Башкортстанда коронавирус йоктыруның 92, Татарстанда 88 яңа очрагы теркәлгән
Татарстанда узган тәүлектә тагын 88 кешедә COVID-19 рәсмән ачыкланган. Бу санны Русия коронавируска каршы көрәш оператив штабы китерә.
Республикада вирус йоктыруның барлыгы 2400 очрагы рәсми рәвештә расланган. Яңа үлем очраклары турында әйтелми, моңарчы республика хастаханәләрендә сигез кеше COVID-19 китереп чыгарган үпкә ялкынсынуыннан үлгән иде.
Башкортстанда 92 яңа очрак. Республикада коронавирус йоктыруның барлыгы 2247 очрагы расланган, 17 кеше үлгән.
Русиядә COVID-19 барлыгы 299 941 кешедә рәсмән теркәлгән, 2837 кеше үлгән. Узган тәүлектә 9263 яңа очрак расланган, 115 кеше яңа вирустан һәлак булган.
Иркутски өлкәсендә коронавирустан Татарстаннан йөреп эшләүче вахтачы үлгән
Иркутски өлкәсендә Татарстаннан вахта белән килеп эшләүче ир-ат коронавирустан үлгән. Бу турыда irk.ru төбәкнең коронавируска каршы көрәш оператив штабы мәгълүматына таянып яза.
Татарстанлының 58 яшьтә булуы әйтелә. Ул Усть-Кутьта үзәк район хастаханәсендә дәваланган. Аның кайсы шәһәрдән килүе хәбәр ителми. Бу Иркутски өлкәсендә коронавирустан үлемнең җиденче очрагы.
19 майда онлайн тамашалар
Азатлык изоляция чорында өйдә утыручыларны бүген татар һәм башкорт телләрендә булачак кызыклы онлайн чаралар, тамашалар белән таныштыра.
Габдулла Кариев исемендәге татар яшь тамашачы театры Галимҗан Ибраһимовның "Алмачуар" спектаклен (16:00) күрсәтә.
Мәҗит Гафури исемендәге башкорт драма театрының башкорт халык эпосы нигезендә куелган "Урал-батыр" спектаклен (16:00) карап була.
"Алтын бешик" кырымтатар театры "18 MAYIS" дип аталган реквием чыгарды.
Уфаның Мостай Кәрим исемендәге милли яшьләр театры театр артистлары концертын (16:00) тәкъдим итә.
Бүген Мәскәүнең "Штаб татар" оешмасы Instagram-да Иваново татар яшьләре оешмасы рәисе Марат Йосыпов белән туры эфирда очрашу (19:00) уздыра.
Габдулла Тукай исемендәге татар дәүләт филармониясы Татарстанның атказанган артисты Лидия Әхмәтованың юбилей кичәсен тәкъдим итә.
Уфадагы РКБга баш табиб итеп Шамил Булатов билгеләнде
Элек Башкорт дәүләт медицина университеты клиникасын җитәкләгән Шамил Булатов Уфадагы Куватов исемендәге республика клиник хастаханәсенә баш табиб итеп билгеләнгән.
Хастаханәне 2019 елның ноябреннән җитәкләгән Эльза Сыртланова үз теләге белән эшеннән киткән, аңа Уфада 38нче санлы поликлиника баш табибы вазифасы тәкъдим ителгән. Бу клиникада 30 кеше эшли диелә.
Апрель башында Куватов исемендәге республика клиник хастаханәсендә коронавирус киң таралуы билгеле булды. 6 апрельдән хастаханә карантинга ябылды. Табиблар һәм дистәләрчә авыру вирусны йоктырган.
Табиблар сүзләренчә, алар гадәттән тыш пневмония булуын баш табибка хәбәр иткән, ләкин мәгълүматка игътибар бирелмәгән, табибларга "яхшырак эшләргә" киңәш ителгән. Табибларга шәхси саклану чаралары (битлекләр, саклану киемнәре) бирелмәгән.
Татарстанда көллиятләр гадәти тәртиптә эшли башлый
Татарстанның мәгариф һәм фән министрлыгы көллиятләргә 19 майдан дистанцион укытудан чыгып, өлешчә гадәти тәртиптә эшли башларга рөхсәт итте. Бу турыда фәрман министрлык сайтында дөнья күрде.
Уку йортлары көндезге уку тәртибенә күчүне Татарстан министрлыгы белән килештерергә тиеш. Аларга барлык санитар-эпидемиология кагыйдәләрен дә саклау шарты куела.
Урта һөнәри белем бирү оешмаларында уку елы 30 июньдә тәмамланачак. Киләсе уку елына студентлар кабул итү 1 июньнән башлана.
