7 yüldän 11nä qädär respublikanıñ Älki rayonındağı Bilär yanında uzuçı X Sälät yäşlär alanına qunaqlar küp kilä. Läkin yäkşämbe, 9 yüldä, monda bik üzençälekle qunaq – Tatarstannıñ premyer-ministrı Röstäm Miñnexanov bulıp kitte. Ul sälätle balalar yanına irtän, boralaqta kilep töşte. Premyer-ministr alan, anıñ eşçänlege, yäşlärneñ üzläre belän tanıştı. Qunaq kilü uñayınnan tantanalı cıyılışta uzdı. Anda Röstäm Miñnexanov Sälät waqıfı, anıñ eşçänlege xaqında bik cılı süzlär äytte.
Premyer üz çığışında balalarğa küp kenä närsälär dä wäğdä itte. Alar arasında Sälät alanı ütä torğan cirdä waqıtlı palatkalar urınına bar uñaylıqları da bulğan yortlar salu da, alanğa kompyuterlar belän yärdäm itü bar. Ğomumän, ul Sälät alannarınıñ bik kiräklege xaqında söyläde, alarnıñ eşçänlegen yaña ber däräcägä kütärergä kiräklege turında äytte.
Xäyer, Röstäm Miñnexanov qorı wäğdälär belän genä çiklänmäde ul könne. Ul Tatarstan xökümäte isemennän Sälät waqıfına GAZel’ mikroavtobusın büläk itte. Häm üze dä büläksez qalmadı. Alanğa kilü istälege itep aña Sälätneñ maykası tapşırıldı.
Gölnaz İlgizär
