Соңгы елларда республикада бал ярминкәләре ел дәвамында берничә тапкыр оештырыла. Аларның беренчесе бал кортлары җәй буена җыйган татлы ризыкны умартачылар аертып алгач уздырыла. Әлеге ярминкәнең максаты – умартачыларны берләштерү. Шулай да иң мөһиме – халыкны югары сыйфатлы бал белән тәэмин итү. Оештыручылар “кечкенә хуҗалыклардан балны җыеп алучыларга ышаныч юк, биредә кеше кемнән сатып алганын күрә, белә” дигән фикердә.
Әлеге фикерне ярминкәгә беренче тапкыр килүче Хәдичә апа Гаффарова да ассызыклап үтте. Үзләре ел саен танышлардан сатып ала икән. Шулай да, танышлар арасында да хәрәмләшү булуы мөмкин”, дип әйтте Хәдичә апа.
Ярминкәнең беренче көне – мәйданда халык бал кортлары кебек мыж итеп тора. Биредә ел саен бал сатып алучылар үзләренең инде таныш умартачылары янына килеп, кышка җитәрлек бал ала. Кемдер бирегә очраклы рәвештә мәйданнан, кемдер танышларыннан ишеткән, кемдер игълан күреп, ярминкәгә килгән.
Шундыйлардан Өммәһәния апа Гәрәйшина. Өммәһәния апа үзәк мәйданнан ерак тормый. Башта танышып чыгарга булган. Ул да уразада. “балны кабып карап булмый, шулай да караштырам”, дип уртаклашты ул.
Шундый ярминкәләр бик кирәк дип саный ул. Үзе башка елларны балны танышларыннан сатып алса да, барлык кешеләрнең дә бал кортлары тоткан танышлары юк, алар өчен килеп алырга мөмкин дигән фикердә.
Кортчылык белән шөгыльләнүчеләрнең, дөрестән дә, проблемнары җитәрлек. Гөлсинә Дыгаева әйтүенчә, бал кортлары бик күп игътибар таләп итә, эше бик мәшәкатьле. “Икенчедән, без елның күп өлешен урманда, табигатьтә уздырабыз. Умартачылык урман уртасында урнаштырылган”, диде Гөлсинә Дыгаева.
Дыгаевлар үзләре кортчылык белән күп еллар шөгыльләнә. Чыгымнары да бик күп, әмма гаилә белән табигатьтә булу аларның күңеленә хуш килә. Умартачылык – тормыш иптәше Анатолийның бабасыннан калган шөгыль.
Бал – дәва. Бу татлы ризык күп булса, халкыбыз да сәламәт булыр.
