Rawşan alanında Azatlıq köne ütte

Tatar yäşlären cäy könne berläşterep, aralaştırıp toruçı Sälät alannarı inde tämamlanuğa taba bara. Şuşı könnärdä genä bar alannarnı da berläştergän Sälät festivale dä şawlap, görläp uzıp kitte. Bıyıl ul respublika xakimiäteneñ ayıruça zur iğtibarı belän istä qaldı.

Bala, yäş çağında bik küplärneñ törle cäyge lager’larda yal itkäne bar. Kemnärdäder bu xaqta yaqtı, matur istäleklär, qayberäwlär isä älege waqıtnı, kiresençä, ber dä iskä alırğa yaratmıy. Ä menä ber genä märtäbä bulsa da Sälät alanına barğan bala, anda tağı bulırğa xıyallana. Närsä tarta soñ alarnı monda, nigä Sälät festivalenä elek şuşı lager’larda yal itkän, xäzer inde student yäşlär dä, alarnıñ ata-anaları da kilä? Äydägez festival’neñ niçek uzuı turında Sälätne başlap yörüçelärneñ berse, bıyıl inde 10nçı märtäbä uzğan festival’neñ bersen dä qaldırmıyça anda qatnaşuçı Ali Ğilmidän soraşıp qarıyq.

Bilärdäge festival’ ul 5 kön däwam itte. Anda barlıq Sälät alannarında qatnaşuçılar cıyıla. Bu yulı anda barlığı 800 bala bar ide. Monnan tış, elekkeräk yıllarda Sälät lager’larında bulğan balalar da cıyıldı. Şular belän barlığı ber meñläp keşe cıyılğandır. Bıyıl festival’dä 3 tuy da uzdı. Sälättä tanışıp, aralaşıp yörgän 3 par üzläreneñ tuyların maxsus näq menä şuşı könnärdä ütkärergä bulğannar. Uzğan yäkşämbedä Sälätkä respublika premyer-ministrı Röstäm Miñnexanov ta kilde. Ul balalar belän aralaştı, alarnı büläkläde, kiläçäktä yärdäm wäğdä itte

Azatlıq radiosın tıñlawçılar, belüçelär sälätçelär arasında da bar ikän. Bu xaqta Rawşan alanında uzğan Azatlıq könendä bilgele bulğan. Ali Ğilmi däwam itä.

Bez Ali Ğilmidän, Sälät balaları başqalardan ni belän ayırılıp tora, 10 yıl däwerendä alar üzgärdeme, dip tä soraştıq.

Monda kilgän balalar – alar saylanıp alınğan, törle bäygelärdä ciñgän balalar. Minemçä, alarnıñ barısına da ber närsä xas – yaxşılıqqa tartılu. Alar törle ölkädä sälätlelär häm ber-bersen tulılandırıp alannarda nindider ber ayırım moxit barlıqqa kilä. Minemçä, menä şuşım moxit haman yäşi, däwam itä

Menä şuşı moxittän ayırılmıyça, qış buyı yaña oçraşularnı kötep yäşi Sälät balaları. Häm uqıp, belemnären genä arttırıp qalmıy, ä kiläse alannarğa äzerlänä, üzläre turında cırlar yaza.

Gölnaz İlgizär