“Sälät”lelär: “Aş bulsın!” – di…

“Sälät” - ul tatar yäşlärе lagerı. Mäktäp yäşendäge yäşüsmerlär öçen dä, studentlar öçen dä anıñ işekläre açıq. “Sälät”neñ “Rawşan” alanında 6 sıynıftan alıp 10 sıynıfqa qädärle bulğan mäktäp balaları hawa torışınıñ nindi buluına qaramıyça şaw-gör kilep waqıt uzdıralar. Mäsälän alanda, uquçılar irtän, töş waqıtında häm kiçen aşxanägä kergändä “Aş bulsın!” – dip qıçqıralar, aldan kilep utırğannar “Bergä bulsın!!”- dip cawap qaytaralar. Alarnıñ qunaqlar belän, äydäman apa - abıyları belän aralaşu telläre dä üzlärençä. Berençe kilep kürgännär ğäcäpkä qalırğa mömkinnär, nik digändä basıp torğan cirlärennän cırlap qullar belän şap-şop kilep biep tä cibärälär, kinät tuqtap qalıp sälämläw-devizların yäki başqa süzlären äytä başlıylar. Uquçılar äydämannarnıñ awızlarına, qullarına ğına qarap toralar, alar niçek äytsälär bersüzsez ütilär. Bu alanğa barğançı bezgä “Sälät” yäşlär fondınıñ citäkçese Cäwdät Söläymanov bolay digän ide: - Äydämannar bezneñ qayçandır “Sälät”tä qatnaşqan studentlar inde. Uqıtuçılar, törle universitetnıqılar. İnde bezgä quşıla toralar Röstäm belän Güzäl Malikovlar. Alar cır –köy serlären öyrätep, balalarğa master klasslar ütkärergä teläk belderdelär. Bez barğanda Malikovlar ğailäse “Rawşan”ğa barıp cır buyınça däreslären başlağannar ide, şul uq lager'dä uquçılarnıñ “Säläm FM” isemle radioları da eşläp tora. Anda şulay uq ingliz tele, lingvistika, jurnalistika, tatar tele, tatar dönyası, matematika-informatiqa, kompyuter mäktäbe, psixologiä däresläre bara. Bezneñ xäbärçelär jurnalistikadan berençe däres ütkärdelär. Qalğan könnärneñ bersendä KDU nıñ jurnalistika häm sotsiologiä fakul'tetı dekanı Wasil Ğarifullinnıñ da kilüen balalar tüzemsezlek belän kötälär. Balalar digännän alarnı alay dip kenä dä äytü döres tä bulmas kebek, qayberlärennän oçraşu waqıtında zur keşelär äytä torğan süzlär, soraw -täqdimnär çıqtı. Bezgä alar “Sälät” , “Rawşan” turında, üzläre turında menä närsälär söylädelär: -

Minem isem Fidilä, Baltaç rayonı Särdegän awılınnan. 9 sıynıfnı gel bişle bilgelärenä genä tämamladım. “Sälät”tä min inde 3 yıl qatnaşam. Ul başqa lagerlardan berdämlege belän ayırıla. Barsı belän tuğanlaşıp betäsen, dusların öçen canıñnı birergä äzer bulıp torasın. Monda oyatsızlıq, dorfalıq yuq, bar keşegä dä ışanıp bula. -

Minem isem Çulpan. Min Apas rayonınnan kildem. “Rawşan”da berençe tapqır. Konsertlarda qatnaşam, biim-cırlıym… -

Söngätullina Rezeda, Qaybıç yaqlarınnan bulam. 10 sıynıfnı beterdem, “Sälät”tä äle berençe genä yıl. Monda min üzemdä ruxi kütärenkelek sizdem, käyefem gel äybät. Gel tatarça aralaşabız, yaña duslar taptım, Orenburg ölkälärennän, Başqortstan yaqlarınnan kilgän qızlar-yegetlär belän tanıştım. Älegä bar alannar festival'gä äzerlänä. “Sälät”neñ 7сеннән 11 iyülgä qädär ütäçäk festival'dä här yıldağıça böten respublikadan häm Rusiäneñ törle töbäklärennän yözlärçä balalar, yäşlär, qunaqlar, mäşhür' şäxeslär qatnaşında aqıl bäygeläre, konsertlar, törle sport yarışları häm icat kiçäläre uzaçaq dip ışandıra oyıştıruçılar. Röstäm İsxaqi