Татарстанда COVID-19 тагын 9 кешедә рәсман теркәлгән
Соңгы тәүлектә Русиядә вирус йоктыруның яңа 1459 очрагы ачыкланган, 13 кеше үлгән. Бу саннарны Русиянең коронавируска каршы көрәш оператив штабы китерә.
Мәскәүдә 857 яңа очрак ачыкланган. Мәскәү өлкәсендә – 199, Петербурда – 44, Брянски өлкәсендә 40 очрак теркәлгән.
Татарстанда соңгы тәүлектә 9 яңа очрак. Шулай итеп, COVID-19 диагнозы куелган кешеләр саны республикада 50гә җитте. Шуларның унысы савыгып, хастаханәдән чыккан диелә.
Башкортстанда – 6 яңа очрак. Башкортстан башлыгы Радий Хәбиров республикада барлыгы 22 расланган очрак булганын хәбәр итте.
9 апрель иртәсенә Русиядә коронавирус йоктыручыларның рәсми саны 10 131гә җитте. Авыру тарала башлаганнан бирле барлыгы 76 кеше үлде.
9 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Кариев исемендәге яшь тамашачы театр репертуарындагы иң яхшы балалар спектакльләренең видеоверсияләрен тәкъдим итә. Шушы көннәрдә "Кәҗүл читек", "Йомрыбаш" һәм соңгы премьераларның берсе, "Тантана" театраль премиясенең "Балалар өчен иң яхшы спектакль" номинациясе җиңүчесе — "Хикмәт әкиятләре" спектакльләрен карап була. Спектакльләрнең бәясе театр билеты бәясенә тиң. Спектакльләр урысча субтитрлар белән күрсәтелә. Live-спектакльләргә билет алу өчен шушы сылтама аша теркәлеп түләү кирәк. 1 спектакль – 200 сум, бер юлы өч спектакль ташлама белән – 450 сум. Билет сатып алганнан соң электрон адреска килгән сылтама (логин һәм серсүз) аша спектакль карап була. Әлеге сылтама 30 апрельгә кадәр актив булачак, ягъни апрель ахырына кадәр теләгән вакытта кереп, спектакль карарга мөмкин булачак.
Театрның YouТube каналында архив спектакльләрен (билгеле вакытта) бушка карарга мөмкин.
Кариев исемендәге яшь тамашачы театры шулай үк "Тылсым" проекты кысаларында татар әкиятләре укуын дәвам итә. Бүген "Ай кызы Зөһрә" әкиятен автор, шагыйрә Йолдыз Миңнуллина үзе укый.
“Безнең Татарстан” #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген "GAUGA" татар рок төркеменең концерты узачак. Башлану вакыты – 19:00
Интернетта Әтнә татар театрының балалар өчен "Бәби театр", "Гүзәлем Әсәл" һәм "Югалган көн" спектакльләрен, шулай ук "Алтын битлек" театр премиясенең "Маска+" фестивалендә катнашкан "Фронтовичка"ны карап булачак. Моның өчен театрның сайтында теркәлергә кирәк. Теркәлү узганда билет өчен түлисе – "Бәби театр" 30 сум, калганнары – 70 сум тора. Билет алучыга спектакльне карау өчен сылтама килә.
Әкият курчак театры артистлары Instagram челтәрендә туры эфирда татар әкиятләре укуны дәвам итә. Бүген театр актрисасы Албина Шаһалиева "Карга ни өчен исемен әйтеп бетерми?" башкорт халык әкиятен һәм Разил Вәлиевнең "Ил гизүче бака" әкиятләрен укый. Вакыты – 18:00
Уфаның "Нур2 татар театры балалар өчен "Нурлы әкият" исемле онлайн проектын дәвам итә. Театр актрисасы, балалар театр-студиясе җитәкчесе Ленария Хаҗиева Youtube-та татар һәм урыс телләрендә әкиятләр укыячак. Казан вакыты белән 19:00дә башлана.
