Tatar internetı forumı bıyıl inde IV märtäbä ütkärelä. Bıyıl anı Tatmedia agentlığı oyıştırdı. Forumnıñ programmasında çarağa Tarix institutı citäkçese Rafail Xäkimov, Bötendönya tatar kongressı räise Rinat Zakirov qatnaşaçaqlar dip yazılğan bulsa da, alar tatar internetı problemaları xaqında söyläşergä waqıt tapmadılar, küräseñ. Cıyılışta elek bik teläp qatnaşqan Tatarstan prezidentı tışqı elemtälär departamentınıñ baş belgeçe Azat Axtareev ta, İntertat elektron gäciteneñ citäkçelege dä kilmäde. Anıñ qarawı tatar internetınıñ kiläçäge xaqında söyläşüdä Mäskäwdän kilgän belgeçlär qatnaştı. İnternet-texnologiälär üzäge ictimaği oyışması citäkçese Mark Tverdınin Rusiä töbäklärendä dönya çeltäreneñ üseşe, şuşı ölkädä kiläçäkkä farazlar belän urtaqlaştı, forumğa cıyılğannarnı Yaña çınbarlıq dip atalğan internet festival’ belän tanıştırdı. RU-CENTER kompaniäseneñ direktorı Aleksey Lesnikov Rus internetı, anıñ belän idärä itü xaqında söyläde, virtual’ çeltärgä bäyle mäxkämä eşlärenä tuqtaldı. Ul şulay uq küp kenä tatar internetçılarınıñ xıyalı bulğan berençe däräcäle domen – tat domenı, anı niçek alu turında da mäğlümät birde. Bu xaqta başqa süz ällä ni bulmadı forumda. Monnan tış Tatnet yoldızları bäygeseneñ oyıştıru komitetı citäkçese Aynur Sibğatullin bäyge turında tulıraq mäğlümät birde, anıñ qısalarında tatar internetın üsterergä telägän häm mömkinlege bulğan bar keşene cıyarğa kiräklege turında äytte. Tatar internetına qağılışlı başqa mäsällär dä qaraldı forumda.
Tänäfestä bez berniçä keşedän älege cıyılış, tatar internetınıñ kiläçäge turında soraştıq. İnformatika tatarça säxifäsen buldıruçı Rail Ğataullin fikerläre. Ul mondıy çaralarnı bik kiräk dip sanıy.
Mondıy çaranıñ yılğa ber genä ütüe bik az dip sanıym min. Çönki bu tarmaqta üzgäreşlär bik yış bulıp tora häm tatar internetçılarına da qalışırğa yaramıyTatarstanda 8 yıl däwamında eşläp, tatar internetın üsterügä üz öleşen dä kertüçe Warlook kompaniäseneñ citäkçese Marat Säyfiev tä tatar internetınıñ kiläçäge ömetli, digän fikerdä tora.
Min tatar internetınıñ kiläçäge global’, ul bar internetınıñ kiläçäge, dip äytä almıym, Bez barıbız da añlıybız, dönya çeltäre ber telgä tartıla häm kiläçäktä ul tel bulıp ingliz tele toraçaq. Läkin bersüzsez, tatar internetınıñ üz öleşe bulırğa tieş, çönki ul tatarlarnıñ aralaşu çarası. Bu iñ ğadi häm bügenge köndä iñ aldınğı ısul. Minemçä, İnternet ölkäsendä tatarlarnıñ kiläçäge bik äybät, başqalar belän çağıştırğanda bigräk tä Forumda cıyıluçılarnıñ qayberäwläre tatarça belmägängäme, ällä inde Mäskäw qunaqları bulğanğamı, tatar internetı turında söyläşü rus telendä bardı. Xäyer, bu berkemgä dä säyer dä toyılmadı kebek, çönki soñğı arada milli mäs’älälär xaqında söyläşü yış qına rus telendä bara.
Gölnaz İlgizär
