Awıl xucalığında isäpkä alunı iskärtkän syujetlar iñ töp yañalıqqa äylände, şul uq “Yaña ğasır” tele-radio kompaniäsendä dä. İsäpkä alu Prezident turındağı xäbärlärdän dä yuğarı sikerä. Mäsälän 1 iyüldä, san alu başlanğan könne, “Yaña ğasır”nıñ atnalıq küzätü tapşıruında bu xaqta syujet kürsätep kittelär. Syujetta sarı kepka kigän, qara sumqa asqan isäpkä aluçılar duñğızlar sanıylar. Şunda uq duñğız balaları çap-çop kilep yäşel ülän kimerä, syujet geroyları alarnı qullarına alıp duñğızlarnıñ böten zurlığı belän dä kürsätep alalar. Zäñgär ekranda awıl xucalığında isäpkä alu başlanu turındağı xäbär betä dä, berniçä kön aldanraq Tatarstan prezidentı Mintimer Şäymievnıñ Çallıda yäşlär belän oçraşu küreneşläre başlana. Anda prezidentnıñ “Bez buldırabız! Çallı äybät şähär” häm başqa süzläre işetelä. Televideniedä awıl xucalığında san alu turındağı xäbär belän ni genä qılandırmıylar. Yort-cirlär, sıyır-sarıq, tawıq-qaz, duñğız simertü fermaları, traktorçı abzıylarnıñ qırda eşläw küreneşläre barsı da bar. Ekranda alar şat yözle kürensälär dä, ğädäti tormışta abzıylar mañğayları sırlanğan, çarasızlıqtan nişlärgä belmägän keşe qiäfäten ala. “Tatarstan yäşläre”neñ 4 iyül sanında Säyet Xäkimcanovta san alu turında bolay dip yaza:“Bügen däwlät – awıl xalqına, awıl xalqı däwlätkä ışanmıy. Awıl xucalığında san aluğa äzerlek monı kürsätte inde, küplär anıñ berär törle näticä, çınbarlıqnı çağıldırırlıq sannar tuplıy aluına şiklänep qarıy…” Moña misal itep awıl abzıy-apalarınıñ borçuların, aq yaulıqlı äbilärneñ yäşleklärendä san alu kebek östän quşılğan färmannarnıñ ayanıçlı xällärgä kiterep, şunı iskä aluların äytep bula. Xalıqnıñ isäpkä aludan qurqunıñ töp säbäbeneñ berse yort-cir, mal-tuar totqan öçen salımnarnı kütärä almaslıqqa artırıp quyuları. “Tatarstanda ğına da bit 1 millionğa yaqın keşeneñ yazmışı awıl cirenä bäylängän. ”- dip yaza şul uq “ Tatarstan yäşläre”. Awıl xalqı sizä, bu san alu tikmägä tügel, xalıq faydasına bulaçağı bötenläy ikele. Şul uq awıl cirle üzidarä citäkçeläreneñ dä başı qatqan buğay, Qama buyındağı rayonnarnıñ ber awılınıñ cirle üzidarä räisenä şaltıratqan idek. Ul telär - telämäs kenä: “ Rayonnan birgän ämerlärne tieşençä ütibez. Xucalıqlarda san alu başlandı, awıl xalqı üz awıldaşları isäpkä alıp yörgäç bu küreneşkä tınıç qarıylar. Almağaçların da , sıyır-sarıqların, cirlären dä terkäp barabız. Xäzergä şular, waqıtım yuq, xuşığız” – dide dä trubkasın quydı. Tawışın yazdırıp tulıraq xäbär alırğa cirle üzidarä räise waqıt tabalmadı. Bu añlaşıla da inde, quşılğan ämerne ütäwneñ iñ qaynar çağı, berär yaramas süz äytsä yuğarıdağı türälär işetep rayonğa, rayon başlıqları awıl räisenä şunduq şeltä, üzlärençä cawapsızlıqta ğayıpläwläre kön kebek açıq. Ä xalıq sanı alu bara, Tatarstanda şuşı könnärdä 82 koordinator, 528 uçastok instruktorı, 3 meñ san alu uçastoklarında eş qaynıy. Ber isäpkä aluçığa yaqınça 250 xucalıq turı kilä ikän. Monsınıñ näticäläre 2007 yılnıñ mart-aprel' aylarında bulaçaq dip ışandıra Rusiäneñ statistika üzäge başlığı Vladimir Soqolin.
25 iyülgä qädär yortığıznıñ işegen sarı kepkalı, qara sumqa asqan keşe şaqısa, ğäcäplänmägez çegän dä, reklama taratuçı da tügel, isäpkä aluçı ul.
Röstäm İsxaqi
