Xalıq inde Yaña yılğı kiçälärdän soñ kire üz xälenä qayta başladı kebek. Köndälek eşlär dä üz urınına qayta. Şulay da bäyrämnär haman da däwam itä häm äle tağın ber atnağa suzılaçaq. Bu yallar ezsez genä ütmi. Tatarstanda 31 dekaberdän alıp 3 ğinwarğa qädär 64 yanğın çığu oçrağı terkälgän, anda 19 keşe häläk bulğan. Ülüçelär arasında xatın-qız häm ike yäşlek bala da bar. Nigezdä yanğın çığunıñ töp säbäbe - ut belän saqsız eş itü bulğan. Soñğı täwlek eçendä genä dä respublika buyınça barlığı unber yanğın çığu oçrağı terkälgän, utta altı keşeneñ ğömere özelgän.
Şulay uq yaña yıldan soñ tärtip bozıp yörüçelär dä kübäyep kitkän. Äytik, şuşı könnärdä Qazannıñ “Xösäiniä” mäçete yanında ike yäş yeget irtänge yaqta mäçetkä kilüçe ber abzıynı qıynağannar. Älege küñelsez xäl turında tulıraq itep, üzeneñ isemen efirğa äytergä telämäwçe xäzrät söyläde:
“Çınnan da “Xösäiniä” mäçete yanında bezneñ mäçetkä yörüçe ber abıyıbıznı qıynadılar. Monı kürşe yortta tämäke tartırğa çıqqan keşelär kürgän häm aşığıç yärdäm maşinasın çaqırğannar. Bu bezneñ äxlaqnıñ, tärtipneñ tübän däräcädä buluın kürsätä. Bigräk tä yäşlärneñ şulay tik torğanda keşene olı keşene qıynawı. Ul älegä qädär şifaxanädä añına kilä almıyça yata. Anı isereklär qıynağannar. Säbäplären açıqlaw öçen militsiä äle tikşerü eşlären alıp bara”.
Gölnaz Şäyxetdin
