Сугышка каршы чыгучылар Варшаудагы Русия илчелегенә табут һәм эт оясы
13 апрель кичендә Польша башкаласындагы Русия илчелеге каршында чүп өеме барлыкка килде. Сугышка протест белдерүчеләр, шул исәптән украиннар, поляклар, татарлар, беларуслар һәм урыслар да илчелекнең ишек төбенә көнкүреш техникасы, келәмнәр, уенчыклар һәм эчке кием алып килеп ташлады.
Русия хәрбиләренең Украинадагы өйләрдән күпмедер кыйммәте булган бөтен әйберне — көнкүреш техникасыннан алып эчке киемгә кадәр — талап, Русиягә озатуы турындагы күпсанлы дәлилләргә Варшаудагылар шулай итеп протест белдерде.
Сугышка каршы чыгучылар Варшаудагы Русия илчелегенә табут һәм эт оясы китергән
Русия президенты сүзчесе Дмитрий Песков белдерүләре:
- Путинга "Москва" крейсерында янгын турында хәбәр ителгән. Әлегә мөмкин булган нәтиҗәләр турында шәрехләр юк.
- Кремльдә Украина белән сөйләшүләр дәвамы перспективасы турында мәгълүмат юк.
- Кремль Медведевның Швеция һәм Финляндиянең НАТОга ихтимал керү турында фикерләре белән риза. Медведев бу Балтиканың атом-төш коралсыз статусын бетерәчәк дип белдергән иде.
Русия "Москва" крейсерында янгын турында каршылыклы мәгълүматлар бирә
Федераль каналлар һәм Русия саклану министрлыгы "Москва" крейсерында янгын турында хәбәр итми, хакимият яклы телеграм каналларда исә мәгълүмат гел үзгәреп тора.
РИА Новости һәм ТАСС Русия саклану министрлыгына сылтанып, янгын чыкканын язды, сәбәп булып хәрби запасларның шартлавы атала. Ләкин саклану министрлыгының рәсми аккаунтларында мондый аңлату юк.
Журналист Олег Кашин сүзләренчә, төнлә үк Саклану министрлыгы хәбәр оешмаларына биргән мәгълүмат үзгәреп торды. Мисал булачак, башта "боезапас" шартлавы турында әйтелсә, аннары ул "боеприпаска" әйләнде. Кеше санына караган мәгълүмат та үзгәрде: башта "ТАСС" экипаж "тулысынча" эвакуацияләнгән дисә, аннары хәбәрдән "тулысынча" сүзе юкка чыккан.
"Москва" крейсеры – Русиянең Кара диңгездәге флотының флагманы булып тора. Анда 500ләп кеше хезмәт итә.
Киев крейсерга "Нептун" ракетлары белән һөҗүм иткәнен белдерә.
Казанда сәүдә үзәкләренә халык азрак йөри башлаган
Апрельнең беренче ун көнендә Казанның сәүдә үзәкләренә килүчеләр саны, узган ел белән чагыштырганда, 16 процентка кимрәк булуы ачыкланган.
Белгечләр моны Русиянең Украинадагы сугышы сәбәпле чит ил ширкәтләренең китүе һәм халыкның кереме азаюы белән бәйли.
Быел "Үлемсез полк" чарасы урамда узачак
3 елда беренче тапкыр бу чара урамда узачак. Моның хакта оештыручыларның берсе, генерал-полковник Сергей Макаров хәбәр итте. 2020 һәм 2021 елларда "Үлемсез полк" чарасы пандемия аркасында онлайн узган иде.
Элегрәк Казан башкарма комитеты "Үлемсез полк" чарасы шәһәрнең үзәк урамнарында узачак дигән иде.
БМО: Украинадагы сугыш Җир шарының биштән бер өлешенә ачлык һәм фәкыйрьлек куркынычын тудырачак
Русиянең Украинага сугышы 1,7 миллиардка кадәр кеше ачлык, ихтыяҗ һәм фәкыйрьлек хәлендә калуына китерә ала. Бу Җир шарының биштән бер өлешеннән зуррак сан, дип белдерде БМО генераль сәркатибе Антониу Гутерриш.
Украина һәм Русиягә дөньяда бодай һәм арпа җитештерүенең 30%, кукуруза җитештерүенең биштән бер өлеше һәм көнбагыш мае җитештерүенең яртысыннан күбрәге туры килә. Бу ике илдән аеруча икътисадлары көчсез булган илләргә экспорт бара.
Британ күзләү хезмәтенең сугыштагы вазгыять турында көнлек хисабы:
- Путинның сишәмбе көнне ясаган чыгышы аның Донбасска зур кызыксынуы калуын күрсәтә. Русия Донбасста украин хәрбиләренә бәрүен дәвам итә һәм яңа һөҗүмгә әзерләнә.
- Низаг дәвамында эре шәһәрләр даими һөҗүмнәргә дучар була. Мөгаен, Краматорск белән Константиновка Русия гаскәре өчен яңа максат булачак, анда да гади халыкка көч куллану очраклары булырга мөмкин.
- Күпләп ракет һәм артиллерия һөҗүмнәрен куллану Русиянең элекке хәрби доктринасына кайтуны аңлата. Ләкин бу зур көч таләп итәчәк. Мариуполь өчен дәвам иткән көрәш шактый Русия хәрбиләрен тотып тора.
Ozon кунакханәләрне эзләү агрегаторын эшләтеп җибәрде
Русия ширкәте ил буйлап һәм "барырга мөмкин булган илләрдә" кунакханәләрне сайларга тәкъдим итә. Сайтта 70 меңгә якын тәкъдим урнаштырылган, ди алар. Түләүне Русия банк картасы белән башкарырга мөмкин, дип белдерә Ozon Travel.
Элегрәк Украинага һөҗүм аркасында Русиядән иң зур һәм популяр хезмәтләр – Booking.com белән Airbnb китте.