Yekaterinburg şähäreneñ kamera teatrı binasında bu könnärdä ğädäti bulmağan dulqınlandırğıç waqiğa bulıp uzdı – biregä kilüçelär Moabit däftärläreneñ töp nösxäläre belän tanışa aldılar.
Bu çara Tatarstan respublikası mädäniät ministrlığı häm Yekaterinburg şähäre mädäniät idäräseneñ üzara kileşüe näticäsendä Ural yazuçıları muzeye häm Qazan şähäreneñ Musa Cälil muzey-fatirı tarafınnan oyıştırıldı. Ural yazuçıları muzee direktorı urınbasarı Rämziä xanım Ğälieva äytüençä, bu qäderle eksponatlardan torğan kürgäzmäne oyıştıru şağirneñ tuuına 100 yıl tuluğa häm Ural yazuçıları muzeyena 60 yıl tulu datasına bağışlandı.
Moabit däftärlären qararğa kamera teatrı zalına küp kenä xalıq cıyılğan ide. Qazan şähäre Musa Cälil muzey-fatirınıñ ölkän fänni xezmätkäre Näzirä Fättäxova cıyıluçılar aldında şağirneñ suğışqa qädärge tormışı, suğış waqıtında kiçergän qotoçqıç waqiğalar, anıñ icatı turında bik mawıqtırğıç, qızıqlı çığış yasadı. Annan soñ kiçäneñ ädäbi-muzıkal' öleşe buldı. Tamaşaçılar Tatarstannıñ xalıq artistı Emil Cäläletdinov çığışın bik cılı qarşı aldılar.
Kiçäneñ axırında Näzirä xanım Fättäxova eşlägän eştän bik qänäğät qaluın belderde. “Tamaşaçılarnıñ bezne şulay cılı qarşı aluı, eksponatlarnı bik qızıqsınıp qarawı, Moabit däftärlärenä bötenläy mökibbän kitüläre diimme, bezneñ eşebezneñ kiräkle ikänlegen tağın ber tapqır kürsätte”, - dide ul.
Tamaşaçılar, çınlap ta, bu waqiğanı bik dulqınlanıp qarşı aldılar. Ğäliä xanım Ujan, mäsälän, bu kiçägä dip maxsus Sredneural'ski şähärennän birle kilgän. Ul üzeneñ biredä bik küp qızıqlı äyberlär belän tanışuın äytte, häm, kürgäzmä ber genä kön bulğanlıqtan, monda kilä almağan keşelär öçen ükeneç belderde.
Cälilneñ isemen mäñgeläştergän Moabit däftärläreneñ Yekaterinburg şähärendä bulıp kitüe şulay itep urallılar küñelendä zur tä'sir qaldırdı.
Fäwiä Safiullina,Yekaterinburg
