Коронавирус. Җанлы блог

9 май көненә коронавирус турында төп хәбәрләр:

• Дөньяда вирус йоктыручылар саны 3 миллион 939 меңнән арткан. 274 мең кеше үлгән, 1 миллион 322 мең кеше савыккан.
• Иң күп авыручылар булган илләр: АКШ (1 миллион 283 мең), Испания (222 мең), Италия (217 мең), Британия (212 мең), Русия (187 мең), Франция (176 мең), Германия (170 мең), Бразилия (146 мең), Төркия (135 мең).
• Май ялларыннан соң Татарстанда балалар бакчалары эшли башлаячак. 12 майдан гадәти режимда балалар бакчалары һәм аз укучы саны булган мәктәпләр эшли башлаячак, моның хакта Татарстан мәгариф министрлыгының матбугат хезмәте хәбәр итә. Калган укучылар укуын дистанцион дәвам итәчәк.
• 12 май көненнән Татарстанның Югары мәхкәмәсе дә үз эшен гадәти режимда торгызачак. Эшкә барлык хөкемдарлар һәм аппарат вәкилләре чыгачак. Мәхкәмәгә килүчеләргә битлекләр һәм перчаткалар кияргә кирәк булачак.
• Роспотребнадзор төбәкләрдә чикләүләр алына башлау шартларын атады. Төп критерийлар булып инфекция таралышы коэффициенты төшүе, хастаханәләрдә урын җитәрлек булуы һәм тестлау системының таралышы булачак. Моннан тыш COVID-19-дан үлемнәр саны һәм вируска иммунитет булучылар саны да исәпкә алыначак. Беренче йомшартулар инфекция таралышы коэффициенты 1гә кадәр төшкәндә башланачак, диелә.
• АКШ президенты Дональд Трамп коронавирус хәтта вакцина булмаган очракта да юкка чыгачак дип белдерде. Аның сүзләренчә, көз көннәрендә көтелгән икенче дулкынга АКШ хакимите әзер. Ширкәтләр актив рәвештә вакцина булдырырга тырыша, ләкин "хәзер дә вакцинасы булмаган авырулар бар", ди президент.

Соңгы тәүлектә Татарстанда коронавирус йоктыруның 88, Башкортстанда 84 очрагы теркәлгән

Татарстанда рәсман теркәлгән 88 авыручының 18е хастаханәгә салынган, 70е өйдә дәвалана.

Хәзер Татарстанда барлыгы 1586 кешедә COVID-19 расланган, 340 кеше савыккан. Рәсми төстә шулай ук биш кешенең үлеме расланды. Тагын биш авыру үпкәне ясалма җилләтү җайланмасына тоташтырылган.

Башкортстандагы коронавирус йоктырганнар саны соңгы тәүлектә 84 кешегә арткан, гомум сан шулай итеп 1416 булды. Бер үлүче дә бар, алар саны 15кә җитте. Болар барысы да рәсми саннар.

Русиядә тагын 10 817 кешедә коронавирус ачыкланган, 104 кеше үлгән. Эпидемия башланганнан бирле яңа төр вирусны илдә барлыгы 198 676 мең кеше йоктырган, 1827 авыру үлгән. Бу саннарны Русиянең коронавируска каршы көрәш штабы китерә.

9 майда онлайн тамашалар

Азатлык изоляция чорында өйдә утыручыларны бүген татар һәм башкорт телләрендә булачак кызыклы онлайн чаралар, тамашалар белән таныштыра.

Мәҗит Гафури исемендәге Башкорт драма театры Флорид Бүләковның "Шайморатов генерал..." спектаклен (16:00) күрсәтә.

Бүген "Агыйдел" җыр һәм бию дәүләт ансамбленең Youtube каналында бәйрәм концертын (17:00) карап була.

Тинчурин исемендәге татар дәүләт драма һәм комедия театры "Без – кырык беренче ел балалары" спектаклен (17:00) күрсәтә.

Уфаның Мостай Кәрим исемендәге милли яшьләр театры Мостай Кәримнең "Безнең өйнең яме" спектаклен (17:00) күрсәтә.

Әлмәт татар драма театры "Безнең хәтердә" тамаша тәкъдим итә.

Камал исемендәге татар дәүләт драма театры "41-нең арбалы хатыннары" спектаклен тәкъдим итә.

Туфан Миңнуллин исемендәге Түбән Кама татар театры "Нәзер" спектаклен күрсәтә.

Салават шәһәре башкорт драма театрының "Эх, Уфа кызлары!" спектаклен тәкъдим итә.

Нәҗип Җиһанов исемендәге музей Муса Җәлилнең "Ильдар" операсын онлайн күрсәтә. Опера 1942 елда язылган.

Сергачта коронавирустан тагын бер кеше үлгән

Түбән Новгородның Сергач районында коронавирустан тагын бер кеше үлгән. Бу хакта үзенең Instagram сәхифәсендә районы башлыгы Олег Радаев хәбәр итте.

7 майда COVID-19 тагын бер татар авылы – Семочкида табылган иде. Шулай итеп Түбән Новгород өлкәсендәге коронавируслы авырулар булган татар авыллары саны 19га җитте. Уразавылда авыру кеше саны 19 җиткән. Гомумән, май бәйрәмнәре вакытында Түбән Новгоробның Кызыл Октябрь районында COVID-19 белән авырган кешеләрнең саны 6 тапкырга үскән.

