Cırçı Aydar Galimov: “Min här adımım öçen cawaplılıq totam. Ämma cawaplılıq öskä zur yök bulıp yatmasqa tieş”,- di.
25 nçe ğinwardan 8 nçe fevral'gä qädär Aydarnıñ Tömän ölkäsenä säfäre däwam itte. Arba taqqan zur avtobus belän alar şatırdap torğan salqınğa törengän qotıp çigendäge Yaña Urengoy, Nadımğa qädär barıp cittelär. Barı tik qış köne genä salına torğan yullar aşa, bu yaqlarda anı zimnik dilär, meñ yarım çaqrım tundra aşa ütep, moña qädär berqayçan da oçraşmağan, ämma anı yaxşı belgän cır söyüçelärgä moñnarın iltte ul. Anıñ 15 yıllıq icatına bağışlanğan konsert programmasın yıl da kötep tora torğan Surğut, Tübän Varta, Neft'yugansky häm başqa qalalarda yäşäwçelär dä qaradı. Bu yaqlarğa säfäreneñ soñğı noqtası Tömän filarmoniäse ide.
Tömän tamaşaçısı büläk itkän çäçäklärneñ küpçelege qızıl rozalar ide. Cırlar tezmäse eçendäge “Qızıl rozalar” nı başqarğan waqıtta roza çäçäklären yuğarı kütärep bolğap sälämläp utıruçılar da buldı. Konsert axırındağı “Berläşik” cırı yañğırawğa filarmoniägä kilgän meñ tamaşaçı torıp bastı. Annan soñ bergä räsemgä töşülär, avtograf alular başlandı. Bu da Aydar öçen zur cawaplılıq.
3 yäşlek Aydar Sagitov Aydar Galimov belän räsemgä töşte. Keçkenä Aydarğa isemne cırçını bik yaratqanğa quşqannar ikän. Avtograf alırğa kilüçelär cırçıdan: “Ulım tudı dip äyttegez, ämma isemen äytmädegez”,- dip näsel däwamçısınıñ Daniär ikänlegen dä belä aldılar. Tömän yaqlarına cır sänğäteneñ qayber yañalıqları soñraq kilep ireşä şul. Aydar Tömän tamaşaçısın tağın urtaqlıq belän ğäcäpländerde. “Sezneñ ölkäneñ başlığı Vladimir Vladimiroviç. İl başı da şulay bit. Bu tikkä tügelder”,- dide ul.
Bu yulı da Aydar uzğan konsert programmalarına tuğrılıqta üze belän yäş cırçı alıp çıqqan ide. İlgiz Sägıytov qayçandır Aydar Galimov uqığan Ufadağı maşina yörtüçelär texnikumı, bügen isä kölliät studentı ikän. “Qaysı yaqqa kitärgä soñ isäp: cır sänğätenäme, ällä texnikağamı?”- digän sorawğa ul: “Üzem dä belmim”, -dip cawap birde. Tömän tamaşaçısı İlgiz başqarğan cırlarnı kötkängä qarağanda da köçleräk alqışlarğa kümde.
Alda Aydar Galimovnıñ cır teatrın yaña säfärlär kötä. Ber qayçan da kürenekle “yoldızlar” barırğa cörät itmägän Omski qalasına yul salırğa teläü dä Aydar Galimov öçen zur cawaplılıqtır.
Nail Alan,Tömän