Башкортстанда башкорт телен латин имласыеа күчерүне тәкъдим итәләр. Бу хакта Proufu басмасы яза. Башкорт педагогия университетын тәмамлаган Динар Мансуров яңалиф кулланырга тәкъдим иткән. Моның өчен ул башка телләрнең әлифбаларын өйрәнгән, махсус хезмәт әзерләгән.
"Бездә көчләп бирелгән түгел, үзебезнең әлифба булуын телим. Халыкка альтернатива бирергә кирәк, кешеләр үзләре әлифбаның өстенлеген күреп, аны ихтыяри куллана башласын. Телләр турында канунны кабул итсәләр, безнең инде югалтасы нәрсә юк", дип китерә аның сүзен басма.
Мансуров тәкъдимен "Башкорт" оешмасы да хуплаган. Алар фикеренчә, латин язуы башкорт авазларын яхшырак бирә, шулай ук алдынгы илләр дә латин язуын куллана. "Хакимият күптән милли телләр турында кайгырмаганда, республикаларга инициативаны үз кулына алырга кирәк", дип саный оешма.
1930-1939 елларда башкорт теле яңалифне кулланып алган иде. 1940 елда, Сталин әмере белән барлык милли телләр кебек үк, башкорт теле дә кирилл әлифбасына күчерелә.
