26 april — Tuqay tuğan kön. Tatarstanda ul üzenä kürä zur bäyräm itep ütkärelä. Tatarstanda bu kön räsmi räweştä Tuğan tel köne dip iğlan itelgän.
Tantanalı çaralar köndezge säğät 12 dä şähär üzägendä Tuqay häykälenä çäçäklär salu belän başlanıp kitte. Anda Tatarstan Xökümäte wäkilläre, Däwlät Şurası räise Färit Möxämmätşin, premyer-ministr Röstäm Minnexanov, şähär başlığı İlsur Metşin, Yazuçılar, Kompozitorlar, Rässamnar berlekläre citäkçeläre, yazuçılar, şağirlär qatnaştı. Ä köndezge säğät berdä Cälil teatrı yanındağı Tuqay häykäle qarşında şiğri bäyräm açıldı. Mäydanğa cıyılğan xalıq arasında studentlar, cämäğätçelek wäkilläre, şiğriätkä häm millätkä bitaraf bulmağan keşelär kilgän ide. Cıyınnı yazuçılar berlege räise İlfaq İbrahimov açtı.
Premyer-ministrı urınbasarı - mädäniät ministrı Zilä Välieva Prezident Şäymiev yaña ğına imzalağan färmannı iğlan itte:
“2006 yıl Tatarstanda ädäbiät häm sänğät yılı dip iğlan itelüen küzdä totıp, 2006 yılnıñ 26 aprelendä Ğ.Tuqaynıñ tuuına 120 yıl tulunı iğtibarğa alıp, 2006 yılda iskärmä bularaq Tatarstan Respublikasınıñ Ğabdulla Tuqay isemendäge 7 däwlät büläge birelä. 2006 yılda Tatarstan Respublikasınıñ Ğabdulla Tuqay isemendäge däwlät büläkläre tübändägelärgä birelä: yazuçı Rabit Batulla, kompozitor Luiza Batır – Bolğari, yazuçı, şağir Rawil Boxaraev, şağir Marsel Galiev, rässam Niqolay İndyuxov, yazuçı Rafael Mostafin, rässam Firinat Xalikov,. Laureatlarnı täbrikläp, alarnıñ aldağı icadi tormışlarında matur sänğät cimeşläre tudırıp, bezne şatlandırsınnar.”Tuqay bülägenä layıqlı bulğan cide lawreatnıñ berse, Marsel Galiev bolay dide: “Bez qaläm iäläre härber süzebezne yazğan waqıtta üzebezneñ ädäbi dönyabıznı Tuqay bieklege belän härwaqıt çağıştırıp qarıybız. Süz küäse, tel qödräten bez Tuqaynıñ tel däryasında yözderep qarıybız. Häm bezneñ telägebez Tuqay ruxı bezdä härwaqıt razıy bulsın ide, bezgä şuşındıy böyek şäxesneñ isemen yörtü, aña layıq bulu bäxete yazğan. Bezne Xoday tel açqıçlarınnan ayırmasın ide.”
Bäyräm tanılğan häm yäş şağirlär üzläreneñ äsärlären uqıdı, citdi çığışlar cır häm muzıka belän ürelep bardı.
Şiğri cıyında bik küp şağirlär, Rusiäneñ kinomotografiyä häm mädäniät xezmäte citäkçese Mixail Şvedkoy häm başqa qunaqlar çığış yasadı. Şiğri cıyın tatarstan yaña ğasır tele kanalı aşa turıdan – turı kürsätelde.
Gölnaz Şäyxetdin
