Татарстан мөфтие эпидемия вакытында үлгән мөселманнарны җирләү турында фәтва чыгарды
Татарстан мөфтие Камил Сәмигуллин үзенең Телеграм каналында коронавирус кебек йогышлы авырулардан үлүчеләрне җирләү тәртибе турында сорауга җавап бирде.
Мөфти сүзләренчә, коронавирус кебек авырудан үлгән кеше шәһит булып санала ала, моның шарты булып аның дөньядан мөселман булып китүе тора. Сугышта үлгән шәһиттән аермалы буларак, аның мәете юылырга тиеш.
Камил хәзрәт мөселманнарның мәетләрне тиешенчә юып, аларга җеназа намазын уку бурычы булганын искәртә. "Ләкин бу очракта вазгыять шундый була ала: тән юылмаячак, мәет исә ябык тартмага салына ала", ди мөфти.
Бу очракта, мөфти сүзләренчә, мәетне юу мөмкинлеге бөтенләй юк икән, димәк әлеге бурыч өстән төшерелә. Җеназа намазы исә, бу очракта, мәетне җирләнгәннән соң кабер алдында укыла. Мондый нәтиҗәне Сәмигуллин фикх белгече, галим имам Ибн Габидин сүзләренә таянып чыгара.
Мәетне яндыру ихтималы турында мөфти берни язмаган.
Дини дәресләр һәм вәгазьләрне Кабан арты мәчете Youtube каналыннан да карап була. "Ахирәт дәресләре"н Кабан арты мәчете имамы Йосыф Дәүләтшин алып бара.
Бүген Азан.фм радиосында да көн дәвамында онлайн рәвештә "Көндәлек догалар", "101 вәгазь", "40 хәдис", "Миллият сүзлеге", "Хәзрәткә сорау", "Бәхет тулы йорт", "Шәхесләргә шәрехләр", "Мәчетләребез тарихы", "Иман тәме", "Хәяте Мөхәммәд (с.г.в.)", "Күңелдән күңелгә" һәм "Коръәни Кәрим" тапшыруларын тыңлап була.
Татарстанда коронавирус йоктыруның 6 яңа очрагы рәсман теркәлгән
Русиядә рәсмиләр белдерүенчә, COVID-19 вирусы йоктыруның тагын 601 очрагы расланган. Авыручылар 32 төбәктә ачыкланган. Иң күбе – Мәскәүдә (448), Мәскәү өлкәсендә (34) һәм Краснодар краенда (17 кеше).
Татарстанда коронавирус тагын 6 кешедә табылган дип хәбәр итә Русиянең кронавируска каршы көрәш оператив штабы. Аларның барысы да чит илләрдән кайткан булган. Алар йогышлы авырулар хастаханәсендә ята диелә.
Республикада моңа кадәр 19 очрак турында әйтелгән иде. Соңгы көннәрдә яңа авыручылыр турында хәбәр ителмәде, алты кеше хастаханәләрдән терелеп чыкты, 13 кеше дәвалануын дәвам итә диелде.
Башкортстанда узган тәүлектә коронавирус йоктыруның яңа очраклары ачыкланмаган. Республика хастаханәләрендә вирустан 8 кеше дәвалана. 2 кеше савыгып хастаханәдән чыккан диелә.
3 апрель иртәсенә Русиянең 78 төбәгендә коронавирус белән 4149 кеше авырый. 34 кеше үлгән, 281 кеше савыккан.
Казаннан Русиянең биш шәһәренә поездлар саны киметелә
Коронавирус сәбәпле юлчылар саны кимегәннән соң Русия тимер юллары 53 поездның йөрүен туктата, тагын 37 поезд сирәгрәк йөри башлаячак. Яңа тәртип 7 апрельдән кертелә.
Казаннан Петербур, Самар, Пенза, Екатеринбур, Адлер шәһәрләренә йөри торган поездлар туктатыла яисә аларның йөрүе сирәгәя. Аерым алганда, Самар белән Казан арасындагы 125 һәм 126 номерлы, Казан белән Пенза арасындагы 375 һәм 376 номерлы, Казаннан Адлерга 275 һәм 118 номерлы поездлар йөрүдән туктый. Екатеринбур һәм Петербурга поездлар саны да киметелә.
Шулай ук Уфадан Обь буена, Адлерга поездлар саны азая. Поездлар йөрешенең яңа тәртибе Русия тимер юллары ширкәтенең сайтында китерелгән.
Әлмәттә коронавирус аркасында ябылган кафелар табибларга җылы ризык китерә
Әлмәттә коронавирус сәбәпле бөтен кафе һәм рестораннар ябылган, ләкин кайберләре халыкка ризыкны өенә китереп бирү хезмәте рәвешендә эшен дәвам итә. Шулар арасыннан “Додо Пицца”, “Рокнроллы” кафесы, “Операция Ы” күңел ачу комплексының аш әзерләү бүлеге һәм “Саюри” суши йорты Әлмәт район хастаханәсендә эшләүче табибларга бушлай кайнар ризык илтүне оештырган.
“Карантин кертелгәч, табиблар кыен хәлдә калды, аларга хәзер капкалап алырга урын да юк. Шул ук вакытта алар дүртенче тәүлек буе эш урыннарыннан китми. Эшмәкәрләр битараф калмады, ярдәм итәргә теләүчеләр саны көн саен арта” дип хәбәр итә Әлмәт районы җитәкчесенең матбугат хемәте.
Коронавирус таралуны булдырмас өчен табиблар хастаханәләрдән чыкмаска мәҗбүр, чөнки аларга хастаханәдә үпкәсе шешкән авырулар янында булырга туры килә. Әлмәт районында коронавирус белән авыру очраклары әлегә рәсми рәвештә белдерелмәде.
3 апрельдә онлайн тамашалар
Коронавирус шартларында Татарстан мәдәният оешмалары татар тамашачыларына онлайн концертлар һәм спектакльләрне дәвам итә.
Әкият курчак театры артистлары Instagram челтәрендә туры эфирда татар әкиятләре укуны дәвам итә. Бүген театр артисты Нияз Садыков "Каракош" әкиятен укый. Башлану вакыты - 18:00
“Безнең Татарстан” #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген популяр җырчы Фирдүс Тямаев чыгыш ясый. Вакыты - 19:00
Шулай ук бүген интернетта Әтнә татар театрының "Көрәктән – сәнәк" комедиясен карап булачак. Моның өчен театрның сайтында теркәлергә кирәк. Теркәлү узганда билет өчен түләнә, ул 70 сум тора. Билет алучыга спектакльне карау өчен сылтама килә. Вакыты - 20.00
Әтнә татар театры балалар өчен "Кәҗә белән Сарык маҗаралары" спектаклен дә күрсәтә.
Швециядә коронавирустан 92 яшьлек татар әбие үлгән
Швециянең Стокһолм шәһәрендә яшәүче 92 яшьлек Рәхимә Хәйретдинова коронавирустан үлеп киткән. Бу турыда хәбәрне бүген җомга намазына җыелганнарга Финляндиянең Һелсинки татар мәхәлләсе имамы Рамил Беляев җиткерде. Ул шулай ук мондый куркыныч йогышлы авырулардан үлгән кешеләрне мөселманча җирләү тәртибе турында да сөйләде.
