Qazan metrosınıñ qalğan stansiäläre 1000 yıllıq ütkäç eşlänmäs inde dip söylände xalıq. Ni ğäcäp uramda salqın qış bulsa da metro tözüçelär eşlären tuqtatmağannar. Çönki şuşı könnärdä alar jurnalistlarnı qazılıp yatuçı yaña stansiälärne kürsätmäkçelär ide. Hawa salqınayıp kitü arqasında ekskursiäne başqa atnağa küçerdelär. Läkin qayber jurnalistlar Qazandağı “İdel-press” binası qarşındağı metro qazu tişegenä kerep çıqtılar, hawa temperaturası artıq tubın bulu säbäple ikençe atnağa kilersez dip borıp cibärdelär. Bu metro qazu tişegendä eş çınnan da tuqtalmağan, maşinalar göreldi, eşçelär tez-bız çabışalar ide.
Başqaladağı metro tözeleşeneñ eşçänlege belän Qazan metro tözeleşe başlığınıñ urınbasarı Vin'yamin Tärcemanov tanıştıra:
- Bügenge köndä energoinstitut qırıyındağı “Käcä bistäse”ndä qazu eşläre bara. Älege stansiäne nığıtu öçen kiräkle materiallar da äzer. Şuşı könnärdä “Käcä bistäse” tuqtalışın nığıta başlıybız. Ciñü prospektındağı tonnel' eşlänelep bette diärgä bula. Şulay uq älege stansiäneñ öske yağı da taş kirtä belen äyländerep alınğan. Bu könnärdä bezne hawa torışı beraz totqarladı, jurnalistlarğa bez “Käcä bistäse” stansiäsen nığıta başlawıbıznı kürsätmäkçe idek. Ni qızğanıç temperatura tübän bulu säbäple kütärü-töşerü caylanması eşlämäde. Xäzer temperaturanıñ beraz cılınuın kötärgä kiräk bulaçaq.
Matbuğatta metro tözeleşen finanslaw totqarlanu arqasında eşçelär yalğa cibärelgännär digän xäbärlär buldı. Bu xaqta sez diärsez digän sorawğa Vin'yamin Tärcemәnov bolay dide:
- Min bolay dip cawap birer idem. Biş stansiäne qullanuğa tapşırğannan soñ eşçelärne qısqartırğa turı kilde. Tözeläse obyektlar kimegäç 1200 keşedän bügen 870 eşçe qaldı diärge bula. Bu ğädäti küreneş, şuña kürä eşçelär belän waqıtlıça ğına kontraktlar tözelgän ide. Min monda bernindidä ğäcäpkä qalırlıq närsä kürmim. Bügenge eşçelär eş betkänçe bulaçaqlar, ä waqıtlıça eşlägännär obyektlar qullanuğa tapşırılğaç kittelär.
Finanslaw buınça problemalar çıqmas dip ömetlänäbez. Bezneñ 30 avgusttan birle eşne tuqtatqanıbız yuq.
Şulay Vin'yamin äfände metronıñ ber stansiäsen tözü öçen 36 ay kiräklegen äytte. 1000 yıllıq aldınnan qızu templar belän eşlägännär xäzer plan buyınça eşlilär ikän. Aqçalar tieşençä barsa 2007 yıl axırına 2008 yıl başına “Käcä bistäse” belän “Ciñü prospektı” stansiälären qullanılışqa tapşırırğa uylıylar. Xäzerge waqıtta “Tawlar” stansiäsennän “Ciñü prospektı”na qädär bulğan 978 metr arada ber tonnel' äzer, ikençesen qazu däwam itä. Ä “Kreml'”dän “Käcä bistäse”stansiäsenä qädär 2 kilometr ara su astınnan ütkängä beraz aqrınraq eşlärgä kiräk. Çönki tonnelgä su töşüe ixtimal. Metro tözüçelärneñ citäkçeläreneñ süzenä qarağanda mondıy problema bulmas dip kötelä, eşne planlaştıruçı injenerlar häm başqa belgeçlär törle illärdän kilgännär. Alarnıñ täcribälärenä häm tonnel' qazuçı maşinalarnıñ köçenä ışanalar. Aldağı atnada könnär cılıtsa “Käcä bistäse”n nığıtunı däwam itärgä uylıylar.
Röstäm İsxaqi
