27 апрель Истанбулда Идел-Урал төркиләренең мәдәният һәм ярдәмләшү җәмгыяте шигърият бәйрәмен уздырды. Ул татар шагыйре Габдулла Тукай туган көненә багышланды һәм шәһәрнең Топкапы паркында урнашкан Татарстан музей-йорты янында оештырылды.
Чарага 40тан артык кеше җыелды, катнашучыларның күпчелеге — балалар. Чарада Истанбулда яшәүче татар галимнәре дә килгән иде. Аерым алганда Ләйсән Шаһин, Булат Рәмиев Тукай белән бәйле файдалы вә кызыклы мәгълүматлар җиткерде. Танылган журналист, элек "Татарлар" тапшыруын алып баручы Флюра Абдуллина да чарада катнашып сәламнәрен җиткерде.
Бәйрәмдә балалар шигырьләр сөйләде, җырлар башкарды, Тукай һәм аның шигырьләренә бәйле сорауларга җаваплар бирде.
Чарага килүчеләрнең күпчелеге милли киемнән булды. Чарада катанашучы балаларга барысына да истәлекле бүләкләр, дипломнар тапшырылды. Шигърият бәйрәменең беренче өлеше "Туган тел" җырын башкару белән тәмамланды. Аны барысы да аягүрә басып башкарды.
Истанбулда шигърият бәйрәме узды
Бәйрәм Истанбулдагы "Kazanda by Evran" рестораны әзерләнгән милли ризыклардан торган табын янында дәвам итте. Кунаклар өчпочмак, чәкчәк, пәрәмәч, мәтрүшкәле чәй белән сыйланды.
Өйләдән соң балаларга остаханәләр оештырылды. Алар милли бизәкле түштамгалар ясады, өлкәннәргә исә Тукайга бәйле квиз уздырылды.
Тукай бәйрәмендә быел "Идел-Урал үзәге" җитәкчесе Гөлтан Ураллы була алмады, хаста булу сәбәпле үзе чарада катнаша алмады. Шулай да ул килгән татарларны видеоэлемтә аша бәйрәм белән котлады, сәламнәрен җиткерде. Җыелган халык аның чыгышын алкышларга күмде.
Иртән исә Истанбулның Тукай паркында урнашкан шагыйрь һәйкәленә чәчәкләр салынды. Анда татар активистлары һәм Төркиядәге Татарстан вәкиллеге хезмәткәрләре катнашты.
- Быел Төркиядә Габдулла Тукайга багышланган берничә чара узды. 22 апрельдә Әнкарада татар шагыйре Габдулла Тукай Хаҗи Бәйрәм Вәли университетының Евразия һәм төрки дөньяны тикшерү үзәгендәге фәнни рәвешендә искә алынды.
- 26 апрель Анталья "Төрк оҗаклары" үзәгендә "Тукай. Шигырь. Курай" кичәсе узды. Бәйрәмдә катнашучылар Тукай шигырьләрен укыды.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум