Түбән Камада медицина хезмәткәләрен эш хакларын кисеп изоляция вакытында ял алырга мәҗбүр итәләр
Түбән Камада "Перинаталь үзәкле балалар шәһәр хастаханәсе" җитәкчелеге эшчеләрне хезмәт хакы саклану шарты белән изоляциягә җибәрүдән баш тарта һәм үз теләкләре белән ялга киту яки административ ялу алу турында гариза язмаган очракта алар ризалыгыннан башка инфекцион хастаханәгә җибәрү белән яный. Бу хакта "Idel.Реалии"га медицина оешмасының дәвалау физкультурасы инструкторы Наталья Москвина сөйләде. Махсус киемне дә хастаханә хезмәткәрләре үзләре тегәргә яки үз акчасына сатып алырга мәҗбүр.
Хезмәт килешүе нигезендә медицина хезмәткәрләренең төп үз белгечлегенә караган эшләре булмаган вакытта җитәкчелек аларны бер айга кадәр теләсә нинди башка эшкә җибәрә ала.
Уфадагы республика клиник хастаханәсен коронавирус очраклары кинәт артып китү сәбәпле яптылар
Уфада 6 апрельдән Куватов исемендәге Республика клиник хастаханәсе коронавирус таралу ихтималы сәбәпле ябылды. Башинформ хәбәр иткәнчә, хастаханәнең биш хезмәткәре һәм ике пациентына үпкә ялкынсынуы дигән диагноз куелган. Аларны йогышлы авырулар хастаханәсенә коронавируска тикшерелергә җибәргәннәр. Хастаханәнең калган хезмәткәрләре элекке режимда эшләвен дәвам итәчәк. Хастаханәнең барлык бүлекләрендә дә дезинфекция уздырылган. Республика клиник хастаханәсе әлегә яңа пациентларны кабул итми диелә.
Активист Татарстан хөкүмәтенең "үзизоляция режимы" карарын республика югары мәхкәмәсенә биргән
Казан активитсы Рушан Кәбиров Татарстан премьер-министры Алексей Песошинны һәм республика хөкүмәтен Татарстан югары мәхкәмәсенә биргән. Кәбиров сәбәпсез өйдән чыгуны тыю карарын һәм “үзизоляция режимын” үтәүне таләп итү канунсыз дип тануны сорый.
Мәхкәмә Кәбиров шикаятен кабул итеп алган. Кәбиров хөкүмәтнең “Татарстан республикасында яңа коронавируска каршы чаралар турында” 208нче санлы карарына үзгәрешләрне гамәлдән чыгаруны сорый. Сүз карарның бишенче пунктын үзгәртү турында бара.
Әлеге үзгәреш яшәү яки вакытлы тору урыныннан чыгуны (медицина ярдәме кирәк булган очракны, чүп чыгаруны, дару яки азык-төлек алырга баруны исәпкә алмаганда) тыя, физик ара калдыруны һәм чит илдән кайтканнардан өйдән бөтенләй чыкмауны таләп итә. Кәбиров хөкүмәтнең әлеге карары канунсыз һәм шул сәбәпле үзенең конституциядә язылган ирекле хәрәкәт итү хокукларын боза дип саный.
Мишустин Русия төбәкләренә чикләрен ябуны тыйды
Русия хөкүмәте җитәкчесе Михаил Мишустин төбәкләрнең вице-премьерлары белән киңәшмәдә кайбер төбәк башлыкларының төбәк чикләрен коронавирус пандемиясе сәбәпле ябып куюын тәнкыйтьләгән. Мондый адымнарга юл куярга ярамый дип белдергән Мишустин. Бу турыда Коммерсантъ яза.
“Узган атнада кайбер төбәкләр җитәкчелегенең административ чикләрне ябу очраклары булды, алар шул рәвешле кешеләр һәм транспорт керүгә киртә куйды. Хөкүмәтнең мондый чаралар кулланырга ярамавы турында сигналларын төбәкләр ишетте”, дигән Мишустин.
Миңнеханов гадәттән тыш хәл тәртибен бозучыларны җәзалаячак оешмаларны билгеләде
Татарстан президенты Рөстәм Миңнеханов гадәттән тыш хәл вакытында яки ул килеп чыгу куркынычы булган вакытта тәртип кагыйдәләрен бозучыларга беркетмә тутыру хокукы булган хезмәткәрләр исемлеген киңәйтте.
Татарстанның 12 дәүләт оешмасына административ тәртип бозулар кодексының 20.6.1 маддәсе нигезендә ватандашларга штраф салу вәкләте бирелде. Бу маддә гадәттән тыш хәл вакытында яки ул килеп чыгу куркынычы булган вакытта тәртип кагыйдәләрен бозучыларны җавапка тартуны күздә тота.
