Comğa könne Däulät şurası räise Färit Möxämmätşin Ğäräp däwlätläre ligası qarşındağı Ğäräp mäğärif, mädäniät häm fän oyışması general' direktorı Monji Busnina citäkçelegendäge delegatsiä belän oçraştı. F.Möxämmätşin beldergänçä, ğäräp illäre belän xezmättäşlek Tatarstannıñ tışqı eşçänlegendä töp yünäleşlärneñ berse bulıp tora. İntertat mäğlümatlarına qarağanda, ALEKSO ğa kerä torğan illär belän täwge bağlanışlar nibarı 2004 yılda ğiına başlanğan. Ä menä iqtisadıy häm başqa ölkälärdäge xezmättäşlek küptännän alıp barıla. Bu illär arasında bigräk tä iqtisadıy yaqtan Misır, Berläşkän Ğäräp Ämirlekläre, İordaniä, Küwäyt, Ğiraq, Soğud Garäbstanı totrıqlı partnerlar bulıp sanala ikän. ALEKSO nıñ ayırım neft' çığaruçı däwlätläre Tatarstan iqtisatına investitsiälär buyınça potensial' çığanaqlar bularaq ta qabul itelä. Tatarstan isä bu illärgä awır yök maşinaları, boralaq, neft', kawçuk, meditsina cihazları häm başqa produktsiälär cibärep tora. Ruxi ölkälärdä dä Tatarstan inde şaqtıy ğına xezmättäşlek buyınça kileşülär tözegän. Äytik, Mäğärif häm fän ministrlığı belän Misır yuğarı mäğärif ministrlığı arasında qul quyılğan kileşü nigezendä misırda xäzerge waqıtta utızlap student belem ala ikän.
Gölnaz Şäyxetdin
