Böten Rusiä buylap Soñğı qıñğıraw bäyräme ğädättä 25 mayda ütä ide. Bıyıl isä, Rusiäneñ Fän häm mäğärif ministrlığı töbäklärneñ üzlärenä bu bäyrämneñ qayçan ütäçägen xäl itärgä mömkinlek birde. Läkin, iske ğädät buyınça, küplär mäktäpne tämamlawçılar öçen soñğı märtäbä qıñğırawnı 25 könne yañğırattı. Şul isäptän, Tatarstan da. Bıyıl respublikada mäktäpne 45 meñgä yaqın bala tämamlıy. Uzğan yıl belän çağıştırğanda alarnıñ sanı 5 meñ tiräse keşegä kimede. Qazanda isä 2006 yılda 11 klassnı 12 meñ tiräse uquçı tämamladı.
Awıl, şähärlärdä 25 may könne aq bantlar taqqan qızlar, bäyrämçä kiengän yegetlär küp buldı. Bu könne uquçılar distä yıldan artıq bergä uqığan klasstaşları, mäktäp, uqıtuçılar belän, ä alarnı uqıtqan ostazları – niçä yıllar belem birgän uquçıları belän sawbullaştı. Mäktäp qıñğırawı soñğı märtäbä yañğırağanda 11 yıl däwerendä bulğan barlıq üpkälär, küñelsezleklär onıtıladır moğaen. Şuña da, älege bäyrämdä bäxetle yözlär, yäş arasınnan bulsa da yılmayular ğına buldı.
Xäyer, bügen mäktäpne tämamlawçılar bu xaqta uylanmağandır. Alar mäktäptä uzğan yılların iskä töşerep, küñel açtı bügen. Başqa yıllardan ayırmalı bularaq bıyıl Qazanda berençe märtäbä böten mäktäpne tämamlawçılar üzlärendäge tantanalardan soñ, bergä cıyılıp, Soñğı qıñğırawnı uzdırdı. Çara şähärneñ Tatneft’ arena binasında ütte. Anda 12 meñgä yaqın keşe qatnaştı. Tantanada uquçılarnı Qazannıñ merı İlsur Metşin qotladı, yaxşı uqığan, maqtawğa layıq uquçılarğa büläklär tapşırıldı. Annarı yäşlär Mäskäwdän kilgän Diskoteka avariya törkeme belän bergäläp küñel açtı.
Gölnaz İlgizär
