“Tatmedia” da uzğan brifingta Rossiäneñ Tatarstandağı Ğädättän tış xällär ministrlığınıñ baş idärä citäkçese urınbasarı – keçe sudnolar buyınça TR baş däwlät inspektorı Sergey Saylin 10 iyündä keçe sudnolar öçen navigatsiä açıluı turında da xäbär itte. Moña äzerlek 22 aprel'dän ük barğan. Alar şul däwer eçendä keçe sudnolarnı, plyajlarnı, başqala xalqı küpläp yal itä torğan urınnarnı texnik yaqtan rätkä kiterep mataşqannar, äle dä mataşalar ikän. Sergey Saylin belderüençä Qazanda 4 räsmi qızınu häm su kerü urını bar, alar isä “Näşriät”, “Keçe Zareç'ye”, “Lokomotiv”, “İzumrudnıy” plyajları. Alarğa da ekspluatatsiäläü, su qoyındırtu yaramıy digän kisätü yasalğan. Ä bit uramda cäy, qoyaş qızdıra keşelär mondıy könnärdä suğa çılanmıyça tüzä almıylar, kisätü-nitügä qaramıyça qoyına birälär. Ul plyajlarnıñ letsinziäläre dä yuq bulıp çıqtı äle. Xakimiät su buyında plyaj açarğa fatixa birä, ä eşçänlek alıp barırğa litsenziä birelmi. Plyajlardağı qotqaru köymäläreneñ kübese watıq. Cawaplı keşelär ul kimçeleklärne beteräçäkbez dip süz birgännär inde birüen. Qayçanğa qädär ikänen genä äytmägännär. Suda batıp ülüçelärneñ 92 protsentı qoyınırğa yaraqsız cirgä kerep su töbenä kitkännär. Qoyınırğa yaraqsız bulğan Ciñü parkındağı kül, “Aqqoş” küle, Gavrilova tiräsendäge sulıq, sanap kitsäk küp inde alar. Ğädättän tış xällär ministrlığı citäkçeläre äytüençä, bu urınnarnı qoyınırğa yaraqlı itär öçen aqça kiräk. Aqça birü tügel bu eş belän şöğellänergä orğanı da , keşeläre dä yuq. Ä bu waqıtta sulıqlarda beräm-beräm keşelär su töbenä kitä bara. 2005 yılda 125 keşe batıp ülsä, bıyıl äle qoyaşıñ qızdıra başlawına atna waqıt qına uzsa da 26 keşe su töbenä kitkän. Alarnıñ 2 se 8 yäştän 14 yäşkä qädär bulğan balalar. TRnıñ ezläw – qotqaru xezmäte citäkçese Emil' Fazlıyev suğa batunıñ tağın ber säbäbe – iserek, narkotik qullanğan kileş qoyınu di. Şulay uq küp oçraqta yözä belmäwçelär, qarawçısız qalğan balalar batqannar. Qotqaru-ezläwçelär orğanı xezmätkärläre äytüençä keşelär su qoyına torğan urınnarda gidromototsiklar häm qatamarannar bulırğa tieş tügel. Respublikanıñ ğadättän tış xällär ministıyrlığı wäkilläre cäyge sezonda su qoyınırğa teläwçelärgä iñ zur kiñäşläre, ägär yözä belmäsägez, bildän yuğarıraq tiränlekkä kermägez! Ägär inde kerep, tanışığız, qırıydağı keşe yäki başqa beräwgä yärdäm kiräk bulsa “ışanıç telefonı”na şaltıratığız; 2 -92 – 64 – 09, Qazan kodı 843.
Röstäm İsxaqi
