Татарстаннан активист Артур Гыйматдинов ун тәүлеккә кулга алынган
Аны Казанда 6 мартта узган сугышка каршы чарада катнашканы өчен административ җаваплылыкка тартканнар. Тулырак монда укырга мөмкин.
Русиядән тагын бер зур кибет китә. Германиянең OBI ширкәте кибетләрен ябу турында белдерде. Казанда халык әйберләр алып калырга ашыга. OBI Русиядә 2003 елдан бирле эшли иде. Моңа кадәр Русиядә ИКЕА кибетләре ябылды.
"Эхо Москвы" урынына Sputnik дәүләт радиосы
Хәрби цензура аркасында ябылган “Эхо Москвы” радиостанциясе ешлыгында Мәскәүдә Sputnik радиостанциясе эшли башлый. Ул “Россия сегодня” дәүләт холдингына керә.
Беренче эфир 9 мартка ниятләнә. Беренче көнне эфирга тышкы эшләр министрлыгы вәкиле Мария Захарова, дума депутаты Анатолий Вассерман һәм Кремль тарафлы блогерлар Герман Клименко һәм Дмитрий Пучков чакырылган диелә.
Украинада сугыш башланганнан бирле цензура аркасында дистәләгән матбугат чарасы ябылды яки томаланды. Алар арасында Азатлык Радиосы, Радио Свобода, "Настоящее время" телеканалы, "Америка авазы", Дождь телеканалы, Би-би-си, DW, Znak.com, The Insider һәм башкалар бар. Кимендә 150 журналист Русиядән китәргә мәҗбүр булды.
Мариуполь. Фотограф Евгений Малолетка фотолары
8 мартның кичке хәбәрләре
- "Русия кораллы көчләрен дискредитацияләү" маддәсе нигезендә Русиядә 144 административ эш ачылган.
- Европа комиссиясе Украинаны Европа берлеге энергия челтәрләренә якын арада кушарга ниятли.
- Германия икътисад министры ОПЕКтан нефть табуны арттыруны сорый.
- CNN һәм Bloomberg чыганаклары АКШ Русия нефте импортын тыю турында игълан итәчәк дип язды.
- Американың The New York Times газеты хезмәткәрләрен Русиядән чыгара. Бу Русия кораллы көчләре турында фейк тарату өчен җинаять эше ачуны күз уңында тоткан яңа канун кабул ителү белән бәйле.
- Йенс Столтенберг НАТО Русия белән низаг эзләми диде. Нато максаты – Украинадагы низагны аның чикләреннән чыгармау.
- Британия 2022 ахырына әкренләп Русия нефтеннән баш тартачак дип рәсми белдерелде.
Иртүккә төп хәбәрләр:
- Русия Үзәк банкы русияләр хисапларыннан чит ил акчасын чыгаруны чикли. Хисаптан бары тик 10 мең доллар чыгарып булачак, калганнарны сумнарда гына алырга мөмкин.
- Fitch агентлыгы Русия дефолты рейтингын "C"га төшергән. Бу күрсәткеч "дефолт котылгысыз" дигәнне аңлата.
- PepsiCo, Coca-Cola һәм Starbucks Русиядә эшен туктатуын белдерде. McDonaldʼs Русиядә барлык рестораннарын вакытлыча ябуын белдерде, ләкин хезмәткәрләргә хезмәт хакын түләргә дәвам итәчәген әйтте.
- Русия рәсми оешмалары сайтларын вакытлыча хакерлар яулап алган. Аларның төп битләрендә сугышка каршы рәсемнәр урнаштырылган.
- Британия ел азагына кадәр Русия энергия чыганакларыннан бәйсез булырга ниятләнә.
- АКШ күзләү идарәсе Русия армиясе Украинада 2-4 мең кеше югалткан дип саный.
Социаль челтәрләрдә Coca-Cola һәм PepsiCo-ның Русиядән китүе турында фикерләшәләр
Coca-Cola ширкәте Русиядә нинди эчемлекләр җитештерә иде?
- Coca-Cola, Fanta, Sprite, Shweppes, Bon Aqua, Powerade, FuzeTea, AdeZ, "Моя семья", Rich, "Добрый", Innocent, Pulpy.
PepsiCo Русиядә нинди эчемлекләр һәм ризыклар җитештерә иде?
- Pepsi, Mirinda, 7Up, Mountain dew, Aqua Minerale, "Любимый", "Я", "Фруктовый сад", J7, Adrenaline Rush, Drive, Lipton, "Русский дар" квасы, "Чудо-Ягода" морсы;
- Lay’s, Хрусteam, Cheetos, Doritos чипсылары;
- "Мажитэль", "Чудо", "Иммунэле", "Домик в деревне"; "Веселый молочник", "Ламбер" сөт продуктлары;
- "Агуша", "Чудо детки" балалар ризыклары.
Сөт һәм балалар ризыклары җитештерүе Русиядә калачак, дип хәбәр ителә.
Coca-Cola эчемлекләре Төньяк Корея һәм Кубадан тыш дөньяның барлык илләрендә рәсми сатыла.
БМО мәгълүматына күрә, 24 февральдән Украинада кимендә 474 кеше һәлак булган, аларның арасында балалар да бар.
Белгечләр үлгән кешеләр саны күпкә күбрәк булуын әйтә, бу беренчел һәм тикшерелгән мәгълүмат, ди алар. Корбаннарның күпчелеге ракет һөҗүмнәреннән һәлак булган.