Әлеге оешмалар исемлегенә экология һәм табигать байлыклары министрлыгы, гадәттән тыш хәлләр министрлыгы, транспорт, урман хуҗалыгы, хезмәт министрлыклары, тарифлар буенча дәүләт комитеты, биологик ресурслар дәүләт комитеты, дәүләт торак инспекциясе, үзйөрешле машиналарның техник торышын күзәтүче инспекция һәм мәдәни мирас объектларын саклау комитеты кертелде.
Русия хөкүмәте медицина битлекләре сатуга чикләүләр кертә
Русиядә медицина битлекләре һәм коронавируска каршы көрәштә кулланыла торган башка кайбер әйберләр сатуга чикләүләр кертелде. Хөкүмәт сайтында урнаштырылган документка караганда, медицина белән бәйле кайбер таварлар сату тәртибе үзгәрә. Әлеге исемлектә медицина битлекләре, респираторлар, медицина бармакчалары, марля, медицина саклану киемнәре дә бар.
Бу таварларны махсус лицензиясе булмаган кибетләрдә сату тыела, ә даруханәләрдә һәм лицензиясе булган оешмаларда сату бәясен 10 тиеннән дә күбрәккә арттырырга ярамаячак. Күпләп сату-алуда да бәяне 10 проценттан күбрәк арттырырга ярамаячак.
Март ахырында Татарстан даруханәләре медицина битлекләре белән тәэмир ителмәгәндә Татарстан Дәүләт шурасындагы “Бердәм Русия” депутаты Мөслимә Латипованың “Бәхетле” киберләрендә андый битлекләрнең бер данәсен 70 сумнан саттылар. Русия монополиягә каршы идарәсе белдерүенчә, башка кайбер төбәкләрдә ул битлекләр 6 сумнан сатылган булган.
Рамзан Кадыров изоляция тәртибен бозган кешене кыйнауны хуплады
Чечня башлыгы Рамзан Кадыров хакимият игълан иткән “үзизоляция режимын” бозган кешегә суккан тәртип саклау хезмәткәрен бүләкләргә вәгъдә итте. Моны ул Instagram аша күрсәтелгән туры эфирда белдерде. Ул видеоның бер өлешен “Грозны” телеканалы чыгарды.
Кадыров әйтүенчә, тәртип саклау хезмәткәренең бу гамәле башта аңа ошамаган булса, соңрак ул аны бүләкләргә карар иткән. “Миңа меңне җирләүгә караганда, берәүгә сугу яхшырак. Кирәк кешене күсәк белән кыйнаячакмын. Кирәк кешене төрмәгә, базга утыртачакмын, әмма үз халкымны яклаячакмын”, ди Кадыров.
Аргун шәһәрендә яшәүче кешене тәртип саклаучылар типкәләве төшерелгән видео интернетта 4 апрельдә таралган иде, соңрак ул видео юкка чыкты.
6 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Әкият курчак театры артистлары Instagram-да туры эфирда татар әкиятләре укуны дәвам итә. Бүген театр актрисасы Албина Шаһалиева "Ил гизүче бака" һәм "Тавыш алмаштыруның аянычлы нәтиҗәләре" әкиятләрен укый. Башлану вакыты - 18:00
“Безнең Татарстан” #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген "Голос. Дети" проекты финалисты Сәйдә Мөхәммәтҗанова чыгыш ясый. Вакыты - 19:00
Шулай ук бүген интернетта Әтнә татар театрының балалар өчен "Бәби театр" һәм "Алтын битлек" театр премиясенең "Маска+" фестивалендә катнашкан "Фронтовичка" спектаклен карап булачак. Моның өчен театрның сайтында теркәлергә кирәк. Теркәлү узганда билет өчен түләнә – "Бәби театр" 30 сум, "Фронтовичка" – 70 сум тора. Билет алучыга спектакльне карау өчен сылтама килә. Әтнә театрының бу спектаклләрен 12 нче апрельга хәтле карап була
Буа татар театры "Концлагерьчылар" спектаклен тәкъдим итә.
Бүген Уфаның "Нур" татар театры балалар өчен "Нурлы әкият" исемле яңа онлайн-проект башлап җибәрә. Театры актрисасы, балалар театр-студиясе җитәкчесе Ленария Хаҗиева татар һәм урыс телләрендә әкиятләр укый. Ул Казан вакыты белән 19:00дә башлана.
Туймазы татар драма театры "Тукай белән очрашу" һәм "Колбаса" спектакльләрен тәкъдим итә.