“Qazan yärminkäse”neñ biznes üzägendä ütkän säwdä yortları xezmättäşlegenä bağışlanğan kiñäşmädä TR säwdä häm tışqı iqtisadıy xezmättäşlek ministrı Xafiz Salixov Tatarstanğa tovar äyläneşenä kertkän öleşe buyınça Törkiä, Belorussiä, Kipr wäkilläre berençe urında bara dip äytte. Tatar-törek säwdä äyläneşe genä dä 1 milliard 300 mln. dollardan artıp kitkän.
5, 6 yıl elek “Tatarstan” säwdä yortların tözü protsessı başlanğan ide. Anıñ nigezendä Tatarstan belän çit ölkälärdä yäşäwçe eşmäkärlär, tatar eşmäkärläre belän eşlekle partnerlıq forumı buldırıldı. Bügenge köndä älege forum Tatarstannan tış 40 tan artıq säwdä yortları häm respublikanıñ 21 säwdä-iqtisadı berämleklären berläşterä. Şunı da äytergä kiräk, bu respublika oyışmalarındağı tovarlarnı çitkä genä çığaru tügel, ä törle ölkälärgä sibelgän tatar eşmäkärlären berläşterü çarası da bulıp tora.Älege kiñäşmäne ütkärüçelär däwlät citäkçeläre, ayırım alğanda Tatarstan respublikasınıñ säwdä häm tışqı iqtisadıy xezmättäşlek ministrlığı, Böten dönya tatar kongressı. Kongress räiseneñ urınbasarı Färit Urazaev söyli:
- Bu kiñäşmädä qatnaşuçı eşmäkärlärneñ çığışlarınnan kürengänçä alar biznestan kergän aqçağa mäçet salalar, tatar kitapxanäläre açalar, milli bäyrämnärebezne ütkärergä yärdäm itälär. Alar törle töbäktä yäşäwçe tatar milläte öçen zur tırışlıq quyalar.
Bötendönya tatar kongressı räise Rinat Zakirov eşmäkärlärgä şäxsi mänfägat'lärennän tış millät, din eşlärendä aktiv qatnaşırğa çaqırdı. “Qama” säwdä yortınıñ marketing buyınça citäkçe urınbasarı Rafail Bädretdinov eşmäkärlek itkändä xislärne, dini milli ideologiäne qırıyğa quyarğa kiräk dip söyli başlawğa aña kiñäşmädä qatnaşuçı eşmäkärlär qarşı çıqtılar. Ayıruça Äzerbäycan ölkäsennän Nail' äfände çit töbäklärdäge tatarlarğa bez yärdäm itmäsäk kem yärdäm kürsäter dide. Şul qarşı çığudan soñ Sverdlov töbägeneñ eşmäkäre Rawil Bikbov, Tübän Novgorod ölkäsendäge “Tatarstan” säwdä yortınıñ direktorı Ayrat Usmanov çığışlarında üz töbäklärendä millät, din ölkäsenä yärdäm itüläre turında basım yasadılar. “Tatarstan – Arxangel'” säwdä yortınıñ citäkçese Rim Kälimullinnıñ forumğa kilüe maqsatı turında bolay dide:
- Üzebezdäge mäçetne torğıza alsam bik äybät bulır ide.
Färit Urazaevqa bu tatar eşmäkärläreneñ utırışlarıñ, forumınıñ kiläçägen niçek küzallıysız digäç, ul bolay dip cawap birde:
- Şunı ğına äytä alam, bıyılnıñ sentäberendä “Tatar eşmäkärläre” syezdı kötelä!
Röstäm İsxaqi
