Ижау шәһәренең 107нче балалар бакчасы кышкы бизәкләргә күмелгән. Капка төбеннән үк кыш фасылына туры килгән матур рәсемнәр, боздан ясалган сыннар каршы ала. Балалар рәхәтләнеп шунда юана. Ул гына да түгел, уйнау бүлекләрендә балаларны тагын да кызыклы сыннар, кардан таулар, уенчыклар көтә.
Малайлар-кызлар кышның суыкларыннан бердә курыкмый. Саф һавада уйнарга чыгу – алар өчен сөенеч. Һәр төркемнең үз җир бүлемтеге матур итеп бизәлгән. Анда аларга төрле уеннар уйнарга мөмкин: кемнең күңеленә нәрсә хуш килә – барысы да әзер.
Балаларны физик яктан чыныктыру өчен дә боздан ясалган төрле фигураларны кулланып була.
Малайлар-кызларны кечкенәдән эшкә өйрәтүне дә күздә тоталар бакчада. “Шуңа да өлкәннәргә булышу өчен уенчыклар белән беррәттән, кечкенә генә эш кораллары бар”, диде бакча мөдире Бриллиант Абдрахманова.
Малайлар-кызлар уеннар белән генә мавыкмый, һәр ел фасылына кагылган әйтемнәр, сынамышларны да өйрәнә. Шулай итеп балалар уен аша ел фасылының сынамышлары белән таныша, уен рәвешендә алган белем балалар күңелендә яхшы саклана дигән фикердә татар теле белгече Ләйсирә Йосыпова.
Шунда ук татар теле белгече Ләйсирә Йосыпова балалар белән уеннарны да кабатлап ала.
Кышкы суыкларда да балаларны саф һава сулатып кына калмыйлар, алар шунда белем дә туплый. Урамда чын-чынлап суык көннәр хакимлек итә. Әмма балалар эссе кояш астында кызарып пешкән алмадай. Димәк, көчле рухлы, физик яктан сәламәт балалар үсә.
