Düşämbe könne “Azatlıq” radiosınıñ Qazan bülegenä Tatarstannıñ Saba rayonında yäşäwçe Timerbay Zaripov kilep kerde. İnde sigezençe distäsen waqlawçı Timerbay abıy bezgä üzeneñ niçek itep Xacğa barıp qaytuı turında bäynä – bäynä söyläde. Xörmätle tıñlawçılar, Timerbay abıynıñ xac säfäre xaqında bez sezgä kiläse tapşırularıbıznıñ bersendä işettererbez. Ä bügenge “Xalıq awazı” säxifäse qısalarında Timerbay äfändeneñ “Azatlıq” radiosınıñ eşçänlegenä qarata fikerlären häm täqdimnären citkerergä buldıq. Ä xäzer Timerbay Zaripovnı üzen dä tıñlıyq.
“Awıl cirendä törle eş turı kilde, aqça yuq ide inde. “Azatlıq” radiosın tıñlarğa tırışa idek, läkin radioalğıç alırğa aqça yuq ide. Bez anı kiç belän keşe ayağı tınğaç, keşe kermime, keşe kürmime dip qaça – qaça tıñlıy idek. Äle hiç räxätlänep tıñlap bulmıy ide, çönki tawışın kimetep basa idelär. Kiç tıñlap küñelgä señdergännären, irtän eşkä kilgäç aulaq cirdä genä ber – berebezgä söyläp, fiker alışa idek. Xäzer inde böten eşemne qaldırıp “Azatlıq”nı tıñlıym. Tıñlamıyça tüzä almıym, yañalıqnı işetergä kiräk här könne. Menä minem sezgä ber telägem bar ide. Waqıt – waqıt 5кенә minut bulsa da İslam dine turında äzräk wäğäzlärgä kiräk ide. Xalıqqa añlatırğa kiräk. Xalıq bit bötenesen belmi, kitaplar bar häm küp, läkin anı uqi başlağaç keşe anı añlap beterä almıy. ”Azatlıqnıñ daimi tıñlawçısı Timerbay abıy Qazan bülegenä Xacdan alıp qaytqan Zämzäm suın alıp kilgän ide. Qazan byurosı xezmätkärläre şuşı izge sunı awız itep sixätländelär. Ä Timerbay abıy radio tapşırularnı äzerläwçelärgä häm tıñlawçılarğa sälämätlek teläp doğa qıldı.
Xörmätle “Azatlıq ”radiosı tıñlawçıları sez “Xalıq awazı” säxifäse qısalarında Saba rayonınıñ Kildebäk awılında yäşäwçe Timerbay Zaripov fikerläre belän tanıştığız. Ägär dä inde sezneñ dä äytäse fikerläregez, teläk – täqdimnäregez bulsa, bezğä xat yazu öçen adres - 420012, Qazan 12, abonent tartması 155.
Xörmätle tıñlawçılar, Saba rayonında yäşäwçe Timerbay Zaripov, Aznaqay rayonınnan Ecwät Jixanşin, Baltaç rayonındağı Rifqat Zaripov häm başqa bik küp tıñlawçılarnıñ bezne iğtibar belän tınlawları “Azatlıq” eşen kamilläşterüdä zur yärdäm bulıp tora.
Gölnaz Şäyxetdin
