10 may könne Rusiä deputatları, töbäk citäkçeläre, ministrlar häm 300 jurnalist qarşında Vladimir Putin yıllıq yullama belän çığış yasadı. Mäskäw kremleneñ märmär zalında ütkän Federal' cıyını utırışında Tatarstan prezidentı Mintimer Şäymiev ta qatnaştı. Rusiä prezidentınıñ yullamasında Rusiädä xalıq sanı kimü iñ kisken problema buluı turında äytelde.
Moña qarata şundıy täqdimnär äytelde. Äytik, balanı qarağan öçen aylıq aqçalata tüläw külämen 700 sumnan 1500 sumğa qädär kütärergä, ä ikençe bala tusa, 3000 sumğa qädär arttırırğa kiräk dip sanıy Putin. Şulay uq ikençe bala tuğan waqıtta, däwlät xatın-qızğa 250 meñ sum tülärgä tieş bula, Putin bilgeläp ütkänçä, balalar öçen mäktäptä tuqlanu çığımnarın qaplaw sistemasın tözergä kiräk. Ber bala bulğanda, däwlät çığımnarnıñ - 20 protsentın, ikençe bala tusa - 50 protsentın, öçençe bala tusa, 70 protsentın kompensatsiä räweşendä tülärgä. Vladimir Putin opekunnarğa häm asramağa alğan ğailälärgä balanı qarağan öçen birelä torğan tüläwlärne 4,5 meñnän dä kim bulmağan summağa arttırırğa täqdim itä. Anıñ fikerençä, Rossiädä demografik wäzğıätne yaxşırtuğa yünältelgän programmanı finanslawnı 2007 yılnıñ 1 ğinwarınnan başlarğa kiräk.
Älbättä bu Rusiä Prezidentınıñ xalıq aldında yaxşı tä'sir qaldıru öçen yasağan belderüe. Çınnan da demografiä turında borçılğan citäkçelär ällä qayçan balalarğa, analarğa kübräk iğtibar itä alğan bulır ide. Şulay da älege proyektnı Tatarstanda qızıqsınıp qarşıladılar.
10 may könne Rusiä prezidentı yullamasında ildäge demografik wazğiät bik kisken dip tabıldı häm Putinnıñ şuşı täqdimnäre xaqında bala tabuçı xatın-qızlar belän turıdan-turı eşläwçe tabiplar ni uylıy soñ? Bu xaqta bez Qazan şähäreneñ 1 xatın-qızlar konsul’tatsiäse akuşer-ginekologı Dilärä Latıpovadan soraştıq.
Xatın-qızlar bäbi tabarğa qurqalar, çönki, berençedän, alarnıñ kiläse köngä ışanıçı yuq. İkençedän, material’ yaqtan tilmermägän xatın-qızlar üz ireklegen yuğaltırğa telämi. Öçençedän, xäzer bit irlär bik ışanıçlı tügel, tulı, nıq ğailälär sanı da kimi bara. Törle ğailälär bar. Baylar alar xökümätkä qarap tormıyça da taba inde. Ä menä küpçelekne täşkil itkän urta xälle ğailälär öçen Putinnıñ täqdimnäre yaxşı, dip sanıym. Ul wäğdä itkän tüläwlär ber öleş xatınnarnı bala tabarğa etäräçäk, dip uylıym. Bu tüläwlär çınbarlıqta da wäğdä itelgänçä bulsa inde, älbättä, alar süzdä genä qalmasa. Putinnıñ bu süzlären bez, xatın-qızlar belän eşläwçe tabiplar da, bik şatlanıp, ömetlänep tıñladıq
Bu Qazan şähäreneñ 1 xatın-qızlar konsul’tatsiäse akuşer-ginekologı Dilärä Latıpovanıñ Putinnıñ yullamasında yañğırağan Rusiädä demografik xälne yaxşırtu, balalar tuuına kübäytü yulları xaqında üz fikerläre ide.
Gölnaz İlgizär, Gölnaz Şäyxetdin
