Respublika mäktäpläre häm balalar baqçalarında bu könnärdä eş qızğan waqıt. Uqıtuçılar, citäkçelär yaña uqu yılına äzerlänä – aqça citkän xätle mäktäplärne tözekländerä, däresleklär, metodik äsbaplar yünältä, başqa kiräk-yaraqlarnı äzerli, uqıtuçılar, uquçılarnı tuplıy. Mäğärif tarmağında finanslaw ällä ni küp bulmasa da, bıyıl tatarstanda berniçä yaña mäktäp häm balalar baqçaları da açılaçaq. Şularnıñ ber öleşe tatar telle dä bulaçaq ikän. Bu xaqta respublika mäğärif xezmätkärläreneñ uzğan atna azağında ütkän avgust kiñäşmäsendä Fän häm mäğärif ministrı Räis Şäyxlislamov söyläde. Anıñ süzlärenä qarağanda, respublikanıñ Ägerce, Balıq Bistäse, Bazarlı Matak, Yänä çişmä rayonnarında tatar gimnaziäläre eşli başlayaçaq. 8 tatar telendä tärbiä eşen alıp bara torğan balalar baqçaları da açılaçaq. Anda Mamadış, Balıq bistäse, Norlat, Aqsubay, Yaña çişmä rayonnarında yäşäwçe balalar tärbiälänäçäk. İsegezgä töşeräm, bu xaqta ministr Täteştä ütkän avgust kiñäşmäsendä äytte.
Ğomumän, üz çığışında Räis Şäyxlislamov milli mäğärif temasın çitlätep uzmadı. Anıñ ähämiäte häm ruxi, intellektual’ baylıq bulın iskärtep, ministr, bez respublikada milli mäğärifneñ yazmışı öçen cawaplı, dip belderde. Şuşı cawaplılıqnı toyıp, ul kiläçäktä Tatarstanda milli mäğärifneñ tağın da üstereläçägenä ışanıç belderde. Şuşı yünäleştäge ğämällär arasında mäktäplärdä tatar telenä uqıtunıñ yañaça ısulın kertü bar. Älege eksperiment 2005 yılnıñ 1 sentäberennän kertelde häm xäzerge waqıtta respublikanıñ 86 mäktäbendä däwam itä. Şulay uq, Fän häm mäğärif ministrlığı mäğlümätlärenä qarağanda, Tatarstannıñ berniçä rayonında milli mäğärifne üsterügä bağışlanğan maxsus programmalar qabul itelgän. Älege programmalar qısalarında awıl-rayonnarda närsä eşlänäçäge turında tulıraq mäğlümät alır öçen bez ministrlıq xezmätkärlärenä möräcäğät ittek. Läkin niçek kenä tırışsaq ta, bu xaqta bezgä söylärgä teläwçelärne taba almadıq.
Qazanda da kiläse uqu yılına bik tırışıp cıyınalar. İnde xäbär itelgänçä, bıyıl mäktäplärne häm balalar baqçaların tözekländerügä şähär xakimiäte uzğan yıllardağığa qarağanda, aqçanı kübräk bülep birgän. Barısı bıyılğı cäydä 100dän artıq mäğärif oyışmasında remont eşläre ütkärelergä tieş. Qazannıñ Mäğärif idäräse citäkçese İldar Ğäliäxmätov mäğlümätlärenä qarağanda, şularnıñ yartısında tözekländerü bara, 33dä eşlär inde tämamlanğan, ä qalğannarında – äle başlanmağan da. Bıyıl Tatarstan başqalasında 3 yaña mäktäp açılaçaq. Alarda xäzer eşlär tämamlanıp kilä, kiläse atnadan bu uqu yortların cihazlandıru başlanaçaq ikän. Bu xaqta İldar Gäliäxmätov şähär xakimiäte citäkçelege aldında söyläde. Qazan başlığı İlsur Metşin älege xisapnı tıñlap, mäğärif oyışmaların tözekländerü eşlären sıyfatlıraq häm tizräk alıp barırğa kiräklegen äytte. Kiläse atnadan şähär mäktäpläreneñ yaña uqu yılına äzerlegen tikşerä torğan Qabul itü komissiäse eşli başlayaçaq. Anıñ qısalarında tözekländerü eşlären genä tikşerü tügel, ä yanğınğa qarşı iminlek, sanitar-epidimioligiä xezmätkärläre wäkilläre dä üzlärenä qarağan ölkädä wazğiät niçek bulğanın tikşeräçäk.
Gölnaz İlgizär
