- Yutazı rayonındağı awıllar Tatarstannıñ yözek qaşı bulırday ide alar. Bügenge kön awılınıñ çire alarğa da tigän. Tatarstannıñ qaysı awılına çıqsañ da şul xäl xäzer. İnvestorlar kermägän cirlärdä, investorlar kergän cirlärdä citeşterü ayaqqa basqan. Läkin aña qarap awıllarnıñ torışı üzgärmägän.
Jurnalist Asia Yunısova äytmeşli, respublikanıñ qaysı rayon-awılına barma, barsında da ber ük mäşäqät, ber ük borçu. Yutazı rayonı digännän, ul Başqortstan, Bawlı, Aznaqay kebek neft'kä tayanıp yäşägän rayonnar belän yänäşä torıp, alardan qalışmasqa tırışıp yäşäp yata. Yutazınıñ başlığı Almaz Säxäpov ta yaña keşe. Aña äle bu rayonda bik küp tir tügärgä kiräk bulaçaq. Xäyer aña ğına tügel yaña quyılğan barlıq rayon başlıqlarına qağıla bu. Başqaladan yıraq kitkän sayın rayon, awıllarnıñ torışı naçarlanğannan naçarlana bara. Yulsızlıq, ärem qırları, cimerek kolxoz bilämäläre, sütelep-talanıp betkän texnika häm başqalar häm başqalar. Köç-xäl belän yäşäp kilgän rayonnarğa respublika citäkçeläre kilep, yaña saylanğan rayon başlıqların sügep, yaxşılap eşlägez dip şeltäläp kittelär kitüen. Läkin moña qarap awıldağı apa-abıylarğa eş, aqça tabılıp, tormışları yaxşırır, alarnıñ balaları kire tuğan yaqlarına qaytır dip kem ışandıra ala. Yuq, berkemdä awıl xalqın moña ışandıra almas möğayın. Närsä dip ışansın, närsä dip türälärneñ buş süzlärenä iğtibar itsen di inde alar. Awıl abzıylarınıñ ğailäsen, sarıq-sıyırların aşatasıları bar. Kübese invalid kenägäsen yunältep, pensiä alu artınnan çaba. Awıl apaları irtänge 4 tän torıp Qazanğa söt, may, yomırqa, eremçek satırğa aşığa. Maşinalı abzıylar alarnıñ härbersennän 70-100 sum alıp yul çığımnarın qaplıy. Awıl apaları söt aqçasınıñ yartısın şul könne ük şähärdä uqıp yörüçe qız-ullarına qaldıra. Ulları isä ul aqçanıñ ber öleşen tulay toraqnı totuçı yegetlärgä birä dä, atna axırında awılına qaytıp äti-änisennän tağın aqça alıp kitä. Kem köçle şul tipterä, kem yomşaqlıq kürsätä ul isä aqçasızlıqtan tilmerä. Bu küreneşne Balıq bistäse, Piträç, Teläçe, Qazanğa yaqın rayonnarda kürergä bula. Xäyer çittäge Çirmeşän kebek rayonnarda da şul uq xäl dilär. Balıq bistäse digännän, anda kolxozlarnı, munitsipal' saylawlarğa qädär bulğan citäkçelär taratıp beterdelär inde di, anda yäşäwçelär. Kolxoz fermalarındağı mallarnı bülgändä rayonnıñ militsiäse kilep sıyır sawışularnı, eşçelärne tınıçlandırğan. Ä bu waqıtta rayondağı awıl xucalığın üsterergä tieşle citäkçe keşelär sıyırlarnı maşina arbasına tutırıp, ozatıp yörgän. Bügenge köndä ul mal-tuar fermalarınıñ nigez taşlarına qädär urlap beterdelär inde dip sızlana rayon xalqı. Bu könnärdä Minzälä, Zäy, Tübän Qama yaqlarında yazğı qır eşlären başladılar. Minzälälärne respublikanıñ agrar ministrlıq belgeçläre orlıqlarğa tieşle ximikatlarnı almağansız dip şeltälärgä dä ölgergännär. Ä bu waqıtta bez sanağan häm sanamağan rayonnar yazğı qır eşläre turında awız açırğa da qurqa, orlıq, texnika, yağulıq-maylaw materialları yuq.
Läkin şuña da qaramastan Tatarstannıñ awıl xucalığı yıldan-yıl mul uñış ala.
Röstäm İsxaqi
