İndus Tahirov: Tatarstan belän federal’ üzäk arasında kileşü bulmasa, Rusiä federativ däwlät buluınnan tuqtıy

Programmabıznı däwam itäbez. Bu könnärdä respublikada yänä Tatarstan belän federal’ üzäk arasındağı wäkälätlärne büleşü turındağı kileşü xaqında söylänä. Uzğan comğada respublikanıñ Däwlät Şurası räise Färit Möxämmätşin jurnalistlar, kileşü inde äzer, federal’ üzäkneñ aña şikäyätläre yuq, tizdän kileşü Rusiä prezidentı tarafınnan imzalanırğa tieş dip belderde. Qayber mäğlümätlärgä qarağanda, elekkege kileşü belän çağıştırğanda, xäzerge dokument Tatarstanğa ällä ni östenleklär birmi. Härxäldä, finans yaqtan, salım tüläwdä. Şul uq waqıtta, kileşü respublikağa federal’ üzäk belän qayber iqtisadi, mädäni mäs’älälärne bergä xäl itärgä mömkinlek birä. Mäsälän, Tatarstan Rusiä xökümäte belän kileşü nigezendä çittäge tatarlarğa yärdäm itärgä, tatarstanlılar pasportına maxsus bit quyarğa, respublika prezidentınnan ike däwlät telen belüne taläp itärgä mömkinlek birä. Ägär dä kileşü imzalansa, Tatarstan şuşındıy kileşülärne yañadan buldırğan berençe Rusiä töbäge bulaçaq, di belgeçlär.

Älege problema xaqında xäbärdar, turıdan-turı şuşı kileşä mäs’äläse belän şöğellängän keşelär aña nindi mönäsäbättä tora? Bu xaqta bez ğalim, deputat İndus Tahirovtan soraştıq.

Minem älege kileşügä mönäsäbätem uñay.Çönki bez anı başlap yörüçelär buldıq. Döresen äytergä kiräk, yaña kileşüdä bez üzebezneñ kileşkännän şaqtıy çigendek, bez moña mäcbüri räweştä bardıq. Läkin bezgä bügenge köndä prinsip ähämiätleräk, kileşü prinsibın saqlap qalu. Ägär dä Rusiädä kileşü prinsibı yuğala ikän, ägär dä Rusiä Tatarstan belän kileşüsez yäşi başlıy ikän, dimäk Rusiä federativ däwlät buluınnan tuqtıy. Şuşı kileşü prinsibın başlap cibärep, keçkenä genä, ğorur Tatarstan Rusiäneñ federativ rel’slarğa bastıra aldı. Ägär dä bez şuşı kileşüne yuğaltabız ikän, bu oçraqta Tatarstan ğına tügel, Rusiä dä yuğalta

Bezgä tatarstan belän federal’ üzäk arasındağı kileşü xaqında üz fikerläre belän büleşkän ğalim, deputat, cämäğät eşleklese İndus Tahirov 24 mayda üzeneñ 70 yıllıq yubileyın bilgeläp ütte. Şuşı uñaydan çärşämbe könne Qazan däwlät universitetınıñ Ğilmi Şura utırışı uzdı. Anda Tahirovnı qotlarğa Tatarstan spikerı Färit Möxämmätşin dä kilde. Tantanada qatnaşuçılar tanılğan ğalim, bilgele cämäğät eşleklese, milli mänfäğätlärne yaqlawçı deputat İndus Tahirovnıñ fän, millät, respublika aldındağı qazanışları turında söyläde, yubilyarnı qotladı, matur teläklär teläde.

Gölnaz İlgizär