Русия журналистлары, сәясәтчеләре һәм хокук яклаучылары күмәк хат язган. Алар дәүләткә хыянәттә һәм гаскәр турында "фейклар" таратуда гаепләнүче сәясәтче Владимир Кара-Мурзаны азат итүне таләп итә. Хатны 70ләп кеше имзалаган.
"Прокурор фикеренчә, аның халыкара форумнарда сугышны, Путин Русиясендә хакимияткә каршы булучыларны эзәрлекләүләрен хөкем итеп чыгыш ясавы – хыянәт булып тора. Прокурор фикеренчә, бу сүзләр үтерү җинаяте кылуга тиң", диелә хатта.
Кара-Мурза бер елга якын тикшерү изоляторында тотыла. Быел 6 апрельдә дәүләт гаепләве аны 25 елга ирегеннән мәхрүм итүне сорады.
- Былтыр апрель аенда Русия кораллы көчләре турында ялган мәгълүмат таратуда гаепләп, мәхкәмә Кара-Мурзаны сак астына япты. Ул сугышка каршы протестлар башлангач кабул ителгән, гаскәр турында фейклар тарату кануны нигезендә тикшерү изоляторына беренчеләрдән буларак ябылган кешеләрнең берсе.
- Моңа Американың Аризона штаты канун чыгаручылары алдында ясаган чыгышында Русия хакимиятләренең гамәлләрен һәм Украинага һөҗүмне хөкем итүе сәбәп булды.
- Октябрьдә исә тикшерү изоляторында утыручы Владимир Кара-Мурзага каршы тагын бер җинаять эше ачылды, аны дәүләткә хыянәттә гаеплиләр.
🛑 Русиядә Азатлык томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум