршы резолюция өчен тавыш бирде. Резолюцияне 140 ил яклап тавыш бирде, узган юлы кебек үк, Русия, Беларус, Корея халык демократик республикасы, Сүрия һәм Эритрея каршы чыкты. 38 дәүләт, шул исәптән Кытай, тыелып калды. Баш ассамблея Русиядән кичекмәстән сугышны туктатуны таләп итә. Шулай ук Русия гамәлләре Европада халыкара җәмгыять дистәләгән еллар буе күрмәгән һуманитар һәлакәткә китерде, дип бәяли.
Баш ассамблея резолюцияләре, БМО иминлек шурасы резолюцияләреннән аермалы буларак, үтәлеше мәҗбүри түгел. Куркынычсызлык шурасында исә Русия вето хокукына ия һәм шураның уңайсыз резолюцияләрен томалый.
"Эхо Москвы" радиосының элекке баш мөхәррире Алексей Венедиктов хәбәр иткәнчә, аның ишеге каршына парик кигән дуңгыз башын ташлаганнар, ә ишеккә "judensau" (яһүд дуңгызы) дип язылган Украина гербын ябыштырганнар. "Алар мине һәм минем гаиләмне куркытырга җыенамы? Мине, Дудаев сугышчылары атып үтерергә алып барган кешене?" - дип яза Венедиктов үзенең Телеграм каналында.
Джо Байден Русияне G20-тан чыгарырга чакырды. АКШ президенты G20 илләренең барысы да аның тәкъдиме белән килешмәвен әйтте. Ул шулай ук киләсе очрашуга Украинаны чакырырга тәкъдим итте.
Сугышның 30нчы көне. Төп хәбәрләр:
- НАТО ашыгыч очрашуда Русия Украина белән сөйләшүләр вакытында кичекмәстән тынычлык игълан итәргә тиеш дип белдерде. Альянс Украинага алга таба да ярдәм итәргә вәгъдә итте.
- Украина президенты Зеленский "Русия фашизмын туктатыгыз" дип видео чыгарды. Анда ул Икенче дөнья сугышы һәм Русиянең Украинага һөҗүме арасында охшашлыклар күрсәтте.
- Төнлә Украинаның җиңе өлкәсендә һава һөҗүме кисәтүе яңгырады. Днепрда хәрби объектка ракет һөҗүме ясалды – Украина хәрбиләре.
- Кичә Украинада 7 һуманитар коридор эшләде, аларны 3343 кеше кулланып эвакуацияләнде – Украина вице-премьеры Ирина Верещук.
- Лондонда Оксимиронның сугышка каршы чираттагы концерты узды. 20 мең доллар җыелды, акчалар Украина качакларына ярдәмгә юлланачак дип игълан ителде.