Татарстанда коронавирус таралу куркынычы сәбәпле 30 апрельдән изоляция режимы кертелде. Мәктәпләр һәм уку йортлары март ахырынан ук дистанцион укуга күчерелде.
Башкортстанда тагын берничә хастаханә карантинга ябылды
19 майга алынган мәгълүматка караганда, Башкортстанда барлыгы 17 хастаханә карантинда тора. Бу турыда Башкортстан сәламәтлек саклау министрлыгының онлайн брифингында Роспотребназдорның республикадагы вәкиле Венер Изикәев хәбәр итте.
15 майдан Бәләбәй үзәк район хастаханәсе тулысынча карантинга ябылган. Шулай ук республика туберкулез авырулары хастаханәсенең Ишембайдагы бүлеге, һәм дистәдән артык район һәм шәһәрләрдә хастаханәләр өлешчә карантинда. Кырмыскалы, Баймак, Югары Яркәй, Караидел, Кушнаренко, Тәтешле, Красноусол, Ишембай, Акъяр, Иглин, Дүртөйле, Малаяз, Олы Ыктамак үзәк район хастаханәләре һәм Салават, Стәрлетамак шәһәр хастаханәләрендә аерым бүлекләр, Ирәндек амбулаториясе тулысынча карантинга ябылганы әйтелә.
Башкортстанда хәзер барлыгы 2247 кешедә коронавирус расланган, узган тәүлектә яңа вирус тагын 92 кешедә ачыкланган. Барлыгы 714 кеше савыккан. Хастаханәләрдә COVID-19 вирусыннан 652 авыру дәвалана, 28 кешенең хәле авыр дип бәяләнә.
“Медиазона”: Русиядә коронавирустан табиблар башка илләргә караганда 16 тапкыр күбрәк үлә
Русиядә коронавирустан табиблар үлеме очраклары башка илләр белән чагыштырганда 16 тапкыр күбрәк. “Медиазона” журналистлар проекты вәкилләре шундый нәтиҗәгә килгән.
Исәпләүләр нигезенә Русия табиблары төркеменең “Хәтер исемлеге” алынган. Анда 18 майга 222 фамилия теркәлгән. “Медиазона” һәр очракны барлаган, үз чыганаклары аркылы алган фамилияләрне дә кушып, 186 очракның раслануын яза.
18 майга Русия рәсмиләре барлыгы 2864 кешенең COVID-19 вирусыннан үлүен хәбәр итте. Бу саннан исәпләп чыгарганда, үлүчеләрнең 7 проценты диярлек – медицина хезмәткәрләре. Бу башка илләр белән чагыштырганда зур күрсәткеч.
Коронавирустан 30 меңгә якын кеше үлгән Италиядә 200 табибның үлеме әйтелә, аларның өлеше 0,65 процент булып чыга. АКШта табиблар үлеме - 0,48 процент, Иранда - 1,59 процент ди хисап авторлары.
20 майга төп иртәнге хәбәрләр:
- Дөньяда коронавирус йоктыручылар саны 4 миллион 900 меңнән арткан. 323 мең кеше үлгән, 1 миллион 689 мең кеше сәламәтләнгән.
- АКШта авыручылар саны 1 миллион 528 меңгә җиткән, Русиядә – 299 меңнән, Бразилиядә – 271 меңнән, Британиядә – 250 меңнән, Испаниядә 232 меңнән арткан.
- Русиядә туризм изоляциядән 1 июньдә чыга башлаячак. Беренче чиратта медицина лицензияләре булган шифаханәләр, коттеджлар һәм апарт-кунакханәләр эшли башлаячак. Моның турында Ростуризм башлыгы Зарина Догузова белдерде.
- Коронавирус пандемиясе аркасында дөнья икътисады төшүе 60 миллион кешене фәкыйрьлеккә китерә ала. Фәкыйрьлек дип көнлек хезмәт хакы 1,9 доллардан түбәнрәк булучылар атала. Моның хакта Дөнья банкы җитәкчесе Дэвид Малпасс әйтте.
- Кыпрыс 15 июньнән янә туристларны кабул итәргә әзерләнә. Илнең туризм министрлыгы туризмнан керемнәр узган елгы күрсәткечләрнең 30%-ы булуын көтә.
- Латвиянең AirBaltic һава ширкәте Ригадан Һелсинкига, Мүнһен һәм Берлинга очышларын торгыза. Ширкәт транспорт министрлыгының махсус рөхсәтен алган. Март аенда AirBaltic коронавирус сәбәпле очышларын туктаткан дөньяда беренче һава ширкәте булган.