Математик, Мәскәү дәүләт университеты аспиранты Азат Мифтаховка каршы террорчылыкны аклау турындагы җинаять эшен (Җинаять кодексының 205.2 маддәсе, 1нче өлеше) башка тоткыннар белән телевизордан тапшыру караган чакта белдергән фикерләре өчен ачканнар. Бу хакта аның адвокаты Светлана Сидоркинага сылтама белән “Медиазона” хәбәр итә. Тоткыннар телевизордан нинди тапшыру караган, Мифтахов нәрсә дип әйткән булган – монысы билгеле түгел.
Кичә, 29 августта Русия федераль иминлек хезмәте (ФСБ) тикшерүчесе Мифтаховка “террорчылык эшчәнлегенә чакыру маддәсе” нигезендә җинаять эше ачылу карарын күрсәткән. Бу хакта Сидоркина ТАССка сөйләгән иде.
Аның әйтүенчә, Мифтаховтан шикләнелүче буларак сорау алганнар иде. Азат адвокатыннан башка күрсәтмәләр бирүдән баш тарткан диелде.
Яшь татар галиме Азат Мифтаховка каршы җинаять эше ачулары 25 августта билгеле булды.
Ә аңа кадәр – 17 августта Росфинмониторинг Мифтаховны экстремистлар һәм террорчылар исемлегенә кертте. Математикка каршы яңа җинаять эшен ни сәбәпле ачулары билгеле түгел иде.
Мифтаховны 2021 елның гыйнварында хулиганлык турындагы эш нигезендә алты елга гомуми тәртипле колониягә хөкем иткәннәр иде. Былтыр апрельдә кассация мәхкәмәсе аның җәза мөддәтен биш ел тугыз айга калдырды. Математик Киров өлкәсенең 17нче төзәтү колониясендә утыра. Галим 2023 елның 4 сентябрендә иреккә чыгарга тиеш, әмма аны якыннары аны азат ителгәч тә, кабат тоткарларга мөмкиннәр дип сагая.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум