17 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Бүген Башкортстанның Фәйзи Гаскәров исемендәге халык биюләре ансамбле Башкортстан халыклары милли киеме көне уңаеннан көн дәвамында төрле чаралар уздыра. Ансамбленең Youtube каналында Казан вакыты белән 15:00 һәм 17:00дә концертлар, милли костюмга багышланган клип премьерасын (13:00) һәм данлыклы "Җиде кыз" (16:00) биюенең клибы премьерасын да карап булачак.
"Агыйдел" җыр һәм бию дәүләт ансамбле Youtube каналында "Татар халык җырлары" (17:00) концерт програмын карап булачак.
Әкият курчак театры артистлары Instagram челтәрендә туры эфирда әкиятләр укуны дәвам итә. Бүген Һанс Христиан Андерсенның "Уймак кыз" ("Дюймовочка") әкиятен (18:00) Албина Шаһиева укый.
Тинчурин исемендәге татар театры Youtube-та "Париж егете Әлфәнис" спектаклен (18:30) тәкъдим итә. Вакыты – 18.30
"Безнең Татарстан" #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген "Караш" төркеме концерты (19:00) узачак.
Камал татар театры сайтында "Исәнме, улым!" спектаклен (19:00) карап булачак. Карау бәясен тамашачы үзе билгели.
Яшь режиссер Илшат Рәхимбай җырчы Гөлзадә Сәфиуллина турында "Сложный узор" фильмын тәкъдим итә. Былтыр узган мөселман кинофестивалендә бу фильм "Милли кино" номинациясендә иң яхшы фильм дип табылган иде.
Уфаның "Нур" татар театры ВКонтактеда балалар өчен "Нурлы әкият" исемле онлайн проектын дәвам итә. Әкиятләрне театр артистлары укый. Казан вакыты белән 19:00дә башлана.
Әлмәт татар драма театры "Әкият арбасы" проектын дәвам итә. Бүген дә театр актерлары балалар өчен әкиятләр укыячак. Видеолар театрның Instagram, Facebook һәм ВКонтакте челтәрләрендә пәйдә булачак.
Әтнә татар театрының "Фронтовичка", "Гүзәлем Әсәл", "Көрәктән – Сәнәк" комедиясы, "Әниемнең ак күлмәге", "Бәби театр", "Югалган көн", "Күз нурларым", "Безнең шәһәрнең серләре" спектакльләрен карап була. Театрның сайтында билет бәясе – 30-70 сум.
Мәҗит Гафури исемендәге Башкорт драма театры Туфан Миннуллинның Уфада узган 80 яшьлек юбилей кичәсен тәкъдим итә.
Гафуриларның "Әмәнәткә хыянат" спектакленең беренче өлешен дә карап була.
Буа татар сатира театры "Афәрин, артист!" спектаклен тәкъдим итә.
Бүген Кумык музыкаль драма театры сайтында "Вәсыять" комедиясен (17:00) карап булачак. Вакыты – 17:00.
Казан һәм Уфага бер очкычта Таиландтан туристлар кайтарылды
17 апрельгә каршы төндә Казанга Бангкоктан очкыч белән Таиландта калган туристларны алып кайттылар. Казанга 111 кеше төште. Очкычтан аларны туры "Ливадия" шифахәсенә алып киткәннәр. Татарстаннан һәм Русиянең башка төбәкләреннән булган туристлар Казандагы шифаханәдә 14 көн торачак. Биредә юлчыларны өч тапкыр ашату каралган, сәламатлекләрен табиблар күзәтеп торачак.
Казаннан соң очкыч Уфага китте. Башкортстанга 68 кеше кайтты дип хәбәр итте республика хөкүмәтенең матбугат хезмәте. Аларның 10ысы - балалар. Уфага кайткан төркемдә дә күрше төбәкләрдән кешеләр бар. Уфада да бөтен кешеләрне 14 көнгә обсерваторга урнаштырганнар.
17 апрель иртәсенә төп хәбәрләр:
- Дөньяда короновирус йоктыручылар саны 2 миллион 159 меңнән арткан. 145 меңнән артык кеше үлгән, 548 мең кеше сәламәтләнгән.
- АКШта авыручылар саны 671 меңгә, Испаниядә 184 меңгә, Италиядә 168 меңгә, Франциядә 147 меңгә, Германиядә 137 меңгә, Британиядә 104 меңгә җиткән.
- Казанга Таиладтан Русия туристлары белән рейс очып килгән. Очкычта 111 кеше булган. Сәламәтлек тикшерүен узганнан соң, туристлар ике атнага "Ливадия" шифаханәсенә карантинга озатыла.
- Япония хөкүмәте илнең барлык ватандашларына 100 мең иена (926$) күләмендә акча таратачак. Мондый карарны пандемия тудырган кризис вакытында кешеләргә ярдәм итү өчен Синдзо Абэ хөкүмәте кабул иткән, дип яза Bloomberg.
- Кытайның Үһән шәһәре хакимияте коронавирустан үлгән кешеләр санын үзгәртте. Инфекциядән 1290 кешегә күбрәк үлгән булган. Үһәндә корбаннар саны 3869 тәшкил итә, ди рәсмиләр.
- Русиянең "Аэрофлот" һава ширкәте халыкара рейсларга билетлар сатуны июль азагына кадәр туктатты. Моңарчы 30 апрельдән соң билетларны сатып алып була иде.
