Ğabdulla Tuqaynıñ tuuına 120 yıl tuluğa bağışlanğan çaralarğa Rusiä häm çit illärdä küp kenä qunaqlar kilde.
TÖREKSOY ul törki däwlätlärneñ mädäniät ministrları ğämälgä quyğan xalıqara oyışma. Ul törki xalıqlarnıñ, şul isäptän, tatar, başqort, üzbäk, äzerbayjan, törek, qırğız häm başqa qärdäş xalıqlarnıñ mädäniäten üsterü, üzara xezmättäşlek belän şöğellänä. TÖREKSOY oyışmasın dönya cämäğätçelege, şul isäptän Rusiä dä räsmi räweştä tanıy. TÖREKSOY xalıqara däräcädäge muzıka, teatr, sınlı sänğät festival'lären ütkärä. Xalıq icatın, milli ğöref ğädätlär turında mäğlümatlar tartuğa zur öleş kertä. Uzğan yılda Qazanda törki xalıqları teatrlarınıñ festivale bulğan ide. Köz aylarında anıñ qatnaşlığında İslam mönbäre kino festivale ütte. Ä oktäberdä TÖREKSOY Änqarädä Qazannıñ 1000 yıllığına bağışlanğan çaralar oyıştırıldı. Ozaq yıllar buyı TÖREKSOY oyışmasınıñ general' direktorı bulıp kürenekle cırçı, Äzerbayjannıñ mädäniät ministrı, ä xäzer şuşı ilneñ Rusiädäge ilçese Polad Böl – Böl Oğlı eşli. Pänceşämbe kiç Azatlıqnıñ Qazan studiäsendä qunaqta - xalıqara TÖREKSOY oyışması citäkçeseneñ urınbasarı Mostafa Balçıq buldı. Mostafa bäy Qazanğa Tuqaynıñ 120 yıllığına maxsus kilgän. Anıñ belän äñgämäne Azatlıqnıñ Qazan studiäsendä Rimzil Wäli qordı.
Rimzil Wäli: “Sez Tuqay bäyrämen ütkärergä kilegez, Qazanda üzegezne niçek xis itäsez?”
Mostafa Balçıq: “Qazanğa bu minem ikençe kilüem, xäzer monda üzemne öyemdä kebek xis itäm. Xätta xäzer Qazan uramnarda irken yöri ala başladım. Qazanda Tuqayğa bağışlap ütkärelgän çaralar barlıq törki dönyasına da ürnäk bulıp torırlıq. Tuqaynı min üzebezneñ şağir bularaq xis itäm häm monıñ belän ğorurlanam.”
Rimzil Wäli: “TÖREKSOYnıñ bu eşlärendä şağirlärneñ, muzıkantlarnıñ, rässamnarnıñ icatı kürsäteläme? Tuqay belän başqa törki xalıqlar da qızıqsınamı? ”
Mostafa Balçıq: “Arif Nixatasiäneñ ber şiğerendä mondıy yullar bar: Fatix İstanbulnı alğan yäşeñdä sin … Monda äytelgänçä, bez dä yäşlärgä Tuqaynıñ yäşli küpme äsärlär icat itkänen añlatırğa tırışabız. İñ berençe çiratta bez yäşlärgä Tuqaynıñ menä şuşı yağın kürsätäbez. Häm bez bıyıl iyün ayında Törkiäneñ İstanbul şähärendä Tuqayğa bağışlanğan zur bäyräm uzdırırğa cıyınabız. Qazannan da älege çarağa bik küp ğalimnär, yazuçılar, şağirlär, sänğät keşeläre çaqırılğan. Ä älege bäyrämgä qädär bez Ğabdulla Tuqaynıñ şiğerlären törekçä häm tatarça cıyıntıq itep çığarırğa uylıybız. Älege kitapnı bez Törkiädäge Tuqay bäyrämendä dä qunaqlarğa taratırğa cıyınabız.”
TÖREKSOY oyışması citäkçese urınbasarı Azatlıq radiosınıñ törki xalıqlar yäşägän töbäklärdä eşläwçe xäbärçelärneñ mäğlümatına yuğarı bäyä birde häm radio eşçänlegenä dä uñışlar teläde.
Gölnaz Şäyxetdin
