Каршылык чарасы урам йөреше белән башланды. “Юбилей” мәдәният сарае каршында җыелган халык тротуарлар буйлап башкаланың Ленин мәйданына килде.
Биредә полиция аларны тимер коймалар белән әйләндереп алган урынга берәм-берәм тикшереп кертте.
Урам җыенында ясалган чыгышларда илгә демократия урнаштыру кирәклеге, гадел сайлаулар үткәрү зарурлыгы турында сүз барды, президент итеп Владимир Путинны сайламаска чакырылды. Әлеге таләпләр резолюциягә дә кертелде.
Каршылык чарасын “Уфа тавышы”, “Сул фронт” хәрәкәтләре, “Яблоко” фиркасе бүлекчәләре оештырды. Чарада Башкортстан татар иҗтимагый үзәге вәкилләре дә катнашты.
