Tatarstan soñğı yıllarda çit töbäklärdä yäşäwçe millättäşlärebezgä Sabantuy bäyrämen ütkärüdä yärdäm itep tora. Bäyräm çorı başlanıp aldınnan, anı oyıştıruçılarnı cıyıp, Sabantuynı ütkärü tärtipläre belän tanıştırıp seminarlar uzdıra, respublikadan sänğät ostaları, däräcäle qunaqlar cibärä. Bu inde ğädäti xälgä äylänep bara. Menä Törkiädä 3 yün könne uzaçaq Sabantuyğa da respublikadan qunaqlar cıyına. Şunısın da äytergä kiräk, bu yulı Törkiädä milli bäyrämebezdän tış, Ğabdulla Tuqaynıñ 120 yıllıq yubileyı dä bäyräm iteläçäk. Şuşı täqdim belän Tatarstannıñ Törkiädäge wäkilçelege çıqtı. 2 yün, comğa könne, Yosıf Aqçura, Ğayaz İsxaqıy, Sadri Maqsudilarnı iskä alu niätennän alarnıñ ziratlarına baru qaralğan. Şul uq könne Dcemal’ Räşit bäy isemendäge konsert zalında kürgäzmä häm konsert ütäçäk. 3 yündä isä Sabantuy çiratı citä. Ul ğädättägeçä İstambul yanında urnaşqan Belgrad urmannarında uzaçaq.
Şuşı çaralarda qatnaşırğa dip Qazannan 30 keşe barır, dip uylanılğan ide. Läkin soñğı könnärdä genä bu niät üzgärde. Säbäbe dä bik qızıq. Sabantuy qısalarında Törkiägä Başqortstan respublikası wäkilläre dä kilep, anda respublikanıñ sänğät häm mädäniät könnären ütkärergä teli. Alay ğına da tügel, monda äle Başqortstannıñ Rusiägä üz irege belän quşıluınıñ 450 yıllığın da bäyräm itärgä cıyınalar ikän. Mondıy täqdimne tatarstanlılarğa Başqortstannıñ Törkiädäge wäkilçelege yasağan, imeş. Tatarstanlılar, bik telämiçä genä, rizalaşqannar, dip xäbär itälär bezgä Törkiä tatarları. Şulay itep, Sabantuyğa cıyılğan millättäşlärebez, Törkiädäge Rusiäneñ ilçese, konsulı qatnaşlığında kürşelärebez üzläreneñ bäyrämen dä bilgeläp ütärgä cıyına. Moña Törkiädä yäşäwçe tatarlarnıñ mönäsäbäte nindi soñ? Şuşı xaqta bez ğalim Nadir Däwlättän soraştıq.
Başqort törkemeneñ Sabantuy waqıtında Rusiäneñ räsmi wäkilläre arasında Başqortstannıñ Rusiägä üz irege belän quşıluın iskä aluı borçıy. Törkiädä yäşäwçe tatar-başqortlarğa üz irege belän doşmanğa quşılu waqiğası bik säyer toyıla, monıñ dönyada başqa ürnäge barmı ikän digän sorawlar tudıra. Tuqaynıñ 120 yıllığı, Başqortstannıñ Rusiägä quşıluınıñ 450 yıllığı qarşı quyılaçaq kebek Törkiä Sabantuyında. Çit ildäge tatarlar monı añlıy almıylarNadir Däwlät Törkiädäge Sabantuy waqıtında Başqortstannıñ Rusiägä üz irege belän quşıluınıñ 450 yıllığın bäyräm itärgä cıyınuına andağı millättäşlärebezneñ mönäsäbäten belderde.
Başqortstannan Törkiädäge Sabantuyda, döresräge quşılunıñ yubileyın bäyräm itüdä qatnaşırğa 100dän artıq keşe kilergä cıyına. Alar arasında räsmi wäkillär, cırçılar, biüçelär bulaçaq. Tatarstanlılar da qalışmasqa buldılar. Soñğı mäğlümätlär buyınça Törkiägä respublikadan 130 keşe cıyına ikän. Xäyer, Mädäniät ministrınıñ urınbasarı Ayrat Cabbarov süzlärenä qarağanda, älegä finans mäs’älälär xäl itelep betmägän. Läkin keşelär inde äzer, ä premyer-ministr Röstäm Miñnexanov alarğa Törkiägä barırğa xätta ayırım ber oçqıç ta wäğdä itkän ikän.
Gölnaz İlgizär
