Кырымда "үзизоляция тәртибен" бозучыларга җәзалар күләме билгеләнде
Бу хакта коронавируска каршы оператив штабы утырышында хәбәр ителде.
Физик затларга җәзаның күләме – 4 мең сум, тәртипне кабат бозучыларга – 5 мең, шәхси машинада йөреп тәртипне бозучыларга – 5 мең сум җаза яный.
Тәртипне бозган рәсми затларга – 30-40 мең сум, тәртипне кабат бозучыларга – 40-50 мең сум күләмендә җәза яный. Юридик затларга – 200-300-500 мең сум күләмендә җәзалар каралган.
Бу хакта канун өлгесен Кырым дәүләт шурасы бүген беренче укылышта кабул итте. Бу ял көннәрендә канунны инде гамәлгә дә кертмәкчеләр.
Соңгы мәгълүматларга күрә Кырымда коронавирус йоктыручылар саны – 28, Акъярда – 6 кеше.
Русия кибетләрендә ризык бәяләре 15-50 процентка артырга мөмкин
Русиядә якын көннәрдә азык-төлек кыйммәтләнергә мөмкин. Бу турыда Ваклап сатучы ширкәтләр берлеге (АКОРТ) белдерә. Оешма чыгарган хәбәрдә язылганча, коронавирус аркасында күп санлы ширкәтләрнең эшләмәве, халыкта акча булмавы, сату кимүе, рубль бәясе төшүе һәм башка сәбәпләр нәтиҗәсендә Русиядә кибетләрдә азык-төлеккә бәяләр арту көтелә. Эре ритейлерларга продукция китереп торучы ширкәтләр бәяләрнең 5-15 проценка үсәчәге турында кисәткән. Кайбер төр тауарлар 20, 30 һәм 50 процентка кадәр кыйммәтләнәчәк диелә хәбәрдә.
“Арзанрак бәягә алынган продукция сатылып бетә барган саен, кыйммәтрәк бәяле тауар сатуга күчәргә туры киләчәк, киштәләрдәге тауарлар бәяләре дә акрынлап үсәчәк”, дип белдерә ритейлерлар.
9 апрельдә “Бердәм Русия” фиркасе кайбер ризыкларга һәм көндәлек куллану тауарларына бәяләрне “туңдырып” куярга тәкъдим итте. Премьер-министр Михаил Мишустин моны хуплады. Әмма АКОРТ вәкилләре болай эшләү әлеге тауарларның дефицитына китерәчәк дип кисәтә.
Башкортстанда Мәләүез шәһәре хастаханәсе карантинга ябылган
Башкортстанда Мәләүез шәһәре хастаханәсе карантинга ябылган. Бу турыда Башкортстан сәламәтлек саклау министрлыгы киңәшмәсендә Роспотребназдорның республика бүлеге башлыгы вазифаларын башкаручы Венер Изикәев хәбәр итте. 9 апрельдә Мәләвез шәһәре хастаханәсендә үлгән бер авыруның анализлары анда коронавирус булуын күрсәткән иде, үлемнең сәбәбе коронавирус түгел, бу кеше яман шештән интеккән диелде.
Бүген шулай үк кайбер мәгълүмат чаралары, Уфаның онкология хастахәнәсе дә карантинга ябылды дигән хәбәрләр тараткан идее. Әмма Изикәев белдергәнчә, Уфа шәһәренең онкодиспансеры карантинга ябылу хакында хәбәрләр дөреслеккә туры килми. Чыннан да, яман шештән дәваланучы авыруларның берсе коронавирус булуда шикләнелә, ләкин ул йогышлы авырулар хастаханәсенә озатылды, онкология хастаханәсен япмаска карар ителде диде Изикәев.
Башкортстанда табиблар һәм юристлар РКБдагы хәлләр турында прокуратурага шикаять әзерли
Башкортстаннан юрист Тимур Уразмәтов Уфадагы Куватов исемендәге республика клиник хастаханәсе табибларының оешмада коронавирус таралу очрагы сәбәпле прокуратурага мөрәҗәгать итәчәген белдерә.
Уразмәтов үзенең Куватов хастаханәсе табибы Римма Камалованың улы булуын яза. Ревматология бүлеге мөдире Камалова 9 апрельдә Эхо Москвы радиосында һәм Idel.Реалиига хастаханәдә коронавирус таралу очрагы турында сөйләгән иде.
Уразмәтов Куватов хастаханәсенең коронавирус учагы булып китүен “коточкыч ахмаклык, җавапсызлык” дип атаган. Ул кешеләрне куркыныч астына куйган бу хәлләрнең килеп чыгуы өчен Башкортстан сәламәтлек саклау министры Максим Забелин һәм аның такымын, шул исәптән хастаханәнең баш табибы Эльза Сыртланованы гаепли.
Юрист сүзләренчә, Куватов исемендәге хастаханәдә респиратор авырулар саны арта барса да, ул очракларга “хастаханәдән читтә башланган үпкә ялкынсынуы” дип диагноз куйганнар, COVID-19 тесты ясаудан баш тарканнар. Табиблар авыруларны кабул итүдән туктарга сораса да, җитәкчелек, хастаханә керемнәре кимүдән куркып, моны эшләмәгән. Табибларга шәхси саклану чаралары (битлекләр, саклану киемнәре) бирелмәгән.
Уразмәтов хастаханәдә чынлыкта 9 гына түгел, күбрәк кеше кронавирус белән авырый дип яза. “Кичә ревматология бүлегеннән коронавируслы 23 пациент чыгарылды, нейрохирургия бүлегеннән 18 кеше, башка бүлекләрдә дә шул чама. Ягъни авырулар арасында коронавирус йоктыру очраклары йөзләгән, ә табиблар арасында – дистәләгән. Бу бит алдан язылып килгән кешеләр, алар ниндидер чирләрен табибка күрсәтергә теләгән, һәм хастаханә җитәкчелеге җавапсызлыгы аркасында коронавирус йоктырган”, дип яза Уразмәтов. Әлеге хәл турында тулырак мәгъүматны биредә укый аласыз.
Һелсинки мәчетеннән онлайн җомга намазы. Вәгазьне Финляндиянең татар мәхәлләсе имамы Рамил Беляев укый.
Башкортстанның коронавирус сәбәпле карантинга ябылган Республика клиник хастаханәсендә алынган 170 анализ икенче мәртәбә тикшерү өчен җибәрелгән. Бу турыда Башкортстан сәламәтлек саклау министрлыгының киңәшмәсендә республика сәламәтлек саклау министры Максиим Забелин әйтте. Ул моны элегрәк алынган анализ нәтиҗәләренең объективлыгын ачыклау зарурлыгы белән аңлатты.
9 апрельдә Башкортстан башлыгы Радий Хәбиров 50 кешенең шикле тесты яңадан тикшерелүгә җибәрелүен белдергән иде. 10 апрельдә исә республикада тагын 18 кешедә коронавирус раслануы рәсми хәбәр ителде.
Мәскәүдә ачылачак яңа инфекцион хастаханәгә төбәкләрдән хезмәткәрләр җыялар
Йогышлы авырулар өчен Мәскәү янындагы Вороново бистәсендә ачылачак яңа хастаханәгә төбәкләрдән табиблар жыялар. Хастаханә апрель ахырында ачылырга тиеш. Вакытлыча эшкә инфекционистлар, анестезиолог- реаниматологлар, шәфкать туташлары, лаборатория хезмәткәрләре кабул ителә. Эш хакы 130 мең сумнан алып 450 мең сумга кадәр диелә. Табибларга тору һәм ашау түләүсез булачак. Яңа хастаханә Русиядә йогышлы авырулар хастаханәләре арасында иң зурларының берсе булачак. Ул 500 авыруга исәпләнгән, иң яңа төр медицина җиһазлары белән тәэмин ителгән диелә.
Уфада волонтерлар инфекцион хастаханәгә ярдәм җыя
Уфада волонтерлар шәһәрнең инфекцион хастаханә итеп үзгәртелгән 8нче санлы хастаханәсенә ярдәм эшләрен оештырган. Алар коронавирус таралуга юл куймас өчен хастаханәдә яшәп эшләргә мәҗбүр булган хезмәткәрләре өчен кирәкле әйберләр китергән. Аерым алганда алар бинада киеп йөрү өчен башмаклар, медицина битлекләре, табиблар өчен җайлаштырып була торган снорклинг битлекләре, бер тапкыр кулланыла торган савыт-саба, бәдрәф кәгазъләре алып килеп тапшырган. Бу турыда Facebook-та волонтер Полина Вишневская хәбәр итте.
