12 yündä bäyräm itelä torğan Rusiä könen Tatarstanda ällä ni zurlap bilgeläp ütmädelär. Härxäldä, Qazan uramnarında nindi dä bulsa tantanalı çaralar uzmadı, ğomumän, xalıqnıñ küpçelege 3 kön yal bulu säbäple bu könnärne Qazanda tügel, ä şähärdän çittä ütkärde. Citäkçelekkä kilsäk, respublikanıñ Däwlät Şurası räise Färit Möxämmätşin tatarstanlılarnı Rusiä köne belän qotladı.
Tatarstan Respublikası häm anıñ küpmillätle xalqı Rusiäneñ demokratik nigezlären nığıtuğa zur öleş kertä. Bez federalizm prinsipların qatğıy häm ezlekle räweştä yaqlap kiläbez. Böten cämğiätneñ tırışlıqların berläşterü, härberebezneñ fidaqär xezmäte nigezendä genä aldıbızğa quyılğan burıçlarğa ireşergä mömkin dip uylıym. Bergäläp bez Rusiä Federatsiäsen çäçäk atuçı häm böyek il itä alabız, dip äytelä älege qotlawda.
Xäyer, 12 yün Rusiäneñ suverenitetı iğlan itelgän kön bularaq kenä bilgele tügel. Tatarstannıñ tarixında da bu kön şaqtıy istälekle. 1991 yılnıñ 12 yünendä Rusiä prezidentı Boris El’tsin saylanğanda, respublika älege saylawlarda qatnaşmadı. Läkin şul uq könne Tatarstan prezidentı Mintimer Şäymiev tä saylandı. 15 yıl elek Tatarstan respublikasında Rusiä prezidentın saylatmas öçen Fäwziä Bäyrämova häm anıñ belän ber törkem tatar milli xäräkäte wäkile açlıq ta iğlan itte. Älege waqiğalar anda qatnaşuçılar istälegendä niçek qalğan soñ, 15 yıldan soñ alarnıñ tä’sirläre nindi? Xäzer bu xaqta Fäwziä Bäyrämovanıñ fikerlären tıñlağız.
12 yün minem öçen bäyräm tügel ul. Läkin şul uq waqıtta bu şundıy istälekle waqiğalar belän bäylängän Tatarstan öçen dä, şäxsän minem üzem öçen dä. Çönki monnan 15 yıl elek may ayında min açlıq iğlan itkän idem, Rusiä prezidentı Tatarstanda saylanmasın dip. Miña ber törkem milli xäräkät wäkilläre dä quşıldı. Bu bezneñ ciñü belän tämamlandı. 28 may könne Tatarstannıñ Yuğarı Sovetı respublikada Rusiä prezidentı saylawları räsmi räweştä ütkärelmi digän qarar qabul itte. Şulay itep, 12 yün könne Tatarstan häm Rusiä prezidentları saylandıYazuçı, İttifaq tatar milli bäysezlek firkäse räise Fäwziä Bäyrämova fikerençä, xäzerge köndä ul waqıtta yawlağannardan bik zur çigenülär bara.
Gölnaz İlgizär
