Былтыр көз Уссурийски полигонында Татарстаннан 19 яшьлек срочник Артем Антоновны атып үтергән 22 яшьлек офицер Александр Емельянов Русия саклану министрлыгы белән килешү төзегән һәм Украинадагы сугышка киткән. Бу хакта Антонов туганнары хәбәр итә. Мәхкәмә сайтыннан күренүенчә, Емельяновка чыгарылган хөкем карары туктатылып тора.
"Погибшие из Татарстана" телеграм каналында 29 мартта 21 яшьлек Александр Беломоевның Украинадагы сугышта һәлак булуы турында мәгълүмат чыкты. Татарстаннан бу сугышта үлгән 4500нче кеше дип яздылар. Әлеге пост астында 75 кеше төрле фикерләр калдырган. Шуларның берсе Былтыр көз Уссурийски полигонында Татарстаннан 19 яшьлек срочник Артем Антонов турында.
— Минем туганым 19 яшьлек Артемийны 2024 елның 21 октябрендә армиядә 22 яшьлек лейтенант атып үтерде. Армия бүген концлагерь, —диде "Екатерина Катя".
— Бу лейтенант кайда соң хәзер? — дип сорады "Ильмира".
— Туганнары әйтүләренчә, ул Русия саклану министрлыгы белән контракт төзегән, — диде хатын.
Быел 19 февральдә мәхкәмә сайтында Емельяновның карточкасында "җинаять эше тукталып тора" дигән язу барлыкка килде.
"Idel.Реалии" Александр Емельянов белән Вконтактеда элемтәгә кереп карады, ул хәбәрне укыды, ләкин кайдалыгы турында җавап бирмәде.
19 яшьлек Артём Антоновны кем үтергән
Былтыр көз Приморье төбәгендә рекрут хезмәтендә коточкыч гадәттән тыш вакыйга турында билгеле булды. "Ильинский" полигонында Татарстаннан 19 яшьлек Артём Антоновның башына аткан булганнар, ул шунда ук үлгән. Якыннары һәм туганнары фикеренчә, лейтенант утны солдатларның чираттагы тапкыр контракт имзалаудан баш тартуыннан соң ачкан.
Утны 394нче мотоукчы полк лейтенанты ачканы билгеле, аның исеме әйтелми. Туганнарга Артёмның үлеме турында ике көннән соң гына хәбәр иткәннәр.
Кулларыннан һәм муеныннан тимер чыбыркы белән сукканнар
— Бу минем кадерле Тёмочкам, аны Уссурийскида армиядә бөтенләй аңлашылмаган шартларда үтергәннәр. Аны мыскыллаганнар, сигезешәр көн рәттән нәүбәткә куйганнар, медицина ярдәме күрсәтмәгәннәр. Кулларыннан һәм муеныннан тимер чыбыркы белән сукканнар. Куркыныч һәм коточкыч, — дип сөйли аның якын туганы.
Туганнар сүзләренчә, хезмәт итүнең ике ае дәвамында Антонов һәм башка срочникларны сугышка китү өчен контракт имзаларга күндерергә теләгәннәр һәм моннан баш тартучыларга янаганнар.
— Уссурийскидан Курскига срочникларны эшелоннар белән җибәрәләр! Балаларыгыз исән булган чакта, аларның саклагыз, — ди Антонов туганы.
Артём дуслары сүзләренчә, 394 мотоукчы полк срочникларын контракт имзаларга үгетләү генә түгел, аларны Курски өлкәсендә җибәрергә әзерләгәннәр инде.
Артём үлеме турында тикшерү материалларыннан гына билгеле булды. Ул материалларны 19 яшьлек егетнең туганнары һәм дуслары җәмәгатьчелеккә җиткерде. Документта "лейтенант автоматны саклагычтан алып, аны кешеләргә таба төбәде, һәм, чакмага басып, ут ачты. Пуляларның берсе Антоновның башына эләкте" диелгән.
Аның җәсаден Приморьедан Татарстанның Югары Ослан авылына китергәч, туганнар маңгайда пуля эзен һәм бөтен тәнендә күгәргән урыннар күргәннәр.
Без Артёмны контракт имзалаудан баш тартканы өчен җәфалаганнар дип саныйбыз
— Аркасы тулысынча кара янган иде, — ди Антонов туганы, — аны атнадан артык кыйнаганнар, димәк! Без Артёмны контракт имзалаудан баш тартканы өчен җәфалаганнар дип саныйбыз. Аның дуслары язышуны күрсәттеләр, анда солдатларга ныклап басым ясыйлар. Без берни белмәдек, ул безнең кәефне төшермәскә тырышкан. Иң якын дуслары белән ябык төркемдә генә уртаклашкан. Артём үлгәннән соң бу төркемне билгесез кешеләр шунда ук бетергән. Дәлилләрне юк итәргә тырышканнар. Ләкин аның дуслары бу хәлләр турында бер-берсе белән язышкан, алар белгән, — ди ул.
