Биш сыннан торган композиция баскычтан күтәрелеп баручы укытучы һәм аның укучыларыннан тора. Әлеге сынны Сергей Соломаха белән Александр Емаевка каләмнән сынга җиткерү өчен ел да өч ай кирәк булган.
“Укытучыга һәйкәл кую – күркәм эш, мин моны күптәннән көттем”, дип сүзен башлады әлеге сынны карарга килүче, кырык елдан артык гомерен балалар тәрбияләүгә багышлаган 81 яшьлек Ләлә ханым. Өстәвенә, ул әле укытучылар нәселеннән.
Сын артындагы диварларда аерым таш такталарда төбәктәге иң яхшы укытучыларның исемнәре күрсәтелгән. Анда милләттәшләребезнең исемнәре дә күп.
