Уфаның Төньяк зиратында COVID-19 диагнозы белән үлгән кешеләр өчен аерым ике җир кишәрлеге билгеләп куелган. Бу турыда Коммерсант “Махсус хезмәт күрсәтү комбинаты” ширкәте вәкиле сүзләренә сылтанып хәбәр итә.
Зиратта бу очраклар өчен бер мең кешелек урын әзерләнгән. Шуларның яртысы мөселманнар өчен, яртысы христиан динендәгеләр өчен диелә.
Коронавируслы кешеләрне җирләү өчен махсус кагыйдәләр булдырылган. Аларны Мәскәүдә һәм Европада шундый төр җирләүләр тәҗрибәсенә таянып әзерләгәннәр. Аерым алганда, җирләү чарасына мәрхүмнең якын туганнары гына кертелә, җәсәд ябык табутта җирләнә.