Артём дуслары аның үлеме белән генә түгел, хакимият яклы пабликларның аның үлеме турында ничек язуына да шакката.
СВО армиядән чын концлагерь ясады
— Җирле төркемнәрдә некрологлар чыгаралар, янәсе Артём "гомерен Ватан өчен биргән". Сафсата! Ул ахырына кадәр контракттан баш тарткан! СВО (Украина сугышы – ред.) армиядән чын концлагерь ясады. Беркем өчен сер түгел, армиядән көчләп сугышка тарталар, — ди аның якын дусты Иван.
Ул Артёмны соңгы тапкыр армиягә озатканга кадәр күргән иде. Хәрби хезмәткә Артёмның елмаеп китүен хәтерли.
— Ул нык игелекле кеше иде, волейбол уйнады, мәктәптә егетләр такымында уйнады. Сәяхәт итәргә һәм матур күренешләрне фотога төшерергә яратты. Армиядән кайткач, тормыш итәргә, башкалар кебек яшәргә теләде. Сугышырга теләмәде, — дип сөйләде ул.
Кремль курсанты
Антоновны үтерүдә гаепләнгән Александр Емельянов тумышы белән Ижаудан. Элегрәк "Вот Так" басмасы аны 2023 елда Мәскәү югары гомум гаскәр команда училищесы (МВОКУ) курсанты саналган дип язды. Училищега кадәр Емельянов Ижауда "Гармония" мәктәбенең кадет сыйныфында укыган һәм кадет сыйныфлары арасында хәрби бәйгеләрдә даими җиңеп килгән.
Артем Антонов үтерелгәннән соң, Astra телеграм каналы лейтенантны тоткарлау турында язды. Ул гаебен таныган, срочникка ялгыш аттым дип белдергән.
Уссурийски гарнизон хәрби мәхкәмәсе сайтында Александр Емельянов турында мәгълүмат бар. Ул Русия җинаять кодексының 349нчы 2нче бүлеге ("Корал тоту кагыйдәләрен бозып, ялгышлык белән кеше үтерү) нигезендә гаепләнә. 2025 елның 28 гыйнварында эш мәхкәмәгә кергән. Беренче утырыш 7 февральгә билгеләнгән.
— Артемийның әнисенә һәм абыйсына мәхкәмә көнен алдан әйтмәгәннәр, — дип сөйләгән Idel.Реалии"га гаиләнең танышы ("теләнмәгән оешмалар" кануны сәбәпле редакция аның исемен язмый). — Утырыш көнендә шалтыратып, мәхкәмә ябык тәртиптә узды, сезне чакырып тормаска булмадык дигәннәр. Артемийның әнисе моңа ризалашмады, Татарстан сәгатенә яраклаштырып утырышны күчерүне сорады.
Туганнары яңа мәхкәмә утырышы турында алдан әйтүне сораган, әмма соңрак аларга мәхкәмә бөтенләй булмаячак дип хәбәр иткәннәр.
— Үтерүче Русия саклану министрлыгы белән килешү төзегән, — диде Антоновларның танышы.
Аның сүзләренчә, Александр Емельянов Артем Антоновның туганнары шалтыраткан һәм "зыянны каплау турындагы шикаятьне" кире алуны сораган.
— Җинаять эшен беркемгә дә күрсәтмәделәр, хәтта иң якын туганнарына да. Мәгълүматны сер итеп саклау турында документ имзалаттырган диләр. Тикшерүче дә эшне бик яхшылап күзәтеп тора: Артемның абыйсына журналистлар белән сөйләшмәскә куша, үземә дә басым ясыйлар дип аклана, — дигән танышы.
Быел 19 февральдә мәхкәмә сайтында Емельяновның карточкасында "җинаять эше тукталып тора" дигән язу барлыкка килде.
"Idel.Реалии" Александр Емельянов белән Вконтактеда элемтәгә кереп карады, ул хәбәрне укыды, ләкин кайдалыгы турында җавап бирмәде.
- Русия Украинага каршы сугышын 2022 елның 24 февралендә башлады.
- Мәскәү Украинага бәреп кергәннән бирле һәр ел саен Русия хакимиятләре язгы һәм көзге чакырылышта гаскәргә алынасы солдатларның якыннарын "аларны сугышка җибәрмәячәкләр", дип ышандыра.
- Сугышның беренче көннәрен искә төшерсәк, ул вакытта да хакимият "срочниклар" сугышка җибәрми дигән иде. Тиздән бәйсез медиа һәм хокук яклаучылар "срочникларны" контракт имзалауга мәҗбүр итү һәм аларның Украинада һәлак булуы турында мәгълүмат бастыра башлады. 9 мартта Саклану министрлыгы "срочникларның" Украинада әсир төшүен таныды. Бу белдерүдән соң Путин хәрби прокуратурага Украинага срочниклар җибәрелү очракларын тикшерергә кушты.
- Курски өлкәсенә Украина гаскәрләре кергәннән соң, Башкортстанның 11 "срочнигы" хәбәрсез югалган иде.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
