25 may könne Tatarstan Däwlät Şurasında Tatarstan parlamentınıñ 24 nçe utırışı uzdı. Utırışqa kilüçelärne qullarına şiğar'lär kütärgän keşelär qarşı aldı. Mitingta qatnaşuçılar Qazan şähäre buylap teläsä niçek quyılğan keçkenä säwdä noqtaları häm kiosklarnı rätkä salu belän qänäğät tügel. Utırış ta näq menä şuşı Qazan kiosklarınıñ yazmışın xäl itüdän başlandı. Keçe eşmäkärlek wäkilläreneñ ixtıyacların sessiä waqıtında bäysez deputat Aleksandr Ştanin yaqlarğa tırışıp qaradı. Anıñ fikerençä, kilep çıqqan xällär Qazanda xakimiät alışınuğa bäyle häm säwdä noqtaların beterü bäyälär kütärelügä nigez bulaçaq. Sessiä eşendä qatnaşqan Tatarstan Prezidentı Mintimer Şäymiev fikerençä, iñ möhime - älege mäs’äläne säyäsiläşterergä kiräkmi. Bu - şähärneñ köndälek eşläreneñ berse. Ul elegräk bazarlarnıñ yözne qızartırlıq buluın, xäzer aqrınlap tärtipkä salınuın belderde. "Bez üzgärtep qoru yıllarınnan birle keçe eşmäkärlekkä yärdäm itü turında söylibez. Bötenese dä zakon quşqança eşläyäçäk", - dide Prezident. Bügenge köndä şähärdäge 1425 säwdä noqtasınıñ 1200 neñ üze bilägän cirgä arenda kileşüe yuq. Alar yanında uram säwdäse dä kiñ cäyelgän. Prezident äytüençä, xäzer süz säwdä noqtaların rätkä salu turında bara. Bu eşmäkärlärgä keçkenä kibetlär salıp birüdä yärdäm itärgä kiräk. Xäzerge waqıtta bu mäs'älä buyınça Qazan şähäre başqarma komitetı räise Marat Zahidullov citäkçelegendä maxsus komissiä eşli. Şulay uq sessiäse waqıtında Mintimer Şäymiev akademik, däwlät şurası deputatı İndus Tahirovnı, Tatarstan Respublikası däwlätçelegen, tarix fänen, Rossiädäge federalizmnı üsterüdä zur öleş kertkäne öçen, "Tatarstan Respublikası qarşındağı qazanışları öçen" Ordenı belän büläkläde.
Gölnaz Şäyxetdin
