Qazandağı üzbäk, äzerbayjan, tatar, başqort, qırğız cämğiätläre inde berniçä kön däwamında “Näwrüz”ne qarşılaw bäyrämnären ütkärä. Härkem üzeneñ borınğı cırların yañğırata, tarixi uyın qoralları, onıtıla başlağan yola tärtiplärne iskä töşerä. Bäyräm uñayınnan, sişämbe könne “Azatlıq” radiosınıñ Qazan byurosına törkiçä yaña yıl küçtänäçe, “Näwrüz” büläkläre belän ğalim häm fol'klar belgeçe Gennadi Makarov kilep kerde. Büläklärgä kilsäk, ul da bulsa, yaña ğına tabadan töşkän “Aq qalfaq” ansambleneñ cırları kergän häm älege ansambl'neñ cırçısı Alinä Bulatovanıñ “Qadim moñnar” digän ike lazer tälinkä. Xäzer inde törle respublika häm xalıqara festival' lawreatı bulğan “Aq qalfaq” tatar fol'klor ansambleneñ cırların ayırım – ayırım konsert, bäyrämnärdä genä tügel, ä teläsä qaysı waqıtta tıñlarğa mömkin. Tälinkälärgä nigezdä xalıq cırları kergän. Äytik, “Täräwix”, “Älwidağ”, “Saq – Soq”, “Näwrüz”, “Qunaqlıq” häm başqalar. Şunı äytergä kiräk, älege cırlar dumbra, def, gıyjıq, sornay, taş sıbızğı, tanbur, göslä kebek borınğı uyın qorallarında başqarıla. Gennadi Makarov “Aq qalfaq” ansamble belän ozaq yıllar buyı citäkçelek itep, balalarğa xalıq – awaz icatın, borınğı uyın qorallarında uynarğa öyrätä. Näwrüz könendä tuğan yaña muzıykal' yazmalarnıñ üzençälekläre turında Gennadi Makarov söyli: “Bu ike disk soñğı 20 yıl eşläw däwereneñ ber näticäse dip äytergä bula. Andağı köylär, başqaru bik üzençälekle. Bu köylär urta ğasır tatar sänğätenä xas muzıka qoralları ozatılışında başqarıla. Köylärne başqaruçılar küp, ämma borınğı köylärne borınğı muzıka qoralları belän başqaru ul äle xäzergä tatar sänğätendä berençe tapqır. Disknıñ ikençese bezneñ ansambl'neñ solistkası Alinä Bulatova cırlarınnan tora. Ul yäş buluına qaramastan borınğı köylärne bik zur ostalıq belän başqara. Şunlıqtan bu ike disknı ayırım çığarırğa buldıq.” Gölnaz Şäyxetdin