Путин Җиңү парадын кичектерде
Русия президенты Владимир Путин 9 майда узарга тиешле Җиңү парадына әзерлек соңрак башланачак дип белдерде. Президент аңлатканча, 9 май парадын уздырыр өчен аңа әзерлек хәзер үк башланырга тиеш булыр иде.
"Ләкин эпидемиягә бәйле куркыныч әле бик зур, аның югары ноктасы 9 майга үтелмәчәк. Шуңа күрә минем хәзер парадка һәм бүтән киңкүләм чараларга әзерлек башлау хокукым юк" ди Путин.
Президент сүзләренчә, Кызыл мәйданда Җиңү парады һәм “Үлемсез полк” йөреше 2020 елда, коронавирус куркынычы беткәч узачак.
Удмуртиянең Татарстанга чиктәш ике районында махсус режим кертелә
Коронавирус таралуны булдырмас өчен, Удмуртиянең Алнаш һәм Грахов районнарында 16 апрельдән махсус режим кертелә. Бу турыда республика җитәкчесе Александр Бречалов оператив штаб утырышында белдерде.
Алнаш һәм Грахов районнары Татарстанның Менделеевски шәһәреннән 40 чакрымда урнашкан.
12 апрельдә Удмуртиянең Кече Пурга һәм Баграш-Бигра авылларында махсус режим кертелгән иде. Бу авыллар икесе дә Татарстан белән чиктә, Әгерҗедән дүрт чакрымда урнашкан.
Башкортстанның коронавируслы район һәм шәһәрләре саны 40ка җитте
Башкортстанның коронавируслы авырулар булган районнары исемлегенә тагын 26 район өстәлде. Баймак, Бакалы, Балтач, Белокатай, Благовар, Бүздәк, Борай, Дуван, Зианчура, Ишембай, Калтасы, Караидел, Кыйгы, Кушнарен, Көергазы, Мәләвез, Миякә, Нуриман, Салават, Туймазы, Чишмә, Яңавыл районнары һәм Агыйдел, Нефтекама, Салават, Стәрлетамак шәһәрендә беренче тапкыр коронавируслы авырулар ачыкланган.
Моңа кадәр коронавирус Башкортстанның Әлшәй, Бәләбәй, Белорет, Бөре, Дәүләкән, Дүртөйле, Зилаир, Иглин, Кырмыскалы, Уфа районнарында, Уфада һәм Кумертау, Октябрьский, Сибай шәһәрләрендә яшәүче кешеләрдә табылган иде.
Башкортстанда 42, Татарстанда 21 яңа очрак расланган
Русиядә узган бер тәүлектә тагын 3448 кешедә коронавирус рәсман теркәлгән. Илдә коронавирус йоктырганнарның рәсми саны 27938гә җитте. Барлыгы 232 (+34) кеше үлгән.
Русиянең коронавируска каршы штабы белдерүенчә, Башкортстанда бу вирусны йоктырганнар саны 191гә (+42) җиткән, биш кеше үлгән, Татарстанда - 128гә (+21) җиткән.
Татарстандагы 21 яңа авыруның сигезе – Казанда, бишесе – Чаллыда, икесе Лаеш районында. Азнакай, Балтач, Буа, Мамадыш, Саба һәм Тәтеш районнарында берешәр очрак.
16 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Бүген Кариев исемендәге яшь тамашачы театрның Youtube каналында "ИльдусWindows" архив спектаклен карап була. Башлану вакыты – 16:00. Театр "Тылсым" проекты кысаларында татар әкиятләре укуны дәвам итә. Бүген татар халык әкиятен театр актрисасы Энҗе Камалиева укый.
Әкият курчак театры артистлары Instagram челтәрендә туры эфирда татар әкиятләре укуны дәвам итә. Вакыты – 18:00.
“Безнең Татарстан” #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген җырчы Илнар Миранов концерты узачак. Вакыты – 19:00.
Камал татар театры "Миркәй белән Айсылу" спектаклен тәкъдим итә. Тамашалар театрның сайтында күрсәтелә. Карау бәясен тамашачы үзе билгели. Вакыты – 19.00.
Уфаның Нур" татар театры балалар өчен "Нурлы әкият" исемле онлайн проектын дәвам итә. Әкиятләрне театр артистлары укый. ВКонтактеда Казан вакыты белән 19.00дә башлана.
Әлмәт татар драма театры "Әкият арбасы" проектын дәвам итә. Бүген дә театр актерлары бабалар өчен әкиятләр укый. Видеолар театрның Instagram, Facebook һәм ВКонтакте челтәрләрендә пәйдә булачак.
Әтнә татар театрының "Фронтовичка", "Гүзәлем Әсәл", "Көрәктән – Сәнәк" комедиясы, "Әниемнең ак күлмәге", "Бәби театр", "Югалган көн", "Күз нурларым", "Безнең шәһәрнең серләре" спектакльләрен карап була. Театрның сайтында билет бәясе – 30-70 сум.
Бүген танылган ногай музыканты Ислам Сатыровның онлайн концерты узачак. Ике ел элек Ислам Казан Кирмәнендә узган "Tat Cult Fest" заманча шәһәр мәдәнияте фестивалендә катнашкан иде. Facebook-та Казан вакыты белән 17:00дә башлана.
Бүген Башкортстанда онлайн рәвештә Башкортстан халыклары милли киеме көне уза. Көн дәвамында Башкортстан республикасы Халыклар дуслыгы йортының Youtube каналында осталык дәресләре, видео-лекцияләр һәм милли киемнәрнең килеп чыгу тарихына багышланган дәресләр уза. Шулар арасында татар милли биюенә өйрәтә торган дәресләр дә оештырылачак.