Украина президенты Владимир Зеленский Русияне 9 мартта илнең көньяк-көнчыгышындагы Мариуполь шәһәрендә бала табу йортына һәм хастаханәнең балалар бүлегенә коточкыч һөҗүм ясауда гаепләде.
Русия хәрби очкычы бомбалавыннан биналарга зур зыян килгән, балалар да җимереклекләр астында калган диелә. Шәһәр шурасы бомбалау нәтиҗәләре видеосын Telegram-каналына чыгарды.
Рәсмиләр әйтүенчә, кимендә 17 кеше яраланган, алар арасында хатын-кызлар да бар. Һәлак булучылар турында хәбәр ителми.
Мәскәү Украинада бары тик хәрби корылмаларны гына утка тотуын әйтеп килә.
Сугышның 14нче көне тәмам. Төп хәбәрләр кыскача
- Украина президенты Владимир Зеленский Русияне Мариуполь шәһәрендә бала табу йортына һәм хастаханәнең балалар бүлегенә һөҗүм ясауда гаепләде. Кимендә 17 кеше яраланган
- БМО Украинада сивил халык арасында корбаннар санын китерде: 24 февральдән башлап 908 кеше яраланган, 516 кеше (шул исәптән 37 бала) һәлак булган
- Украинадагы сугышта Татарстаннан өченче хәрбинең һәлак булганы рәсми хәбәр ителде - Яшел Үзән районыннан полковник Дмитрий Сафронов
- Европа Берлеге санкцияләр исемлеген игълан итте. Анда Русия Федерация шурасында утырган Татарстан вәкилләре Ленар Сафин белән Геннадий Емельянов һәм Самар вәкиле Фәрит Мөхәммәтшин да бар.
- Русия саклану министрлыгы мәҗбүри хәрби хезмәткә алынучыларның да Украинадагы сугышка җибәрелүен раслады
- Русиядә "ят агентлар" белән бәйле затларның исемлеге төзеләчәк. Канунга төзәтмәне Русия думасы әзерли, аны тиешле комитет хуплаган
- Мәскәү биржасында доллар 120 сумга, евро 131 сумга җитте. Русия банкларында аларның бәясе тагын да югарыррак
10 март иртәсенә Русиядән китүләре турында белдерүчеләр:
- Mondelez International (Oreo, Alpen Gold, Cadbury, Milka, Toblerone) иинвестицияләр һәм реклам бирми башлый.
- Япониянең Epson ширкәте Русия һәм Беларуска тауарлар сатмый башлый
- Sony ширкәте PlayStation консолен сатуны һәм програм тәэминәтен туктата.
- Nintendo Co.ширкәте дә уеннар сатуны туктата.
- WarnerMedia (Warner Bros., CNN, HBO һәм HBO Max) Русиядә яңа контентка лицензия бирүне туктата
- Carlsberg Русиядә үзенең брендын сатмый башлы.
- Toyota Русиядә машиналар җитештерүне һәм илгә экспортны туктата.
- Mars Русиядә реклама һәм инвестицияләрне туктатып тора.
- Hilton һәм Hyatt кунакханәләре Русиядә бизнесларын үстерүне туктатып тора.
- YouTube Русия кулланучыларына монетизацияне туктатып тора. Моңа Premium, Music Premium-га язылучылар да, хәйриячелек, суперчат һәм суперстикерлар да керә.
Якын айларда татарстаннарның реаль керемнәре 10-15 процентка кимүе ихтимал. Бу хакта белгечләр фикеренә сылтама белән "Коммерсантъ" яза.
Икътисадчылар искәртүенчә, бу 2021 ел казанышларын тулысынча юкка чыгарырга мөмкин. Татарстанстат, узган ел нәтиҗәләре турында хисап тотканда, республикада яшәүчеләрнең реаль керемнәре 4 процентка артуын белдергән иде.
Белгечләр тагын ниләр фаразлаганын монда укырга мөмкин.
Мариупольдә балалар хастаханәсенә Русия очкычлары һөҗүме нәтиҗәсендә өч кеше, шул исәптән бер кыз бала һәлак булган.
Бу хакта 10 мартта Мариуполь дәүләт шурасы хәбәр итте.
Татарстаннан тагын бер сугыш корбаны
Чистай районының рәсми аккаунты Украинадагы сугышта Татарстаннан тагын бер хәрбинең үлүен хәбәр итте.
Кече сержант Семен Соловьев 1983 елда Чистай районында туган. Аннексияләнгән Кырымда яр буе сагында хезмәт иткән диелә. Шулай ук аның Украина гаскәрләре атышка тоткан чакта һәлак булуы хәбәр ителә.
Аны Кефедә (Феодосия) җирләячәкләр, Соловьевның өч баласы калган.
Русия Европа Шурасында катнашырга теләми, бу Страсбург мәхкәмәсе русияләрне якламаячак дигән сүзме?
Русия тышкы эшләр министрлыгы Мәскәүнең Европа шурасы эшчәнлегендә башка катнашырга җыенмавын әйтте, чөнки Көнбатыш илләре бу оешманың эшчәнлеген какшата дип белдерде.
Депутат Андрей Клишас Русия Европа Шурасыннан чыккач, русияләр Европаның кеше хокуклары мәхкәмәсенә мөрәҗәгать итә алмый диде.
"Агора" хокук яклау оешмасы җитәкчесе Павел Чиков исә клишаслар “дулкын гына җибәрә” дип саный. Европа Шурасыннан тиз генә чыгып булмый. Моның өчен башта Кеше хокукларын яклау конвенциясеннән баш тартырга кирәк. Моңа аерым канун кабул итү зарур. Әлеге канун кабул ителгән очракта Русия Европа Шурасыннан 2023 елның 1 гыйнварынна чыга алачак. Аңа кадәр Страсбург мәхкәмәсе гаризалар кабул итә ала, ә кабул ителгән гаризалар каралып бетәчәк, ди Чиков.
Uniqlo кием кибете Русиядән китмим дигән иде башта, хәзер китәм дип белдерде. Япония кибете Казанда һәм Уфада бар иде. Уфада әле 4 ай элек кенә ачылды.