Финляндия татарлары моңарчы чыгып килгән газетаны журнал итеп бастырды. Узган гасырның 50нче елларына кадәр татарлар үз хәбәрләрен нәкъ журнал итеп чыгарып килгән. “Мәхәллә хәбәрләре"нең яңасы җирле татарлар тормышына багышланган, 24 сәхифәдә рәсемнәр һәм файдалы мәгълүматлар урын алган. Аның беренче нөсхәсе 800 данә булып чыкты.
“Мәхәлләнең ихтыяҗларын канәгатьләндерер өчен безгә бу җитә. Финляндия татарлары мәхәлләсе вәкилләре бит төрле илләрдә дә яши, без Германия, Австралиягә, башка илләргә җибәрәбез, шулай ук илнең кануннары нигезендә бу журнал мондагы китапханәләрдә булырга тиеш”, дип сөйләде Азатлыкка басманың баш мөхәррире Рамил Билал.
“Кулга алып укырга телибез”
Дөнья буйлап басма чаралар бетеп мәгълүматлар бары тик интернетта урнаштырылган бу чорда Финляндия татарлары элек чыгарып килгән газетаны киңәйтеп, аны журнал итеп чыгара башлады.