Камал татар театры да онлайн рәвештә репертуардагы спектакльләрен күрсәтә башлады. Трансляцияләр театрның рәсми сайтында үтә. Карау бәясен тамашачы үзе билгели. Бүген "Мәңгелек буран" спектаклен карап булачак. Вакыты – 19:00
https://kamalteatr.ru/poster/
Татарстанның җыр һәм бию дәүләт ансамбленең 2007 елда төшерелгән Беренче татар этно-мюзиклын карап була.
Буа татар сатира театры Раил Садриевның "Сез әле мине белмисез" исемле моноспектаклен тәкъдим итә.
Тинчурин исемендәге татар театры "Төн яна учакта" спектаклен тәкъдим итә. Вакыты – 18:30
Хәбиров коронавируска каршы яңа чикләүләр кертә
Башкортстан башлыгы Радий Хәбиров коронавирус таралуга каршы яңа чаралар игълан итте.
Өлкән кешеләр (65+) өчен комендант вакыты кертелә. Алар кичке сәгать 18:00дән иртәнге 10:00гә кадәр урамда, җәмәгать урыннарында булмаска тиеш.
Балалар кичке 18:00дән көндезге 13:00гә кадәр өйдә булырга тиеш.
Мәскәүдән кайткан кешеләр барысы да тест бирергә һәм 14 көн өйдә изоляция режимын үтәргә тиеш.
Коронавирус белән авыручылар саны Башкортстанда 22 кешегә җитте. Радий Хәбиров, коронавирус тарала бара дигәндә, Республика клиник хастаханәсен һәм Сибайны телгә алды.
“Күпчелек предприятиеләр эшли башлаячак, әмма изоляция шартлары катгыйланачак, штраф салганда берсен дә кызганмаячакбыз”, диде Радий Хәбиров.
9 апрельгә төп хәбәрләр:
- Дөньяда COVID-19 табылган кешеләр саны 1 миллион 484 меңгә җиткән. 88 мең кеше үлгән, 329 мең кеше савыккан.
- Русиядә 9 апрель иртәсенә коронавируска бер миллионнан күбрәк тест ясалган. Моның хакта Роспотребнадзор матбугат хезмәте хәбәр итә. Медицина күзәтүендә 171 мең кеше кала.
- АКШ күзләү идарәсе Кытайда барлыкка килгән яңа төр коронавирус турында мәгълүматны әле 2019 елның ноябрендә җыя башлаган. Шуннан соң хәзерге вакытта АКШта киң таралган вирустан саклану, аны кисәтү тәкъдимнәре дә булган.
- Халыкара һава транспорты оешмасы (IATA) сәяхәтләр кимү сәбәпле 25 млн кеше эшсез кала алачак дип кисәтте. Оешмада һава ширкәтләренең финанслары тотрыклы булмавы, юлчыларга сәфәр өчен акча кайтара алмауларын белдерделәр.
- Netflix COVID-19 пандемиясе вакытында борчылулардан котылу турында атналык шоу башлап җибәрә. Ул Instagram-да күрсәтеләчәк, аны популяр сериаллар актерлары алып барачак. Алып баручылар психологлар белән сөйләшәчәк.
Русиядә бөтен хосусый лабораторияләргә COVID-19 тестлары ясарга рөхсәт ителде
Русия хөкүмәте җитәкчесе Михаил Мишустин илдәге бөтен дәүләти һәм хосусый лабораторияләргә коронавирустан тестлар ясарга рөхсәт бирде. Бу турыда карар хөкүмәтнең рәсми сайтында дөнья күрде.
Мишустин бу карарны “һәр кеше сәламәтлеген тикшереп карарга мөмкинлек алсын өчен” кабул ителүен белдерә.
Рәсми саннарга караганда, Русиядә коронавируска 800 меңгә якын тест уздырылган. Тестлар саны ягыннан Русия дөньяда беренче өчлектә дигән премьер.
Икътисад югары мәктәбе уздырган тикшеренү ачыклаганча, русияләр хакимият COVID-19 вирусы таралуга бәйле саннарны киметеп күрсәтә дип саный. Бу турыда Коммерсантъ яза. Сораштыру 4-5 апрельдә уздырылган, 3 меңнән артык кеше катнашкан.
