Tatarstanda “Bötendönya awıl xucalığında isäpkä alu – 2006”nı ütkärergä cawaplı keşeläre, alar isä kommisiäneñ citäkçese respublikanıñ xökemät başlığı Röstäm Minnexanov, anıñ yärdämçeläre awıl xucalığı başlığı Marat Äxmätov, TRnıñ däwlät statistikası xezmäte citäkçese Valeri Kändilov. Menä şuşı keşelär xucalıqlardağı ağaç, mal-tuar häm başqa äyberlärne sanataçaqlar, döresräge alarğa Mäskäwdäge başlıqlar sanattıra. Ä alar mondağılarnı yögertälär. Şuşı könnärdä isäpkä alıp yörüçe instruktorlar, koordinatorlar öçen uçastoklar, isäp urınnarı açıldı. Qazannan çittäräk rayonnarda buldırıla başladı. Koordinatorlar digännän, alarnıñ qayda küpme bulaçağın, isäpkä alu nindiräk formada baraçağın belü öçen, bez, Tatarstannıñ awıl xucalığında isäpkä alu ştattan tış xezmäte citäkçese Älfinur Mostafinadan sorarğa buldıq. Ul bu Rossiä küläm başqarıla torğan eşneñ Tatarstanda niçek baraçağın bolay añlattı:
- Bezneñ 85 koordinator bar. Keçeräk rayonnarda ber genä koordinator, zurraqlarında ikeşär, bar dürtäw dä, obyektları küp bulğan rayonnarda.
-Ul koordinatorlar närsä eşlärlär soñ? - digän sorawğa, isäpkä alu eşenä başı-ayağı belän çumğan Älfinur Mostafinanıñ cawabı tübändägeçä buldı:
- Alar bezneñ 10 maydan 18 avgustqa qädär eştä bulaçaqlar. Ber 3 kön alar uçastokka, isäp alına torğan binada iäläşü ütäçäklär, kiräkle käğäzlärne tärtipkä kiteräçäklär. 15nän 19 mayğa xätle alar uqilar. Annarı alar xucalıqlarnıñ isemlegen tikşerälär, kartografik materiallar , üzläreneñ uçastokları, obyektları, granitçaları belän tanışalar. Şunnan koordinatorlar isäpkä aluçılar belän instruktorlarnı barlıy başlarğa tieş bulalar.
- Menä bu koordinator, instruktor digännän, alar nindi teldä xalıq belän aralaşaçaqlar?
- Bez bit federal' üzäkkä buysınuçılar bulıp torabız. Şuña kürä Rossiä külämendä rus telendä alıp barılğaç, bezdä dä urıs telendä alıp barılaçaq. Rusça añlamağan keşegä tatarça añlatırğa tırışırbız, läkin böten sorawlar barı tik rusça uqılaçaq. Sorawlarnı, listovkalarnı tatarçağa tärcemä itärgä aqça da yuq, xäzer inde waqıt ta qalmadı.
Dimäk, xucalıqlarnı isäpkä alu rus telendä baraçaq, çip-çista tatar awılında da isäpkä aluçılar rus telendä xucalıq xucalarına soraw biräçäklär. Çönki Mäskäw tatarçağa aqça birmägän. Ä isäpkä alu beresennän 25 iyülgä qädär bulaçaq.
İsäpkä aluçılar jurnalistlardan da bu eştä yärdäm kötälär. Älfinur Mostafina da tatar bularaq, tatarlar äytä torğan: “ Kiäwgä çıqqaç berençe un kön awır bula dilär, annarı iäläşäseñ ”- digän äytemne iskä töşerde.
Röstäm İsxaqi
