Kärim Tinçurin isemendäge teatrnıñ yanğınnan soñ tuğan problemaları kebek uq bulmasa da, küpçelek mädäniät uçaqları remontlaw, üzgärtep qoru kiräklege kebek mäsälälärgä daimi oçrap tora. Küptän tügel genä, Qazan däwlät konservatoriäsendä binanıñ iskelege arqasında kisken xäl tuğan ide, bina cimerelä başladı. Bu mädäni uqu yortın remontlarğa aqça federal üzäktän birelergä tieş, dip xäbär itelde. Ğomumän alğanda, mädäniät ölkäsendä eşläwçelär aldında, aqça eşläw ısulların tabarğa, mädäniät häm sänğät yılın yuğarı däräcädä ütkärü häm başqa mäs’älälär tora.
Mädäniät xezmätkärläreneñ 1000 yıllıq yılında eşläre niçek küp bulsa, bıyl da, kimräk bulmayaçaq. 2006 yıl Tatarstanda mädäniät häm sänğät yılı itep iğlan itelüe turında xäbär itkän idek. Ul yılda ütkäreläse çaralar inde bilgelängän, alarğa byudjettan 112 million sum bülep birelgän. Xäzerge waqıtta, Rusiä häm Tatarstannıñ törle şähärlärendä Musa Cälilneñ 100 yıllığına bağışlanğan çaralar uzdırıla. Ä aprel-maydan başlap, Tuqaynıñ 120 yıllığın bilgeläp ütü başlana. Şiğriät bäyrämen bıyıl, poeziä festivale itep ütkärü planlaştırıla, Tatar teatrınıñ 100 yıllığın uzdıru, kitaplar bastıru, Şekspir äsärlären tatarçağa tärcemä itep, cıyıntıq çığaru, şulay uq Sara Sadıqovanıñ 100 yıllığı, Röstäm Yaxinnıñ 85 yıllığın, Motsartnıñ 250 yıllığın bilgeläp ütü dä qaralğan.
Nigezdä, xakimiätlär byudjettan yarılğan aqçalarnı, awıldağı mädäniät yortların yañartu, remontlawğa totarğa cıyınalar ikän. Tatar yäş tamaşaçılar teatrın rätkä kiterü häm Kaçalov isemendäge rus drama teatrları yañartuğa möxtac teatrlar isemlegendä berençe urında tora. Ämma, Tatar qurçaq teatrın tözügä tieşle aqçalar äle bülep birelmägän ikän häm ul tözeleş mädäniät sänğät yılınıñ finans planına kermägän. Ämma, mädäniät ministrlığınıñ yıllıq utırışında äytelgänçä, aqça tabu öçen başqa çığanaqlar da bar. «Miras» däwlät programması eşlänä, federal üzäktän dä aqça alu mömkin ikän.
Mädäniät-sänğät yılında mädäniät xezmätkärläre cilkäsenä cawaplı eşlär yata, ämma bu ölkädä eşläwçelärneñ eş xaqı, başqalar belän çıdaştırğanda iñ tübäne ikän. 3 meñ sum tiräse. Yäş belgeçlär sotsial ipoteka programmasında da qatnaşa almıylar, şuña kürä, mädäniät ministrı xökümät räise aldında, yäşlärğä toraq yort tözep birü mäsäläsen quydı. Ä inde uñışlı eşläwe belän dan qazanğan «La Primavera» orkestrı citäkçese Röstäm Äbyazovqa häm Kamal teatrı baş rejisserı Färit Bikçäntäyıvqa şähär üzägendä, däwlät fatirlar büläk itte.
Ä eş xaqın kütärergä xakimiätlär wäğdä itmädelär. Teatrlar, konsert zalları häm başqa şundıy mädäni uçaqlarğa üzlärenä aqça eşläw yulların ezlärgä täqdim ittelär.
Bikä Timerova.
