Татар авылы карантинга ябылды
Бер кешедә коронавирус табылу сәбәпле Түбән Новгород өлкәсенең Камка авылы тулысынча карантинга ябылды. Бу кеше Мәскәүдән туганнары янына кайткан булган. Диагноз расланганчы, ул берничә көн Уразовка авылы хастаханәсендә бронхиттан дәваланган.
Коронавирус раслангач, Уразовкада аны дәвалаган табиблар карантинга ябылган. Шулай ук Сергач инфекцион хастаханәсе дә карантинга ябык.
Камка авылында 2010 елгы җанисәпкә караганда 700ләп кеше яши, татар авылы. Уразовкада 1600ләп кеше яши. Түбән Новгород өлкәсе соңгы бер тәүлектә Идел буенда иң күп авырулар теркәлгән өлкә. Анда 33 яңа авыру ачыкланган. Икенче урында - Татарстан.
Нефтекаманың психо-неврология диспансеры карантинга ябылды
Коронавирус таралу куркынычы сәбәпле Башкортстанның Нефтекама шәһәрендә урнашкан психо-неврология диспансеры карантинга ябылды. Бу турыда республика сәламәтлек саклау министры Максим Забелин белдерде.
"Бүген диспансерда яткан 12 кешедә кискен респиратор вирус инфекциясе бар. Чир таралырга мөмкин", диде Забелин.
Диспансерда ятучы авырулардан һәм хезмәткәрләреннән ОРВИ, грипп һәм коронавируска анализлар алынган. Бер авыруның анализы шикле – анда коронавирус булырга мөмкин. Ул кешенең анализы Роспотребнадзорга җибәрелгән.
11 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Бүген Мәскәүнең "Штаб татар" Instagram профилендә Башкортстанда яшәп иҗат итүче яшь җырчы Илнар Шәрәфетдиновның концерты узачак. Башлану вакыты – 17:00
Тинчурин исемендәге татар театры Youtube-та "Соңгы риваять" спектаклен тәкъдим итә. Вакыты – 17:00
Әкият курчак театры артистлары Instagram челтәрендә туры эфирда татар әкиятләре укуны дәвам итә. Вакыты – 18:00
Уфаның "Нур" татар театры балалар өчен "Нурлы әкият" исемле онлайн-проект дәвам итә. Театр актрисасы, балалар театр-студиясе җитәкчесе Ленария Хаҗиева Youtube-та татар һәм урыс телләрендә әкиятләр укыячак. Казан вакыты белән 19:00дә башлана.
Камал татар театры үз сайтында бүген "Cөясеңме, сөйңисеңме..." спектаклен күрсәтә. Карау бәясен тамашачы үзе билгели. Вакыты – 19:00
Бүген "Crimean Tatars" кырымтатар каналы үзенең 4 еллыгы уңаеннан кырымтатар телендә "Хыдыр Деде" исемле беренче әкиятен күрсәтә. Трансляция туры эфирда "Crimean Tatars"ның Youtube каналында узачак. Казан вакыты белән 20:00дә башлана.
Әтнә татар театрының балалар өчен "Бәби театр", зурлар өчен "Гүзәлем Әсәл" һәм "Югалган көн" спектакльләрен һәм "Алтын битлек" театр премиясенең "Маска+" фестивалендә катнашкан "Фронтовичка"сын карап булачак. Моның өчен театрның сайтында теркәлгәндә билет өчен түлисе – "Бәби театр" 30 сум, калганнары 70 сум тора. Билет алучыга спектакльне карау өчен сылтама килә. Сылтама 12 апрельгә кадәр актив булачак.
Әтнә театрының Youbube каналында шулай үк "Гармун уйный, баян чыңлый" спектаклен, театрның 75 һәм 100-еллыгына багышланган тантаналарны карап була.
Буа татар сатира театры "Ике донья бер кенди" спектаклен тәкъдим итә.
Кариев исемендәге яшь тамашачы театры үз репертуарында барган иң яхшы балалар спектакльләренең видеоверсияләрен тәкъдим итә. Шушы көннәрдә "Кәҗүл читек", "Йомрыбаш" һәм соңгы премьераларның берсе, "Хикмәт әкиятләре" спектакльләрен карап була. Спектакльләрнең бәясе театр билеты бәясенә тиң. Спектакльләр урысча субтитрлар белән күрсәтелә. Live-спектакльләргә билет алу өчен театрның сайтында түләргә кирәк. 1 спектакль – 200 сум, берьюлы өч спектакль ташлама белән – 450 сум. Билет сатып алганнан соң электрон адреска килгән сылтама (логин һәм серсүз) белән спектакль карап була. Әлеге сылтама 30 апрельгә кадәр актив булачак, ягъни апрель ахырына кадәр теләгән вакытта кереп, спектакль карарга мөмкин булачак.
Apple һәм Google коронавирус йоктыручыларны эзләүче технология әзерли
Apple һәм Google корпорацияләре COVID-19 йоктырган кешеләр белән элемтәдә булучыларны эзләүче технолония ясау турында килешкән. Бу хакта ике ширкәтнең дә сайтларында хәбәр ителә.
Яңа систем Bluetooth аша бер-берсенә якын булган телефоннарны эзли алачак һәм мәгълүматны махсус әсбабка җибәрәчәк. Әсбабны кулланучылар үзләрендә COVID-19 ачыклануын хәбәр итә ала. Аннары систем кешенең соңгы ике атнада булган элемтәләр даирәсен анализлый һәм башкаларны кисәтә. Ләкин вируслы кешенең исеме яшерелә.
Систем май аенда эшли башлаячак. Башта ул сәламәтлек саклау оешмаларының рәсми әсбабларына керетеләчәк. Киләсе айларда Android һәм iOS операцион системнарында барлыкка киләчәк һәм аерым әсбап йөкләргә туры килмәячәк.
Коронавирус йоктырган Ингушетия мөфтие вафат булган
11 апрельдә Ингушетия мөфтие Абдурахман Мартазанов вафат булган. Беренче анализлары коронавирус барлыгын күрсәткән.
Абдурхман Мартазановны авыр хәлдә хастаханәгә 10 апрельдә китергәннәр. Аның үпкәсе шешкән дип хәбәр итә Интерфакс Ингушетия сәламәтлек саклау министрлыгына сылтанып. Анализларының беренчел нәтиҗәләре мөфтидә коронавирус барлыгын күрсәткән.
11 апрельдә Ингушетиядә COVID-19 йоктыруның 29 очрагы рәсман теркәлгән.
Русиядә узган бер тәүлектә коронавирус рәсман 2186 кешедә расланган
Башкортстанда узган бер тәүлектә 19 кешедә коронавирус табылуы рәсми расланды. Татарстанда яңа очраклар табылуы хәбәр ителми.
Русиянең коронавируска штабы белдерүенчә, узган бер тәүлектә илдә барлыгы 2186 яңа очрак рәсман теркәлгән. Шуларның 1306сы Мәскәүдә, 278е Мәскәү өлкәсендә, 69ы Петербурда.
Русиядә бу куркыныч авыруны йоктыручылар саны 15770кә җитте диелә. Хакимиятнең бу саннары аннексияләнгән Кырымны һәм Акъярны да исәпкә ала.
Соңгы бер тәүлектә тагын 24 кеше үлгән, 18-е Мәскәүдә. Русиядә корбаннарның гомуми саны 130га җитте.
12 апрельгә Татарстанда коронавируслы барлыгы 73, Башкортстанда 84 кеше рәсми теркәлгән.
Башкортстанда авыруларның саны алдагы көннәрдә нык кына артырган мөмкин. 10 апрельдәге матбугат очрашуында республика сәламәтлек саклау министры Максим Забелин 170 кешенең тесты яңадан тикшерүгә җибәрелүен белдергән иде. Аларның беренче тесты коронавирус булмавын күрсәтмәгән.
Роскомнадзор Уфада короновирустан үлүчеләргә каберләр әзерләнү хәбәрен алып куюны таләп итә
Роскомнадзор Башкортстанның кайбер матбугат чараларыннан Уфаның бер зиратында коронавирустан үлүчеләр өчен 1000 кабер әзерләнү турында хәбәрне алып куюны таләп иткән.
Әлеге яңалык 7 апрельдә "Коммерсантъ-Башкортстан" газетында чыкты, аны кайбер башка матбугат чаралары да үзләрендә бастырды. "Коммерсантъ" хәбәрне Уфа мэриясенә караган "Махсус хезмәт күрсәтү комбинаты" ширкәте вәкиле сүзләренә сылтанып язган иде. 500 урын христан кагыйдәләре белән күмелүчеләргә, 500е мөселманнарга аерып куелган диелде.
Икенче көнне Уфа мэриясе үзенең сайтынад "коронавирустан үлүчеләрне күмү мөрәҗәгатьләре булмады, шәһәр идарәсе бу максатлардан зиратларда урыннар аермады", дип әлеге хәбәрне кире какты.
Җомга кич "Коммерсантъ" редакциясенә Роскомнадзордан яңалыкны алып куюны таләп итеп күрсәтмә килгән.
"Idel.Реалии" мәгъүматында караганда, мондый күрсәтмәне шулай ук "Башинформ", "МКСЕТ", "Уфа1", "Горобзор" кебек сайтлары да алган.
Тулырак хәбәр монда.
12 апрельдә онлайн тамашалар
Азатлык изоляция чорында өйдә утыручыларны бүген булачак кызыклы онлайн чаралар, тамашалар белән таныштыруны дәвам итә.
Әкият курчак театры артистлары Instagram-да туры эфирда татар әкиятләре укуны дәвам итә. Башлану вакыты – 18:00.
Уфаның "Нур" татар театры Youtube-та балалар өчен "Нурлы әкият" исемле онлайн проектын дәвам итә. Әкиятләрне театр артистлары укый. Казан вакыты белән 19:00дә башлана.
Бүген Әтнә татар театрының балалар өчен "Бәби театр", олылар өчен "Фронтовичка", "Гүзәлем Әсәл" һәм "Югалган көн" спектакльләрен онлайнда әлегә соңны мәртәбә карап булачак. Моның өчен театрның сайтында теркәлергә кирәк. Теркәлү узганда билет өчен түләнә – "Бәби театр" 30 сум, калагннары 70 сум тора. Билет алучыга спектакльне карау өчен сылтама килә.
Әтнә театрының Youtube каналында Хәй Вахитның "Күк капусы ачылса" водевилен карап була.
Мәскәүдә яшәүче тарихчы, журналист Марат Сәфәров "Татар Мәскәве" дип аталган виртуаль экскурсия оештыра.
Кариев исемендәге яшь тамашачы театры үз репертуарындагы иң яхшы балалар спектакльләренең видеоверсияләрен тәкъдим итә. Шушы көннәрдә "Кәҗүл читек", "Йомрыбаш" һәм соңгы премьераларның берсе булган "Хикмәт әкиятләре" спектакльләрен карап була. Спектакльләрнең бәясе театр билеты бәясенә тиң. Спектакльләр урысча субтитрлар белән күрсәтелә. Билетны театрның сайтыннан алып була. Бер спектакль – 200 сум, бер юлы өч спектакль ташлама белән – 450 сум. Билет сатып алганнан соң килгән сылтама (логин һәм серсүз) 30 апрельгә кадәр гамәлдә.
Кариев театры шулай үк "Тылсым" проекты кысаларында татар әкиятләре укуын дәвам итә. Бүген Фәнис Яруллинның "Кояштагы тап" әкиятен театр актрисасы Алсу Шакирова укый.
Чаллы татар драма театрының "Яшәргә, яшәргә, ничек тә яшәргә..." спектаклен карап була.