Сораштыру: русияләрнең яртысы коронавирус турында рәсми саннарга ышанмый
Респондентларның күпчелеге коронавирусны шактый куркыныч әйбер дип саный. Март белән чагыштырганда, хәлнең җитди булуын күбрәк кеше таный башлаган. Бары 10 проценты гына эпидемияне “уйдырма” дип атаган.
Респондентларның 53 проценты изоляция тәртибен вируска каршы көрәштә нәтиҗәле чара дип санавын әйткән. Хакимият карарларын җитәрлек дәрәҗәдә кырыс дип санаучылар белән бу чараларны тагын да кырыслатырга кирәк дип уйлаучылар саны якынча бертигез.
Респондентларның 36 проценты Русия медицина системы эпидемияне җиңү өчен җитәрлек дәрәҗәдә әзерлекле түгел дип борчыла.
Күпчелек эпидемия аркасында керемнәре кимүен әйткән. Бик зур өлеше керемнәрен югалткан ватандашларга финанс ярдәме күрсәтелергә тиеш дигән.
Башкортстанда тагын берничә хастаханә карантинга ябылды
Башкортстанның Октябрьски шәһәре 1нче санлы хастаханәсендә ике бүлек карантинга ябылган. Шулай ук Бәләбәй үзәк хастаханәсе, Бөре шәһәре хастаханәсенең хирургия һәм терапия бүлекләре карантинда. Бу турыда Башкортстан сәламәтлек саклау министрлыгының киңәшмәсендә төбәк Роспотребназдор башлыгы вазифаларын башкаручы Венер Изикаев хәбәр итте.
Хастаханәләрдә савыккан авыруларны чыгару һәм яңаларын кабул итү туктатылган. Бөтен хастаханәләрдә эпидемиягә каршы чаралар күрелә, бүлмәләр дезинфекцияләнә, коронавируска тест ясау өчен биологик материал алына.
Башкортстанның Республика клиник хастаханәсенең бала тудыру йорты да карантинда. Яңа пациентлар кабул ителми, өенә кайтарып җибәрелергә тиеш булганнары планлы рәвештә хастаханәдән чыгарыла. Башкортстан сәламәтлек саклау министры сүзләренчә, бала тудыру йорты дүшәмбедән бирле карантинда.
8 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Кариев исемендәге яшь тамашачы театры Youtube-та "Кәҗүл читек" спектаклен күрсәтә. Башлану вакыты – 19:00
Әкият курчак театры артистлары Instagram челтәрендә туры эфирда татар әкиятләре укуны дәвам итә. Вакыты – 18:00
“Безнең Татарстан” #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген "Djinn City" этно-поп-дуэтның концерты узачак. Егетләр төрле татар авылларына йөреп, җирле фольклор үрнәкләрен җыеп, аларны заманчарак көйгә салып, башкара. Вакыты – 19:00
Уфаның "Нур" татар театры балалар өчен "Нурлы әкият" исемле онлайн-проектын дәвам итә. Театр актрисасы, балалар театр-студиясе җитәкчесе Ленария Хаҗиева татар һәм урыс телләрендә әкиятләр укыячак. Казан вакыты белән 19:00дә башлана.
Бүгеннән башлап Камал татар театры да репертуардагы спектакльләрен онлайн рәвештә күрсәтә башлый. Трансляцияләр афишасы популяр комедияләрдән, классик спектакльләрдән һәм фестивальләрдә катнашкан һитлардан тора. Тамашалар театрның рәсми сайтында үтәчәк. Карау бәясен тамашачы үзе билгели. Спектакльләрне компьютер, телефон һәм Smart TV технологияле телевизорлар аша да карарга мөмкин.
Бүген "Мәхәббәт FM" спектаклен карап булачак. Вакыты – 19:00
Туймазы татар драма театры үз спектакльләренең язмаларын чыгаруын дәвам итә.
Татарстанның җыр һәм бию дәүләт ансамбле дә үз YouТube каналын булдырган. Анда ансамбльнең 80 еллык юбилеена багышланган концерты чыкты.
Шулай ук 1967 елда төшерелгән "Туй" музыкаль спектаклен карап була.