Уразавылда урнашкан хастаханәдә эшләгән ике табиб шулай үк коронавирус йоктырган. 60-яшьлек хатын-кыз белән 50-яшьлек ир-егет Пилнә һәм Түбән Новгород хастаханәсендә дәвалана. Табиблар COVID-19 булган кешеләрне дәвалаганда, үзләре дә вирусны йоктырган.

Узган атнада Куй Суы авылында коронавируслы бер хатын-кыз үлгән иде. Бу атнада Сергач районында да өлкән яшьтәге бер ханым коронавирустан үлеп киткән. Бүген тагын бер үлем турында билгеле булды. Үлгән кеше кайсы авылдан икәнен әйтелми.

10 майда онлайн тамашалар

Азатлык изоляция чорында өйдә утыручыларны бүген татар һәм башкорт телләрендә булачак кызыклы онлайн чаралар, тамашалар белән таныштыра.

Тинчурин исемендәге татар драма һәм комедия театры балалар өчен "Мыгырдык" спектаклен (10:00) тәкъдим итә.

Мәҗит Гафури исемендәге Башкорт драма театры Мостай Кәримнең "Язмышлардан узмыш бар..." спектаклен (16:00) күрсәтә.

Уфаның Мостай Кәрим исемендәге милли яшьләр театрының "Гыймади маҗаралары" спектаклен (17:00) карап була.

Уфаның "Башкортстан" концерт залы "Аргымак" этно-рок төркеменең концертын (17:00) күрсәтә.

Туфан Миңнуллин исемендәге Түбән Кама татар театры "Анам кыры" спектаклен тәкъдим итә.

"Татарстан – Яңа гасыр" телеканалы "Сиңа кайтам" сериалын Youtubка чыгарды.

Арыслан Мөбәрәков исемендәге Сибай башкорт драма театры "Бичәкәй", "Сөясеңме – сөймисеңме" һәм "Таштугай", "Ана хөкеме" спектакльләрен тәкъдим итә.

"Безнең Татарстан" #айдадомой проекты кысаларында татар эстрадасы йолдызларының җанлы онлайн концертларын күрсәтүне дәвам итә. Бүген Татарстанның атказанган артисткамы Алинә Шәрипҗанова (19:00) җырлый.

Бүген Мәскәүнең "Татар штабы" үзенең Instagram-ында Уфа китап клубы белән туры эфирда очрашу (19:00) уздыра.

Русиядә коронавирус йоктыручылар саны 200 меңнән арткан

Бу хакта Русиянең коронавируска каршы көрәш штабы хәбәр итә. Соңгы тәүлектә коронавирус йоктыруның 11 012 очрагы теркәлгән диелә.

Татарстанда узган тәүлектә коронавирус йоктыруның 85 очрагы рәсми теркәлгән. Бу санны Русиянең коронавируска каршы көрәш оператив штабы китерә. Иң күп йоктыру очраклары Казанда (34) һәм Чаллыда (25) күзәтелә.

Республикада COVID-19 хәзер 1671 кешедә расланган, 447 кеше савыккан (аларның 107се – узган тәүлектә). Бүген яңа үлем очраклары турында хәбәр ителми, алдагы көннәрдә биш кешенең үлеме рәсми расланган иде.

Башкортстанда исә соңгы тәүлектә вирус йоктыручылар саны 75кә артып, 1491гә җиткән. 435 кеше савыккан, 15 кеше үлгән.

Русия күләмендә исә соңгы тәүлектә коронавирус тагын 11 012 кешедә ачыкланган, 88 кеше үлгән. Эпидемия башланганнан бирле илдә барлыгы 209 688 кеше яңа төр вирус йоктырган, 1915 авыру үлгән. Русия дөньяда авыручылар саны 200 меңнән арткан бишенче ил булып тора.

10 май көнне дөньяда коронавирус йоктыручылар саны 4 миллионнан арткан. Джонс Һопкинс университеты мәгълүматына күрә, 10 май иртәсендә авыручылар саны 4 миллион 26 мең кеше тәшкил итә. Иң күп авыручылар булган илләр бишлеге – АКШ (1 миллион 309 мең), Испания (223 мең), Италия (218 мең), Британия (216 мең) һәм Русия (209 мең).

11 май иртәсенә коронавирус турында төп хәбәрләр:

• Дөньяда авыручылар саны 4 миллион 102 меңнән арткан. 282 мең кеше үлгән, 1 миллион 411 мең кеше савыккан.
• Иң күп авыручылар булган илләр: АКШ (1 миллион 329 мең), Испания (224 мең), Британия (220 мең), Италия (219 мең), Русия (209 мең).
• 12 майдан Татарстанда урамга чыгу өчен СМС аша рөхсәт алу кирәк булмаячак. Шул ук вакытта урамда өстәмә чикләүләр гамәлгә керәчәк. Җәмәгать транспорты һәм сәүдә урыннарында битлексез, бармакчаларсыз йөрү тыелачак.
• Бүген Русия президенты "ял көннәре"н озайту турында киңәшмә үткәрәчәк дип көтелә. Анда алдагы көннәрдә илдә нинди тәртип булачагы хәл ителәчәк. 12 майдан төбәкләрдә изоляциядән әкренләп чыгу башланачак, дип көтелә.
• 2020 елда Канн кинофестивале үтмәячәк. Франциядә гадәттән тыш хәл режимын 10 июльгә кадәр озайттылар. Фестивальне көзен дә үткәрү авыр булачак, ди оештыручылар. Чараны виртуаль үткәрү фикереннән дә оештыручылар баш тарткан.

Русия коронавирус йоктыручылар саны белән дөньяда өченче урынга менде